1 Ɠɔoɠɔ GALAGI ná-keelai zeɠeni Gilegale, é ʋa Ɓɔkime, é ɓɔɛni Izelayɛle nuiti pɔ, é ɠɛ ti ma: «Gè wo ɠulani Ezipete yooi ʋa, gè ʋaani ga woye zooi naa zu, nii gè minazeɠeni ná-faa zu, gè ma ɠonai wo, wo-mɛmɛwolani bɛ. Gè ɠɛni ma: ‹Eyɛsu ɠɔ, gè la nà-minazeɠegi ɠoloɠologa wo letema. 2 Wɔun wa, wo la minazeɠe boga niima yooi ma nuɓusɛiti bɛ, wa ta-zalaɠa ɠulazuʋɛti toka.› Kɛlɛ wo la woiloni gòoi ma. Lee vaa zu wo naa ɠɛɛni? 3 Názu ɠa gè ɠɛni la ma, gè la ti ɓɛɛzu wo luɠɔ, ta yɛsu wo ɠoba, ta-ɠalagiti ti ɠɛ ga baliiti wo luɠɔ.»

4 Siɛgi zu Ɠɔoɠɔ GALAGI ná-keelai niima wooiti boni la Izelayɛle nuiti ma, nuɓusɛiti ti tɔɔzeini ga wɔlɔa. 5 Ti naama adaʋɛ laasei pɛɛni ga Ɓɔkime (nii poluʋɛ ga «gɔlɔ nuiti»). Ti zalaɠaiti kulani ná Ɠɔoɠɔ GALAGI ʋɛ.

6 Zozuwe yeeɓeni nuɓusɛiti ba, Izelayɛle nuiti ti liini ti zooi zeɠe, ti ɠilagilagi zei ná-poganii unda. 7 Nuɓusɛiti ti ɠɛni Ɠɔoɠɔ GALAGI lɛbizu, Zozuwe zii ma voloi pɛ su, ta kɛwolai naati kpein ta-ziɛgi zu, niiti ti ɠɛni ma ta Zozuweni, ti kɛɛwoti wolaiti kpein kaani, niiti Ɠɔoɠɔ GALAGI ti ɠɛɛni, Izelayɛle ná-faa zu.

8 Nun ná-doun zunui Zozuwe, Ɠɔoɠɔ GALAGI ná-botiɠɛ nui zaani, siɛgi zu ná-konagi ɠɛni la ga ungila puugɔ (110). 9 Ti maaɠuluni ná-zooi ma, nii é sɔlɔɔni ga nɔnɔ Timenate-Ɠeelɛse, Efelayime ɠize yooi zu, Gaase gizei lɛkpɛmaʋɛ nu ɠɔʋɛzuʋɛ. 10 Ma ɠɛɠalamaiti kpein ɓalaa ti zeɠeni ná, ti za, ti li ti-mɛmɛwolani pɔ, ti zaai. Ɠɛɠalama ɠili ge wuzeɠeni naati poluma, nii é la ɠɛni Ɠɔoɠɔ GALAGI ɠwɛɛ, anɛɛ kɛɛwotii nii é kɛɛni Izelayɛle ná-faa ma.

11 Názu ɠa Izelayɛle nuiti ti Ɠɔoɠɔ GALAGI wanama vai ɠɛɛni la, ti Ɓaale ɠalagiti dɛbini. 12 Ti ɠɛlɛni Ɠɔoɠɔ GALAGI ʋa, ti-mɛmɛwolani ta-ƓALAGI, nii é ti ɠulani Ezipete yooi ʋa, ti ʋilɛ gala kiligiti polu, nuɓusɛiti ta-ɠalagiti saama, niiti ti ti-maaɠoolii zu. Ti ɠɛni nɔkɔsu ti wu, ti ɗa Ɠɔoɠɔ GALAGI yiiɠaawana. 13 Ʋele ɠana ti ɠɛlɛni Ɠɔoɠɔ GALAGI ʋa, ti ɗa Ɓaaleni dɛbi ta Asetaateiti.

14 Ɠɔoɠɔ GALAGI yiiɠaawanani Izelayɛle nuiti ma. É ɓeni ti ʋa, toosu nuiti ti loo ti ma, é la ti maaloboni. É ti lɔɔni ti zili nuiti zeezu, niiti ti ɠɛni ti-maaɠoolii zu, ti la zobo sɔlɔɔni, ti ʋa lo ti zili nuiti daalɔɠɔma. 15 Siɛnɔpɛ su ta la liina la kɔɔmaʋɛ, Ɠɔoɠɔ GALAGI ɠɛni suɠoloɠolosu ti ya, eɠɛʋelei é boni la ti ma, é ma ɠonai wo. Ʋele ɠana ti lɔɔni la iɲɔteʋe wolai zu.

16 Ɠɔoɠɔ GALAGI tukpɔɠaaleʋe nuiti buzeɠeni, niiti ti ti ɠizoni, ti ti ɠula ti zili nuiti zea, niiti ti ɠɛni loozu ti ma. 17 Kɛlɛ ti la ɠɛni woilosu ta-lukpɔɠaaleʋe nuiti gooi ma. Ti ɠɛni nɔ ɓɔɠɔ ɠɔzɔzu ga gala kiligiti, ti ɗa nɔkɔ ti wu. Ti ɠɛni zeɠezu gaamanɔ naama ʋelei ʋa, nii ti-mɛmɛwolani ti ziɛni la, niiti ti ɠoloni Ɠɔoɠɔ GALAGI ná-devei ʋɛ, ti la ɠɛni ʋokɔɠɔni naati ma, ti ziɛ ʋelei ɠɛni yɛ. 18 Siɛnɔpɛ su Ɠɔoɠɔ GALAGI ɠɛni tukpɔɠaaleʋe nui leʋesu da, é ɠɛni ɠɛɛzu naa ʋa, é ti unmɔɔ, é ti ɠula ti zili nuiti zeezu, tukpɔɠaaleʋe nui naa ná-yeeɠɛɠalai kpein su. Mazɔlɔɔ Ɠɔoɠɔ GALAGI a la ná-nuɓusɛiti kaana, ti ɗa kpeei loo unbawului wu, ti zili nuiti zea, ti ɗa ti maanɔɠɔ, ti maawɔin ɠɛni sosu. 19 Kɛlɛ siɛgi zu tukpɔɠaaleʋe nui a la zaana la, nuɓusɛiti ti ɓena tɔɔzei ga ɓɔɠɔ ɠɔzɔa mɔnɔ, é leʋe ti-mɛmɛwolani tɔnɔi ʋa, ti ʋilɛ gala kiligiti polu, ti ɗa ti lɛbi, ti ɗa nɔkɔ ti wu, ti la ɠɛni yeeɓesu ti-zɔ ɲɔiti ba, ta ta-ɠikpaiti.

20 Ɠɔoɠɔ GALAGI yiiɠaawanani Izelayɛle ma, é ɠɛ ma: «Tɔɔzei niima nuɓusɛiti ti nà-minazeɠegi ɠoloɠologa, nii gè boni ti-mɛmɛwolani bɛ, tɔɔzei ti la ɠoloni gòoi ʋɛ, 21 nɔ̀un nà, gè la mɔ zii niiti gila kpalaa kpɛa, tɛiti ti yɛgai ná, eyɛsu Zozuwe za, 22 naa ɠa a kɛ gè ti ɠɛ ga Izelayɛle ʋoluɠula anii, gè kwɛɛ, ni ta ziɛ ga nà-pelei, eɠɛʋelei ti-mɛmɛwolani ti ziɛni la, ti ɠolo bɛ̀.» 23 Ɠɔoɠɔ GALAGI zii naati zɛni ná, ti zei ziilɛigi zu, é la ɠaazuvilɛni ga ti ɓɛa, tɛiti é la ɠɛni ti lɔɔni Zozuwe yeezu.