1 Foloi ta, nuɓusɛiti ti unsuyelii loni, ti daazeeli Ɠɔoɠɔ GALAGI ma. Siɛgi zu Ɠɔoɠɔ GALAGI naa mɛnini da, é yiiɠaawanani. Ɠɔoɠɔ GALAGI ná-abui soni ti-ʋuuzuʋɛ, é naa ɠobaʋɛ ɠala. 2 Nuɓusɛiti ti wooɠulani Moize ma, naa Ɠɔoɠɔ GALAGI maanɛɛnɛ, abui za. 3 Ti naama adaʋɛ laasei pɛɛni ga Taɓeyela (nii poluʋɛ ga «ada ɠalai»), mazɔlɔɔ ná ɠa Ɠɔoɠɔ GALAGI ná-abui soni ná ti-ʋuuzuʋɛ.

4 Nu ɠiligiti ti ɠɛni ga wɛɛinti Izelayɛle nuiti saama, naati ti-yiimaʋɛ laaveni ga gaazuɠulapɔ vaiti. Názu ɠa Izelayɛle nuiti ti tɔɔzeini la ga kpeei loa, ti ɗa ɠɛ: «Ni gá la zoo gi ɗa sua zɔlɔɔ, gi mi! 5 Gá ɠitoozu kalei zu, gi ɠɛni miizu Ezipete yooi zu, geya la ba, ta kilikamaiti, ta pasetɛkegiti, ta yaʋa laa kpaazagiti, ta yaʋa ɓaazagiti, ta yaʋa ʋɛlɛʋɛlɛgiti! 6 Niizu gá ga ɠaɲa. Gi ʋalagɛ anii kpein ma, kɛni nɔ manegi, yeenɔpɛ nɔ manegi!»

7 Manegi ma ɠazaʋigi ɠɛni eɠɛ kɔliandelegi ma ɠaei, gaazuʋɛ ɠɛ eɠɛ gulu mana maku nɛɛnɛgi, daaseigi ga ɓedɛliwume. 8 Nuɓusɛiti ti ɓena ɠula, ti vaza, ti ɗa zɛʋɛ, ti ɗa golowolo ga daamiani siɠa ɠɔtui, ɓaa ti siɠa kodai zu, ti gili diɠii zu, ti kɛ ga ɓulu ʋɛlɛʋɛlɛgi. Ná-nɛɛi ɠɛai eɠɛ ɓulu ʋɛlɛʋɛlɛgi gulɔi ba. 9 É ɠɛni ʋuuzu kpidii ti-ʋuuzuʋɛ, ta nɔɗai.

10 Pɛlɛyeɠei ɠilagilagi ʋuuni ná-seɠe ɠotai laaʋɛ, é ɗa kpeei loo. Moize nuɓusɛiti gooi mɛnini, ti ɗa wɔlɔ. Ɠɔoɠɔ GALAGI wola yiiɠaawanani. Moize wola ɠaazuɠilini. 11 É ɠɛni Ɠɔoɠɔ GALAGI ma: «Lee vaa ɲɔu ɠa è kɛɛzu ga ze, nɛ̀i gè ga ɗa-wotiɠɛ nui? Lee vaa zu gè la zaalai zɔlɔɔni è ɠaazu? Ɗa zoo ɠale è niima nuɓusɛiti kpein ta-ɠasɔi la nɔ̀un unma? 12 Nà ɠa gè niima nuɓusɛiti kpein sɔlɔɔga ɓaa? Nà ɠa gè ti ʋilɛga etea ɓaa, è ɠɛɛzu mà: ‹Ti ʋɛɛ yii la, eɠɛʋelei doun deei a ɗa ná-ɲiimiɓɔlegi zo la,› gè naa ɠɛ eyɛsu gi zeeli naama yooi zu, nii è ma minazeɠe boni ti-mɛmɛwolani bɛ, ga ɗa feezu ti ya? 13 Mini ɠa nà suai zɔlɔɔna, gè ʋa gaaɠwɛ niima nuɓusɛiti kpein ba, ti wɔlɔzu kòba, ti ɗa ɠɛ ma: ‹Suai ve gi ya, gi mi!› 14 Gè la zooga, nà ɠila ko, gè ʋa niima nuɓusɛiti kpein ta-ɠasɔi zeɠe. Gola wuiʋɛ mà! 15 Ni ɗa pɔ è zaalai la mà, zɛ̀nvui zeɠe, aisa è ʋa sò ɠani, gè mina nà-maanɔɠɔi ɠa!»

16 Ɠɔoɠɔ GALAGI ɠɛni Moize ma: «Zunu ʋuulɔfela (70) ɠaalɛ ba bɛ̀, è ti ɠula Izelayɛle ɠundiɠiiti saama, zunui niiti è ti ɠwɛɛ ga ta ga sɔɓelama nua, nuɓusɛiti ta-ɠundiɠiiti. Ʋa ga tiye GALA daaɠomi seɠe ʋɛlɛi laaʋɛ, wo lo ná ʋɔɔma, wa tiye. 17 Nà yeizu ná, gè ɓɔɛ è ʋɔ, nà ta zeɠe zɛnvui naa ʋa, nii é è ʋa, gè fe ti ya, naa ɠa a kɛ, wo niima nuɓusɛiti ta-ɠasɔi zeɠe ʋɔɔma, ɗa ɠila è mina mɔ seɠe. 18 Ɗa ɠɛ nuɓusɛiti ma: ‹À ɓɔɠɔ ɲade lina voloi vaa zu, wa ʋaazu suai miizu, tɔɔzei wo wɔlɔʋɛ Ɠɔoɠɔ GALAGI woizu ga: Ee, ni gá la zoo gi sua mi! Gi ɠɛa gaanɛ zu Ezipete yooi zu! Naa ɠa é ba, Ɠɔoɠɔ GALAGI ɠa ʋaazu suai veezu wo ya, wo mi. 19 Wa ʋaazu miizu ɠɔ, é la nɔ ga folo ɠila faa, ɓaa folo felegɔ, ɓaa folo lɔɔlugɔ, ɓaa folo puugɔ, ɓaa folo ʋuufelegɔ (20). 20 Kɛlɛ wa yɛsu miizu eyɛsu alu gila, eyɛsu é ɠula wo-zokpai zu, unpili wɔin ɗa wo zo. Mazɔlɔɔ wo Ɠɔoɠɔ GALAGI ʋɛlɛʋiliga, nii é wo zaama, wo wɔlɔa gaazu, wo ɠɛ ma: Leeni vaa zu deɠɛmu gi zeɠeai Ezipete yooi zu?› »

21 Moize gooɠaaʋoteni, é ɠɛ ma: «Niima nuɓusɛiti gè ti zaama, gá ga zunu waaundɔzita (600 000), è minazeɠe naati bɛ ga ta suai mi alu gila daawu ɲɛgɛlɛin! 22 Ta baalagiti paa ti ʋɛ, ta nikɛiti, é ʋa kula ɠɛ ti ʋa? Anɛɛ ni nu ɠa kpoloɗɛi wu ɠaleiti kpein kpɛɛzu ti ʋɛ, toɠa kula ɠɛ nɛi?»

23 Ɠɔoɠɔ GALAGI gooɠaaʋoteni, é ɠɛ ma: «Ɠɔoɠɔ GALAGI yee ɠa wola ɓuɠa ɓaa? Su la mɔ ɠoozani, ɗa naa ɠa, ni ɠite ʋe, ɓaa zɛɛ ʋe, ga ni nii nà bo, toɠa ɗa ʋilɛ su.»

24 Moize ɠulani, é Ɠɔoɠɔ GALAGI laawooi wo nuɓusɛiti ma. Naa ʋolu, é zunu ʋuulɔfelaiti (70) gaalɛɛni ba, ta-ɠundiɠiiti saama, é ti lo seɠe ʋɛlɛi maaɠoolii zu. 25 Ɠɔoɠɔ GALAGI yeini tonaɓiingi zu, é ɓɔɛ pɔ. Zɛnvui nii é ɠɛni Moize ʋa, é ta zeɠeni naa ʋa, é fe kundiɠi ʋuulɔfelaiti (70) zea. Siɛgi zu zɛnvui yeini la ti ma, ti tɔɔzeini ga ɓɔɛa eɠɛ GALA goo wo nua, kɛlɛ ti la ɠɛni lɛbini ga.

26 Zɛnvui yeini ɓalaa zunu felegɔ ma ti-ʋuuzuʋɛ, gilagi laaseigi ɠɛni ga Eledade, zɔi laaseigi ɠɛ ga Meedade. Zɛnvui yeini ti ma, mazɔlɔɔ ti-laaseigi zɛʋɛni zunu ʋuulɔfelaiti (70) saama, kɛlɛ ti la ɠɛni zeɠeni ti-ʋuuzuʋɛ, ti ʋa li seɠe ʋɛlɛi ʋɔ bɛ. Ti tɔɔzeini ga ɓɔɛa eɠɛ GALA goo wo nua. 27 Zunu loungoi ta ɓizɛni, é li, é bo Moize ma, é ɠɛ ma: «Eledade ta Meedade ta GALA ná-kulakɛlɛma vaiti bosu ade-ʋuuzuʋɛ.» 28 Nun ná-doun zunui Zozuwe, nii é ɠɛni ga Moize ná-kpɔba nui, é zo ná-doungo ziɛgi zu ma, naa ɠɛni ma: «Màliɠii, Moize, pele leʋe ti luɠɔ, ti ɓe naa ɠɛɛzu!» 29 Moize ɠɛni ma: «Ɗa mà lolo ɠulazu? Ɠɔoɠɔ GALAGI ná-Zɛnvui yei Izelayɛle nuɓusɛiti pɛ ma, ti ɠɛ ga GALA goo wo nuiti!» 30 Moize ta Izelayɛle ɠundiɠiiti ti ɠaleni ma ti-ʋuuzuʋɛ.

31 Ɠɔoɠɔ GALAGI fiilɛi leʋeni kpoloɗɛi ɠa, é ʋa ga kakalogiti, ti ʋu ti-ʋuuzuʋɛ maaɠoolii zu, é ɠaku ná ma ga folo ɠila siɛ liegɔ. Ti zooi maaɓidini, eyɛsu é lɛ ga mɛtɛlɛ ɠila sɔligɔ. 32 Nuɓusɛiti ti loni ɠɔɠɔma naama voloi, ta ma ɓidii kpein, ta mɔnɔ poluma voloi ɲɛgɛlɛin, ti ɗa kakalogiti so. Nu nɔpɛ ge la ɠɛni seɠeni, é ʋa yei kilo waasaʋagɔ (3 000) zeeɠɔɠɔwu. Ti ti zuvieni, ti ɗa fɔ ti-ʋuuzuʋɛ maaɠoolii kpein su. 33 Suai naa yɛni nɔ ti-laaʋɛ, ti la dɛ numani, eyɛsu Ɠɔoɠɔ GALAGI yiiɠaawana ti ma, é maanɔɠɔi ʋɛɛ nuɓusɛiti ba. 34 Ti naama adaʋɛ laaseigi ʋɛɛni ga Kiɓelɔte-Ɠataava (nii poluʋɛ ga «gaazuɠulapɔ ɠabayeɠeiti»), mazɔlɔɔ miná ɠa ti naati ma mɔinmɔin maaɠuluni ná, niiti daamii vai ma ɠaazuɠulapɔi ti zoni.

35 Nuɓusɛiti ti siɛi lɔɔzeini, ti zeɠe Kiɓelɔte-Ɠataava, ti ʋa Ɠaseelɔte, ti ʋu miná.