1 Ɠɔoɠɔ GALAGI ɓɔɛni Moize ta Aalɔn ʋɔ, é ɠɛ ti ma: 2 «Keɠate mavofodaiti gaalu, Leevi ná-doun zunuiti saama, eɠɛʋelei ta-wolodamaiti ti la, ta ta-ʋɛlɛyeɠeiti, 3 é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma.

4 «Keɠate mavofodaiti ta-wotii ʋɛtɛ, ta ɠɛ kɛɛzu GALA daaɠomi seɠe ʋɛlɛi wu: ada ɲadega wolai ma ɠasɔi ɠa ɠɛ ti unma. 5 Siɛgi zu ta ɠɛ liizu la, ti zeɠe ti-ʋuuzuʋɛ, Aalɔn ta ná-doun zunuiti ta seɠe zuɠooza golai ɠula, ti zeele woo ɠesui maavelevele la, 6 nuni ɠɔlɔi ʋɛɛ ma, ti seɠe ɓiinii ʋɛɛ maazu, naa ʋolu ti kesui zeɠe wulu zɔkpɔiti to ba.

7 «Ta seɠe ɓiinii ʋɛɛ taɓalii ma, nii ɓului laazu ga GALA bɛ, ti diɠiiti sei maazu, ta tazaiti, puya zalaɠai vaa zu, ta kokoiti, ta ziawɔiti. Ɓuluiti ti veai GALA bɛ, naati ta yɛ ná taɓalii ɠa. 8 Ta pɛɛmazeɠe ɓɔi sɔsɔgi ʋɛɛ ma aniiti ma, naa ʋolu ti nuni ɠɔlɔi velevele ti ma, naa ʋolu ti taɓalii zeɠe wulu zɔkpɔiti to ba.

9 «Ta seɠe ɓiinii zeɠe, ti felevele fitina zei anii ma, wozaɠala fai zu, ta ná-fitinaiti, ta ná-salaʋa zo sɔɔlaiti, ta ná-salaʋa zeɠe aniɲakaiti, ta ná-gulɔ aniɲakaiti, ná-botii ɠɛɛ vai ma. 10 Ta ti maavelevele, ta ná-sɔɔlaiti kpein, nuni ɠɔlɔi zu, ti ti la kasɔ zeɠe wului ma.

11 «Ta pɛɛmazeɠe ɓiinii ʋɛɛ zalaɠa ɠulazuʋɛ ma, nii zanugi ziɛni maaʋɛ, ti maavelevele ga nuni ɠɔlɔi, naa ʋolu ti seɠe wulu zɔkpɔiti to ba. 12 Ta aniɲakaiti kpein seɠe, niiti ti botii ɠɛɛzu ga tiye seizu ɲadegai zu, ti ti ʋu seɠe ɓiinii zu, ti ti maavelevele ga nuni ɠɔlɔi, naa ʋolu ti ti la kasɔ zeɠe wului ma.

13 «Ta zalaɠa ɠulazuʋɛ ma yuʋui ɠula su, ti pɛɛmazeɠe ɓɔigi ʋɛɛ niina gaazu, 14 naa ɠa ti sɔɔlaiti kpein puuzu maazu, niiti ti ga ná-botiɠɛ aniiti: abu zeɠe aniiti, sua zɔɔ mitɛ wolaiti, pɛluiti, ta kokoiti. Naa ʋoluma ta nuni ɠɔlɔi ʋɛɛ ti pɛ maazu, ti seɠe wulu zɔkpɔiti to ba.

15 «Siɛgi zu Aalɔn ta ná-doun zunuiti ti ɓesu la ga seizu ɲadegai ta sɔɔlaiti maavelevele, ti lii ziɛgi zu, ti ʋa zeɠe ʋuuzuʋɛ, Keɠate ná-nuiti ta ʋa niina, ti ti zeɠe. Kɛlɛ ti mina yeevɔɔɠu ada ɲadegai ma anii ta ʋa, ti ʋa za. Keɠate mavofodaiti tosuʋɛ ɠana, GALA daaɠomi seɠe ʋɛlɛi ná-fai zu.

16 «Zalaɠa ɠula nui Aalɔn ná-doun zunui Eleazaal losuʋɛ ɠa ga, é ɗa wɛlɛ fitinai ná-gulɔi ma ta ani maku nɛɛnɛgi, ta vebɛanii é ɠulazu folo-o-folo, ta siɛma wulɔ ɲadegai. Toɠa seɠe ʋɛlɛ ɲadegai ma wɛlɛma vai kpein kɛ, ta bu anii kpein, ta seizu ɲadegai, é ʋɛɛ ma zɔɔlaiti kpein ba.»

17 Ɠɔoɠɔ GALAGI ɓɔɛni Moize ta Aalɔn ʋɔ, é ɠɛ ti ma: 18 «À mina va bu ga Keɠate nuiti ta-wolodai ma ʋɛlɛyeɠeiti ma zuwu ɠaaleʋe Leevi nuiti saama. 19 Wɛlɛ pelegi maanɛai wo kɛ la ti ʋɛ, nii a kɛ ti zɛnvui wo, ti mina za: Siɛgi zu ti ʋaazu la ani ɲadegaiti pɔ bɛ, ɗɛi è ga Aalɔn, wa è-loun zunuiti, wa lɛ, wo ɛsɛ tosuʋɛ lɛɛ la, nii maanɛai é kɛ. 20 Keɠate nuiti ti maa la nɛɛni, ti ʋa lɛ ada ɲadegai eyɛsu pɛ, naa ʋɛtɛ faa zu, anɛɛ yeeɠɛɠala go nɔ laawu, ti ʋa za.»

21 Ɠɔoɠɔ GALAGI ɓɔɛni Moize ʋɔ, é ɠɛ ma: 22 «Gɛɛleson mavofodai ɠaalu, eɠɛʋelei ta-wolodamaiti ti la, ta ta-ʋɛlɛyeɠeiti. 23 Ɗa zunuiti kpein gaalu, é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma. 24 Wɛlɛ nii ɠa é ɠɛɛzu ga Gɛɛleson nuiti ta-ʋɛlɛyeɠeiti tosuʋɛ, nii ta kɛ, ta nii ta seɠe: 25 ta ɗa seɠe ʋɛlɛ ɲadegai ma landaiti seɠe, ta GALA daaɠomi seɠe ʋɛlɛi, ta ma ʋɛɛmazeɠeiti, ta nuni ɠɔlɔi é ʋɛɛzu ti maazu, ta seɠe zuɠooza golai é GALA daaɠomi seɠe ʋɛlɛi laaʋɛ, 26 ta koii ma zasai, nii é seɠe ʋɛlɛ ɲadegai ta zalaɠa ɠulazuʋɛ maaɠoolii zu, ta sasai laaʋɛ ma zeɠe zuɠooza golai, é ʋɛɛ ta-ɠaluiti ba, ta naama zɔɔlaiti kpein. Ta botii kpein kɛ, nii togai naa ʋa. 27 Gɛɛleson mavofodaiti ta ta-wotii kpein kɛ Aalɔn ta ná-doun zunuiti ta-levei wu, ti naama ɠasɔi zeɠe, nii maanɛai ti seɠe, ti ti-losuʋɛ laazeeli. 28 Pele ɠana Gɛɛleson nuiti ta-ʋɛlɛyeɠeiti ta-wotii a ɠɛ la, é lo GALA daaɠomi seɠe ʋɛlɛi vai ʋa. Ta kɛ, ti daazeeli zalaɠa ɠula nui Aalɔn ná-doun zunui Itamaal ná-devei wu.

29 «Ɗa Melali mavofodaiti gaalu ɓalaa, eɠɛʋelei ta-wolodamaiti ti la, ta ta-ʋɛlɛyeɠeiti. 30 Ɗa zunuiti kpein gaalu, é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma.

31 «Wɛlɛ, nii ɠa maanɛai ga ti ɗa seɠe, GALA daaɠomi seɠe ʋɛlɛi ma zɔɔlaiti su: seɠe ʋɛlɛ ɲadegai ma ɓɛdɛgiti, ta ma wulu zɔkpɔiti, ta ma lɔkpalaiti, ta ma labuiti, 32 ta tɔkpalaiti ti ɠɛni ga koii ma zasai, é ɠooli ma, é ʋɛɛ ta-labuiti ba, ta ti zuzo kɔluiti, ta ta-ɠaluiti, ta sɔɔlai nii kpein fizɔgai ti loda vai zu. Wa ɛsɛ ná-sɔɔla lɛɛ la, nii a ɠɛ seɠezu. 33 Pele ɠana Melali nuiti ta-ʋɛlɛyeɠeiti ta-wotii a ɠɛ la, ta ti-losuʋɛ, é lo GALA daaɠomi seɠe ʋɛlɛi vai ʋa. Naa ɠa ta ɠɛ kɛɛzu Itamaal yeezu, nii é ga zalaɠa ɠula nui Aalɔn ná-doun zunui.»

34 Moize ta Aalɔn ta nuɓusɛiti ta-ɠundiɠiiti ti Keɠate mavofodaiti gaaluni, eɠɛʋelei ta-wolodamaiti ti la, ta ta-ʋɛlɛyeɠeiti, 35 é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma. 36 Nii gaaluni ta-wolodamaiti su, naa ɠɛni ga zunu waafelegɔ undɔfela puulɔɔlugɔ (2 750). 37 Keɠate ná-bolodamaiti kana, ti ti ɠaaluni, nii kpein é ɠɛni botii ɠɛɛzu GALA daaɠomi seɠe ʋɛlɛi wu. Moize ta Aalɔn ti ti ɠaaluni, eɠɛʋelei Ɠɔoɠɔ GALAGI ma levei veeni la Moize ya.

38 Gɛɛleson mavofodaiti ti ɠaaluni, eɠɛʋelei ta-wolodamaiti ti la, ta ta-ʋɛlɛyeɠeiti, 39 é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma, 40 nii gaaluni, eɠɛʋelei ta-wolodamaiti ti la, ta ta-ʋɛlɛyeɠeiti, naa ɠɛni ga zunu waafelegɔ undɔzita puusaʋagɔ (2 630). 41 Gɛɛleson ná-bolodamaiti kana, ti ti ɠaaluni, nii kpein é ɠɛni botii ɠɛɛzu GALA daaɠomi seɠe ʋɛlɛi wu. Moize ta Aalɔn ti ti ɠaaluni, eɠɛʋelei Ɠɔoɠɔ GALAGI ma levei veeni la ti ya.

42 Melali ná-bolodamaiti ti ɠaaluni, eɠɛʋelei ta-wolodamaiti ti la, ta ta-ʋɛlɛyeɠeiti, 43 é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma, 44 nii gaaluni, eɠɛʋelei ta-wolodamaiti ti la, naa ɠɛni ga zunu waasaʋagɔ unfelegɔ (3 200). 45 Melali ná-bolodamaiti kana, ti ti ɠaaluni. Moize ta Aalɔn ti ti ɠaaluni, eɠɛʋelei Ɠɔoɠɔ GALAGI ma levei veeni la Moize ya.

46 Leevi nuiti, Moize ta Aalɔn ta Izelayɛle nuiti ta-ɠundiɠiiti ti ti ɠaaluni, eɠɛʋelei ta-wolodamaiti ti la, ta ta-ʋɛlɛyeɠeiti, 47 é zo kona ʋuusaʋagɔ (30) ma, é li kona ʋuulɔɔlugɔ (50) ʋɔ, nii nɔpɛgi a zoloo GALA daaɠomi seɠe ʋɛlɛi ma wotii ta ɠɛɛ vai ma, 48 ti-liegɔi ɠɛni ga zunu waadɔsaʋa undɔɔlugɔ puulɔsaʋa (8 580). 49 Ɠɔoɠɔ GALAGI ɠa é devei veeni ga ti ti ɠaalu, Moize ɛsɛ ná-boti lɛɛni la, nii maanɛai é kɛ, ta kasɔi nii maanɛai é seɠe, eɠɛʋelei Ɠɔoɠɔ GALAGI ma levei veeni la Moize ya.