1 À ɠaaɓa, molo ɠulasu alugi ma, wo Pake fɛtii ɠula Ɠɔoɠɔ GALAGI wa-ƓALAGI lɛbi vai ma, mazɔlɔɔ naama alugi ma ɓidii ta ɠa Ɠɔoɠɔ GALAGI wa-ƓALAGI wo ɠulani la Ezipete yooi ʋa. 2 Wa nikɛi ɠula ga Pake zalaɠai, ɓaa baalagi, ɓaa bolii, Ɠɔoɠɔ GALAGI wa-ƓALAGI lɛbi vaa ma, naama adaʋɛ, ʋɛ a yeelo ná ʋa, ga daaseigi ɠɛ ná. 3 Ɓului lɛʋɛi su, à mina naa ɓɔ Pake daamianigi ʋa, wo ʋa mi, kɛlɛ folo lɔfela laawu, wa yɛ ɓului miizu, nii lɛʋɛ la su. Ziizoolɛ ɓului naa ɠa wo ɠitoo su ga wo zeɠeni Ezipete yooi zu ga gaazuvilɛi. Naa maaʋele ma, wo-zii ma voloi pɛ su, wo-ɠi ka yɛ wo zeɠe voloi zu Ezipete yooi zu. 4 Naama volo lɔfelai kpein daawu, maa la nɛɛni nu ʋa lɛʋɛi ʋo gila kpalaa ka wo-zeizuʋɛ wa-yooi kpein su. Nii é ga suai é ɠulazu ga zalaɠai folo mɔungi ma ɓɔkɔi, nu mina tanɔpɛ makɛ, é ʋa yɛsu sobui ʋa zeeli. 5 Wo la zooga wo ʋa Pakegi ma zalaɠa zuai ʋaa taaiti pɛ nɔ zu, niiti Ɠɔoɠɔ GALAGI wa-ƓALAGI ti veezu wo ya ga wo-zeizuʋɛ. 6 Kɛni nɔ ʋɛ Ɠɔoɠɔ GALAGI wa-ƓALAGI yeelosu ná ʋa, ga daaseigi ɠɛ ná, miná ɠa wa Pake zalaɠai ɠula ná. Wa zalaɠa zuai ɠɔdaaleʋe foloi daa ziɛgi zu, siɛgi zu wo wuzeɠeni la Ezipete yooi zu. 7 Wa suai ɠili, wo mi naama adaʋɛ, ʋɛ Ɠɔoɠɔ GALAGI wa-ƓALAGI yeelosu ná ʋa. Poluma zobui, wa zoo wo li wa-zeɠe ɠotaiti bu. 8 Folo lɔzita laawu, wa yɛ ɓului miizu, nii lɛʋɛ la su. Folo lɔfelasiɛi, wa maaɓɔ ɲadegai wo Ɠɔoɠɔ GALAGI wa-ƓALAGI lɛbi vai ma. À mina boti nɔpɛ kɛ naama volo ná.

9 Wa dɔɔɠɔi ɠaalu ga dɔfela. Wa gaalu fai lɔɔzei, siɛgi zu moloi é ga ɓeleegi, wa naa leʋe vai lɔɔzeina la, wo wɔlɔtɔi lɔ su nɔ feya. 10 Naa ʋolu, wa dɔɔɠɔiti ma vɛtii ɠula Ɠɔoɠɔ GALAGI wa-ƓALAGI lɛbi vaa ma. Wa vebɛaniiti fe bɛ, wo daai ɠisu, é zoloo tuyai ma, nii wa-ƓALAGI a too wo ʋɛ. 11 Wa ɠoozunɛ Ɠɔoɠɔ GALAGI wa-ƓALAGI ɠaazu, wa wo-loun zunuiti, wa wo-loun anzanuiti, wa wa-wotiɠɛ zunuiti, wa wa-wotiɠɛ anzanuiti, wa Leevi nuiti ta ɠɛ zeini wa-laaiti su, ta seikɔɠɔma nuiti, ta podointi, ta poanzaiti ta ɠɛ wo zaama, naama adaʋɛ, ʋɛ Ɠɔoɠɔ GALAGI wa-ƓALAGI yeelosu ná ʋa ga daaseigi ɠɛ ná. 12 Wa ɠizɛ su ga wo ɠɛni ga duɔiti Ezipete yooi zu. Wa ɠaaɓa, wo devei tɛiti so, wo ziɛ ga tiye.

13 Siɛgi zu wo ɓesu la ga moloi loɠa, nii é ga ɓeleegi, ta dɔɔ ɓɛtɛ vai, wa kota vɛtii ɠula, wa naa ɠɛ folo lɔfela laawu. 14 Wa ɠɛ koozunɛɛi zu, wo ɗa fɛtii ɠula, wa wo-loun zunuiti, wa wo-loun anzanuiti, wa wa-wotiɠɛ zunuiti, wa wa-wotiɠɛ anzanuiti, é ʋɛɛ Leevi nuiti ba, ta seikɔɠɔma nuiti, ta podointi, ta poanzaiti ti zeini wo zaama. 15 Folo lɔfela ɠa wa kɛ fɛtii ɠa Ɠɔoɠɔ GALAGI wa-ƓALAGI lɛbi vaa ma, naama adaʋɛ, ʋɛ é yeelosu ná ʋa, tɔɔzei toɠa ʋaazu tuya loozu kpalagi zu anii kpein ma, ta botii kpein wa kɛ, naa ɠa a kɛ, wo ɠɛ koozunɛɛi zu, nii kwɛ ge la ba.

16 Ná zeizu ɠa ɠɛ saʋa konagi zu, zunuiti kpein ti ɠula kɛlɛma Ɠɔoɠɔ GALAGI wa-ƓALAGI ɠaazu, naama adaʋɛ, ʋɛ a yeelo ná ʋa: ɓului nii lɛʋɛ la su naama vɛtii zu, ta dɔɔɠɔiti ma vɛtii zu, ta kota vɛtii zu. Nu nɔpɛ ge mina ɠula kɛlɛma Ɠɔoɠɔ GALAGI ɠaazu ga yeaɲaka. 17 Kɛlɛ ɛsɛ gilagilagi ɠa ʋa ga gala kɔɔi, é zoloo ná-sɔlɔɔgi ma, eɠɛʋelei Ɠɔoɠɔ GALAGI wa-ƓALAGI tuya loa bɛ la.

18 Taaiti kpein Ɠɔoɠɔ GALAGI wa-ƓALAGI ti veezu wo ʋɛ, wa tukpɔɠaaleʋe nuiti sei naati, ta kundiɠiiti wa-wolodaiti su, ti ɗa nuɓusɛiti tukpɔɠaaleʋe ga telebodai. 19 À mina tukpɔi maaʋe, à mina zeelɔzɔɠɔzu ɠɛ, à mina lobɛani zo, wo ʋa yaava, mazɔlɔɔ lobɛanii ɠa ɗa ɠima nuiti gaazuɠole, é sɔbalala nuiti ta-vai maaʋe. 20 À ɠaaɓa, wo tukpɔɠaaleʋe ga sɔledai, naazu wa zoo wo wa-eteai ziɛ, wo zooi zeɠe ga wɔnɔ, nii Ɠɔoɠɔ GALAGI wa-ƓALAGI feezu wo ʋɛ.

21 À mina sale ɠɔɔ wului ta lo zalaɠa ɠulazuʋɛ ɠobaʋɛ, nii wo ʋaazu kpɛtɛzu Ɠɔoɠɔ GALAGI wa-ƓALAGI ʋɛ. 22 À mina sale ɠɔɔ ɠɔtu ɠaalɔ naa ɠobaʋɛ, mazɔlɔɔ naama ɠɛɛwotii ma ziiti wɔinzeɠeʋɛ Ɠɔoɠɔ GALAGI wa-ƓALAGI ma.