1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Niima levei laazeeli Izelayɛle nuiti ma, è ɠɛ ti ma: Wa dama kpɛ, wo nɔ̀nɔ ma vebɛanii ve, yeeɠɛɠala ʋagɔi zu, é ga nà-zalaɠaiti, daamianigiti ti ɠalazu abui ɠa, ti bɛ̀ ga ani maku nɛai. 3 Ɗa ɠɛ ti ma: Folo-o-folo, wa kona gila baala sinɛ felegɔ ɠula, nii nɛɛʋuzu la ba, Ɠɔoɠɔ GALAGI ʋɛ ga gala zalaɠai, nii abui galazu. 4 Ɗa baala ziʋo ɠilagi ɠula ga zalaɠai sobui, è zɔɔma ʋaala ziʋoi ɠula kpɔkɔi, 5 naa ʋɛɛ vebɛanii ʋa, nii é ga ɓulu vukɔ ʋagɔi kilo saʋagɔ, gaayɔgai ga wolive wulɔ ʋagɔi litɛlɛ ɠila ta tukpɛ (1,5). 6 Gala zalaɠai ɠana, folo-o-folo, nii é ɠɛɛzu ɠulazu, eɠɛʋelei deveai la Sinayi gizei ma. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ. 7 Wa puya zalaɠai ɓɔ baala ziʋo mɔungi ʋa, ga dɔɔ ɓaagi litɛlɛ ɠila ta tukpɛ (1,5), ada ɲadegai zu ɠa wa puya zalaɠai naa ɠula ná, ga dɔɔ ɓaagi Ɠɔoɠɔ GALAGI ʋɛ. 8 Baala ziʋoi velesiɛi ɠa ɠula ga zalaɠai kpɔkɔi, vebɛanii ta puya zalaɠai, niiti ti ɓɔgai sobu gelei ʋa, naa ma ziiti nɔ ɓɔ ba. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.

9 «Dooɠo foloi, wa baala ziʋo felegɔ ɠula ga zalaɠai, niiti ti kona gila nɔ ɠɛa, nɛɛʋuzu nɔpɛ ge la ba, è vebɛanii ʋu ma ga ɓulu vukɔ ʋagɔi kilo lɔzita, gaayɔgai ga gulɔi, puya zalaɠai ʋu ma. 10 Wa gala zalaɠai naa ɠula dooɠo foloi ɠilagilagi. Naa kpein ge ɓɔ gala zalaɠai ʋa, é ɠulazu folo-o-folo, ta ná-puya zalaɠai.

11 «Alugi laaɠulazuʋɛ, wa nikɛ zinɛ ɓokpa felegɔ ɠula ga gala zalaɠai Ɠɔoɠɔ GALAGI ʋɛ, ta baala sinɛ ɠila, ta kona gila baala sinɛ lɔfela, nɛɛʋuzu mina ɠɛ ti ʋa. 12 Wa vebɛanii ʋɛɛ gala zalaɠa zuaiti ba, toɠa ɠɛ ga ɓulu vukɔ ʋagɔi, gaayɔgai ga gulɔi: kilo taaʋuugɔ nikɛ zinɛi ɠilagilagi ʋɛ, ta kilo lɔzita baala sinɛi ʋɛ, 13 ta kilo saʋagɔ baala ziʋoi ɠilagilagi ʋɛ. Gala zalaɠai ʋe, zalaɠai nii abui galazu, makugi nɛai Ɠɔoɠɔ GALAGI ʋɛ. 14 Puya zalaɠaiti ta ɠɛɛzu ga dɔɔi litɛlɛ saʋagɔ, é ʋɛɛ nikɛ zinɛ ɠilagi ʋa, litɛlɛ felegɔ ʋɛɛ baala sinɛi ʋa, ta litɛlɛ ɠila ta tukpɛ (1,5) ge ʋɛɛ baala ziʋoi ʋa. Gala zalaɠaiti kana, ta ɠɛ ɠulazu alugi laaɠulazuʋɛ, alu-o-alu, konagi zu. 15 Wa boli zinɛi ɠula ɓalaa ga koto gba zalaɠai Ɠɔoɠɔ GALAGI ʋɛ. Naa kpein ge ɓɔ gala zalaɠai ʋa, é ɠulazu folo-o-folo, ta ná-puya zalaɠai.

16 «Alu mɔungi ma volo puugɔ maazu naanisiɛi (14) ɠa ɠɛɛzu ga Ɠɔoɠɔ GALAGI ná-Pakegi.

17 «Alugi naa ma volo puugɔ maazu lɔɔlusiɛi (15) ɠa fɛtii lɔɔzeizu ma. Ɓului nii lɛʋɛ la su, naa ɠa wa ɠɛ miizu eyɛsu folo lɔfela. 18 Folo mɔungi, wa gaalɛba ɲadegai wo, wo la boti nɔpɛ kɛa, eɠɛʋelei wa ɗa kɛ la, 19 wa nikɛ zinɛ ɓokpa felegɔ ɠula ga gala zalaɠai Ɠɔoɠɔ GALAGI ʋɛ, ta baala sinɛ ɠila, ta kona gila baala sinɛ lɔfela, nɛɛʋuzu mina ɠɛ ti ʋa. 20 Wa vebɛanii ʋɛɛ gala zalaɠa zuaiti ba, toɠa ɠɛ ga ɓulu vukɔ ʋagɔi, gaayɔgai ga gulɔi: kilo taaʋuugɔ nikɛ zinɛi ɠilagilagi ʋɛ, ta kilo lɔzita baala sinɛi ʋɛ, 21 ta kilo saʋagɔ baala ziʋoi ɠilagilagi ʋɛ. 22 Wa boli zinɛ ɠila kula ga koto gba zalaɠai, naa ɠa a kɛ koto gba vai ɠɛ wo ʋɛ. 23 Naati kpein ta laazu gala zalaɠai maazu, é ɠulazu sobu-o-sobu. 24 Folo-o-folo, folo lɔfela laawu, wa naama laamianigiti kula, nii abui galazu, makugi nɛai Ɠɔoɠɔ GALAGI ʋɛ. Wa ti ɠula ga zalaɠai, é ɓɔ gala zalaɠai ʋa, é ɠulazu folo-o-folo, ta ná-puya zalaɠai. 25 Foloi lɔfelasiɛi, wa gaalɛba ɲadegai wo, wo la boti nɔpɛ kɛa, eɠɛʋelei wa ɗa kɛ la.

26 «Zooi ʋa lɔnɔ mɔungiti ma ɠoozunɛɛ voloi, wo ʋaazu vebɛanii veezu la Ɠɔoɠɔ GALAGI ʋɛ, ga ani niinɛiti, dɔɔɠɔiti ma vɛtii, wa gaalɛba ɲadegai wo, wo la boti nɔpɛ kɛa, eɠɛʋelei wa ɗa kɛ la. 27 Wa nikɛ zinɛ ɓokpa felegɔ ɠula ga gala zalaɠai, ta baala sinɛ ɠila, ta kona gila baala sinɛ lɔfela, makugi nɛai Ɠɔoɠɔ GALAGI ʋɛ. 28 Wa vebɛanii ʋɛɛ gala zalaɠa zuaiti ba, toɠa ɠɛ ga ɓulu vukɔ ʋagɔi, gaayɔgai ga gulɔi: kilo taaʋuugɔ nikɛ zinɛi ɠilagilagi ʋɛ, ta kilo lɔzita baala sinɛi ʋɛ, 29 ta kilo saʋagɔ baala ziʋoi ɠilagilagi ʋɛ. 30 Wa boli zinɛi ɠula ɓalaa, naa ɠa a kɛ koto gba vai ɠɛ wo ʋɛ. 31 Wa suai niiti kula, nɛɛʋuzu mina ɠɛ ti ʋa, ta ta-ʋuya zalaɠaiti. Naa kpein ge ɓɔ gala zalaɠai ʋa, é ɠulazu folo-o-folo, ta ná-vebɛanii.