1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Izelayɛle nuiti pɔ, è ɠɛ ti ma: Siɛgi zu wo zeelizu la zooi naa zu, gè ʋaazu feezu wo ʋɛ ga wo zei ná, 3 wa ɠɛna pɔ wo zalaɠaiti kula Ɠɔoɠɔ GALAGI ʋɛ, nii abui galazu, gala zalaɠai, ɓaa minazeɠe daazeeli zalaɠai, ɓaa vebɛanii nui daai ɠisu, ɓaa zalaɠai nii é ʋilɛsu wa-ƓALA fai ma vɛti voloi ta ʋa, wa kɛ ga nikɛi, ɓaa baalagi, ɓaa bolii, nii é ɠalazu, makugi nɛai Ɠɔoɠɔ GALAGI ʋɛ. 4 Wa vebɛaniiti kpɔ zalaɠa zua ɠilagilagi pɛ ba. Wa ɓulu vukɔ ʋagɔi kilo saʋagɔ ɓɔ ba, gaayɔgai ga gulɔi litɛlɛ ɠila ta tukpɛ (1,5), 5 ta puya zalaɠai ɠɛ ga dɔɔi litɛlɛ ɠila ta tukpɛ (1,5), ni zalaɠa zuai ɠa ga baala ziʋoi. 6 Ni baala sinɛ wolai ʋe, wa vebɛanii ɠɛ ga ɓulu vukɔ ʋagɔi kilo lɔzita, gaayɔgai ga gulɔi litɛlɛ felegɔ, 7 ta puya zalaɠai ɠɛ ga dɔɔi litɛlɛ felegɔ. Naama zalaɠaiti makugi ɠa nɛɛ Ɠɔoɠɔ GALAGI ʋɛ. 8 Ni nikɛ zinɛi ɠa wo kulazu ga zalaɠai Ɠɔoɠɔ GALAGI ʋɛ, é ɠɛ ga gala zalaɠai, ɓaa minazeɠe daazeeli zalaɠai, ɓaa é ɠɛ ga ziilɛi zalaɠai, 9 wa ɓulu vukɔ ʋagɔi kilo taaʋuugɔ ɓɔ ba ga vebɛanii, gaayɔgai ga gulɔi litɛlɛ saʋagɔ, 10 ta puya zalaɠai ɠɛ ga dɔɔi litɛlɛ saʋagɔ. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.

11 «Pele ɠana wo maanɛai wo nikɛ zinɛ zalaɠai ɠula la, ɓaa baala sinɛi, ɓaa baala sinɛ yiʋoi, ɓaa boli yiʋoi. 12 Toganii mɔin ʋa ʋele-o-ʋele, vebɛanii ɠa ʋɛɛ ti ɠilagilagi ʋa. 13 Izelayɛle nu ɓɔɔɓɔgi kpein maanɛɛʋɛ é naama lɔgi zo, a ɠɛna zalaɠai ɠulaa, nii abui galazu, makugi nɛai Ɠɔoɠɔ GALAGI ʋɛ. 14 Tɔ gilagi naa nɔ ɠa a zei nuɓusɛi pɛ ma, ga faa ɠila nɔ anɛɛ wɛɛin é ga seikɔɠɔma nui, ɓaa ná-pɛlɛyeɠei wo zaama wo-mavofodaiti kpein su, ni ta pɔ ti zalaɠa ɠula, nii abui galazu, makugi nɛai Ɠɔoɠɔ GALAGI ʋɛ. 15 Nuɓusɛi pɛ ka tɔgi naa zo, ga faa ɠila nɔ toɠa la ɛsɛ gilagilagi pɛ ma, Izelayɛle nu ʋɛɛ seikɔɠɔma nu ʋa. Naa ɠa ɠɛ ga ɠɔoɠɔ tɔgi, wo-mavofodaiti kpein bɛ, ta seikɔɠɔma nui, Ɠɔoɠɔ GALAGI ɠaazu. 16 Tɔ gilagi, ta deve ɠilagi nɔ ɠa a ɠɛ ná wo pɛ bɛ, wa seikɔɠɔma nui.»

17 Ɠɔoɠɔ GALAGI ɠɛni Moize ma: 18 «Ɓɔɛ Izelayɛle nuiti pɔ, è ɠɛ ti ma: Siɛgi zu wo zeelizu la zooi zu, ʋɛ gè losu wo luɠɔ, wo li ná, 19 wo ma you zu ɓului miizu, wa gilazu zeɠe ba ga vebɛanii Ɠɔoɠɔ GALAGI ʋɛ. 20 Siɛgi zu wo ɓului mɔsu da, wa ma mɔungi zeɠe ba, wo kula bɛ̀ ga zalaɠai, eɠɛʋelei wa ɗa molo niinɛi nɔnɔi zeɠe ba la. 21 Vebɛanii ɠana, wa fe Ɠɔoɠɔ GALAGI ʋɛ, é ɠula wa-vuului ná-botii ɠɛa mɔungi zu, wo-mavofodaiti kpein su.

22 «Ni wa koto ɠɛɛna, wo la gaaɠilini ma, wo la tɔgi niiti kpein soni, niiti Ɠɔoɠɔ GALAGI ti veai Moize ya, 23 é zo naama voloi ma Ɠɔoɠɔ GALAGI deveiti feeni la, eyɛsu é li wo-mavofodaiti pɔ ʋelela ʋelei, 24 ni faaɠaazagi a ɠɛɛna, é la ɠɛɛni ga gaaɠilima, é ɠɛ ga nuɓusɛiti kwɛɛtala zu vaa, nuɓusɛi kpein ka nikɛ zinɛ ɓokpa gila kula ga zalaɠai, makugi nɛai Ɠɔoɠɔ GALAGI ʋɛ, é ɓɔ vebɛanii ʋa, ta puya zalaɠai, eɠɛʋelei deveai la tɔgi zu, ta boli zinɛi, nii a ɠɛ ga koto gba zalaɠai. 25 Zalaɠa ɠula nui ɠa kotoi gba Izelayɛle nuɓusɛiti kpein bɛ, suvaa ɠa yɛ ti ʋɛ, tɔɔzei faaɠaazagi ʋe, ti kɛai, ti la gaaɠilini ma. Siɛgi zu ti ʋaazu la ga ta-zalaɠai, nii abui galazu, Ɠɔoɠɔ GALAGI ʋɛ, ta koto gba zalaɠai Ɠɔoɠɔ GALAGI ɠaazu, tɔɔzei ta-vaaɠaazagi vaa ʋa, ti kɛai, ti la gaaɠilini ma, 26 suvaa ɠa yɛ Izelayɛle nuɓusɛiti kpein bɛ, ta seikɔɠɔma nuiti, mazɔlɔɔ nuɓusɛiti ti naama vaaɠaazagi ɠɛɛʋɛ, ti la gaaɠilini ma.

27 «Ni nu ɠila kpe nɔ ʋe, é kotoi ɠɛai, é la gaaɠilini ma, toɠa kona gila boli zaai ɠula ga koto gba zalaɠai. 28 Zalaɠa ɠula nui ɠa kotoi gba Ɠɔoɠɔ GALAGI ɠaazu, nui naa ʋɛ, nii é kotoi ɠɛai, é la gaaɠilini ma. Siɛgi zu é kotoi gbazu la bɛ, naa zuvaa ɠa yɛ bɛ. 29 Siɛgi zu nu a koto ɠɛɛna la, nii é la gaaɠilini ma, tɔ gilagi nii nɔ ɠa a zei nui pɛ ma, Izelayɛle nuiti ti ga zou lointi, ta seikɔɠɔma nuiti.

30 «Kɛlɛ nu-o-nu, nii a gaaɠili ma, é kotoi ɠɛ, Izelayɛle nui, é ga zou loin, ɓaa seikɔɠɔma nui, é Ɠɔoɠɔ GALAGI lɔɠɔi ɠoloɠologa, kpe ka leʋe ná-nuɓusɛiti ba, é ɠula ti zaama. 31 É GALA daawooi ʋɛlɛʋiliga, é ná-deveiti koloɠolo, kɛni kpe ge leʋe ná-nuiti ba. Ná-faaɠaaza golai ma ɠasɔi ɠa la unma.»

32 Tɛi Izelayɛle nuiti ti ɠɛni teʋebai zu, ti zunui ta ɠaani, é ɗa koʋii ɠale dooɠo foloi. 33 Tɛiti ti soni ná, ti ʋaani la Moize ʋɔ ta Aalɔn, ta nuɓusɛiti kpein pɔ. 34 Ti makɛni ma ga pagɔ, tɔɔzei faa nɔpɛ ge la ɠɛni dɛ leveni, é ʋa ʋilɛ naa ʋa, nii a zoo é ɠɛ la. 35 Ɠɔoɠɔ GALAGI ɠɛni Moize ma: «Ta naama zunui ʋaa. Wa lii la wo-ʋuuzuʋɛ ʋoluʋɛ, nuɓusɛi kpein ge sɔ ga kɔtui.» 36 Názu ɠa nuɓusɛiti ti ɠulani la la, ti-ʋuuzuʋɛ ʋoluʋɛ, ti sɔ ga kɔtui, eyɛsu é za, eɠɛʋelei Ɠɔoɠɔ GALAGI ma levei veeni la Moize ya.

37 Ɠɔoɠɔ GALAGI ɠɛni Moize ma: 38 «Bo Izelayɛle nuiti ma ga, tiya-o, ti-mavofodaiti-yo, ti geze yiizayiizagi lo ta-ʋɛɛkɔma zeɠeiti goizuʋɛ, ta geze ɠaali ɓiinii. 39 Siɛgi zu wo geze yiizayiizagiti kaazu la, wa ɠizɛ Ɠɔoɠɔ GALAGI ná-deveiti su, wo ɗa kɛ, wo la ɓɔɠɔ ɠakaga, wo ʋa ʋilɛ wo yiima vaiti polu, ta wa-ɠaazuɠulapɔiti, niiti ti wo lɔɔzu wooʋaladai zu. 40 Naazu wa ɠizɛ nà-deveiti kpein su, wo ɠolo ti ʋɛ. Wa ɲade wa-ƓALAGI ʋɛ. 41 Nà ga Ɠɔoɠɔ GALAGI, wa-ƓALAGI, nii é wo ɠulaai Ezipete yooi ʋa, ga é ɠɛ ga wa-ƓALAGI. Ungo, nà ga Ɠɔoɠɔ GALAGI, wa-ƓALAGI.»