29
1 Zunui nii maanɛai ga zelii lo ma, é ɗa ɠɔgi ɓaa ga,
toɠa ɠoloɠolo ga kulafilibai, sosu la ɠaa.
2 Telebo nuiti ta mɔinna, nuɓusɛiti koozu ɠa ɗa nɛ,
kɛlɛ nu ɲɔiti ta zeina kundiɠilai zu, nuɓusɛiti ta ɗa kpalagi wo.
3 Zɔi é pɔ ga é ziɛ ga ɠimalai, naa ɠa ɗa kɛɛɠɛ ɠoozunɛ,
kɛlɛ zɔi é ʋilɛsu koloɠolo anzanuiti polu, naa ɠa ɗa ná-naavoloiti koloɠolo.
4 Masagi ɠa ɗa ná-zooi ɓɛtɛ, siɛgi zu é ziɛzu la ga telebodai,
kɛlɛ a lobɛanii maalolina, toɠa naa ɠoloɠolo.
5 Nui é bɔɔlaiti tɛɛzu su,
toɠa balii laazu kɔɠɔi wu.
6 Faa ɲɔu ɠɛ nuiti ta ɗa ɠɛ ga kasoɠa nui, tiya ɓɔɠɔi ta-lɔ koloɠologiti faa zu,
sɔle nuiti ta ɗa pilɛ sɔlɔɔ, ti ɠoozunɛ.
7 Telebo nui naa ɠwɛɛ, nii maanɛai é ɠɛ bala nuiti bɛ,
kɛlɛ naama ɠi ge la faa ɲɔu ɠɛ nui ma.
8 Ɲɛɛɠulasu nuiti ta ɗa kpɔɛ abui ʋili taa wolai zu,
kɛlɛ ɠima nuiti ta ɗa ziiɠaawanai ɠaayei.
9 Ni ɠima nui ta ɠimalala nui ta ɠɛna tukpɔi ma,
ɠimalala nui yiiɠaawanaʋa, ɓaa é ɲɛɛi wo, é la ɓɔlɔa.* Tati pelei taɠili ɓalaa ka ga niiti: toɠa la nɔ yiiɠaawana, ɓaa é ɲɛɛ, tama nu la ɓega pɛ.
10 Ɲama ʋuu nuiti ta ɗa telebo nui wɔinzeɠe,
kɛlɛ sɔle nuiti ta ɗa ɓaa zɛnvui maazu.
11 Ɠimalala nui ɠa ɗa ná-ziiɠaawana vaiti kpein kula kɛlɛma,
kɛlɛ ɠima nui ɠa ɗa ɓɔɠɔ zo, é la nɔnɔiti kula kɛlɛma.
12 Siɛgi zu kundiɠii woilosu da zɛɛ ɓɔɛiti ma,
niiti ti botii ɠɛɛzu zeewu, naati pɛ ta ɗa ɠɛ ga wooʋalada nuiti.
13 Bala nui ta maanɔɠɔ nui, ti ɓɔgɛ faa ɠila ma:
Ɠɔoɠɔ GALAGI gaazuʋɛ veeʋɛ ti felegɔ pɛ bɛ, ga ti ɗa wɛlɛ la.
14 Masagi nii é zobobɛlala nuiti ta-lukpɔi ɠaaleʋezu ga gaamai,
ná-masadai ɠa ɗa yɛ zea ɠɔ.
15 Kpakɔi ta zelilomai, ta ɗa ɠimalai ve,
kɛlɛ zunu loungoi pilɛgai ɓɔɠɔ yeema, toɠa ɗa dee unfe.
16 Siɛgi zu nu ɲɔiti ti mɔinzu la, tɔ koloɠologi zu ɠa ɗa wɔɔlɔ,
kɛlɛ telebo nuiti ta ɠɛ ga ta-loobui ma zeelei.
17 Ni ɗa è-loun zunui maaɠolona, é la è yiizoolɛ vaa ɠɛa,
kɛlɛ toɠa è yiilɛi ga gola.
18 Siɛgi zu GALA ge la kulakɛlɛma wosu da, nuɓusɛiti ta ɗa eteai ziɛ faazupui zu.
Undaanɛɛ nu ɠa ga naama nui, nii naazu, é ɠolozu GALA ná-tɔgi ʋɛ.
19 Nu la ɗa ga botiɠɛ nui maaɠolo ga kpɔɛzuɠulai,
mazɔlɔɔ anɛɛ ni toɠa naa ɠaaɠaazu, nii é wosu ma, é la ɠoloa ɲɛgɛlɛin.
20 Ɗa nu ɠaana, é ɗa ɓɔɛ, é la ɠigaiziɛzu,
nu ɠa ɠito ɠimalala nui ʋa, é leʋe tɔun ba.
21 Ni nu a botiɠɛ nui laanɛɛna ná-nu niinɛlai zu,
toɠa gaaɓela ga kololalai.† Tati pelei taɠili ɓalaa ka ga nii: toɠa gaaɓela ga é ɓɔɠɔ ʋɛtɛ ga pɛlɛ wu loun zunui ɠila.
22 Ziiɠula nui ɠa ɗa kpɔɛi leʋe,
zɔi ziiɠulazu valafala, naa ɠa ɗa tɔ koloɠologiti kɛ.
23 Wasogi ɠa ɗa nui maayei,
kɛlɛ ɓɔɠɔmaayeii ɠa ɗa nui wɔɔlɔ.
24 Zɔi é yeezeizu unma nui wu, naa ɠa ɗa ɓɔɠɔ nimiza,
tɔɔzei é foovooi ɠwɛɛ, é naama nui laalɔɠɔma, nii é ɠɛlɛzu ga é mina ʋa, é ʋa zeele wooi wo.‡ Maanɛɛnɛi é wosu foovooi ba kɛlɛmaʋɛ kpaun, ga ti sɔba nui ɠula kɛlɛma. Wɛlɛ ʋɛti: Lev 5:1; TɠN 17:2.
25 Ɗa ɠɛna lua nuiti ba, toɠa ga balii,
kɛlɛ zɔi é ɠalivaazu Ɠɔoɠɔ GALAGI ma, naa yiilɛiʋɛ.
26 Ma mɔinmɔin ka ná, ti ɗa kpɔbai ɠaiziɛ ta-ɠundiɠii ya,§ ti ɗa kpɔbai ɠaiziɛ ta-ɠundiɠii ya: Tati pelei taɠili ɓalaa ka ga nii: ti pɔ ga totuɠɔi ti-wooi mɛni ɓaa totuɠɔi yeezei ti wu.
kɛlɛ ɛsɛ maalobo fai ɠa Ɠɔoɠɔ GALAGI ya.
27 Telebotala nuiti wɔin ɠa ɗa zeɠe telebo nuiti ma,
sɔle nuiti maayoseɠeʋɛ faa ɲɔi ɠɛ nuiti bɛ.
*29:9 Tati pelei taɠili ɓalaa ka ga niiti: toɠa la nɔ yiiɠaawana, ɓaa é ɲɛɛ, tama nu la ɓega pɛ.
†29:21 Tati pelei taɠili ɓalaa ka ga nii: toɠa gaaɓela ga é ɓɔɠɔ ʋɛtɛ ga pɛlɛ wu loun zunui ɠila.
‡29:24 Maanɛɛnɛi é wosu foovooi ba kɛlɛmaʋɛ kpaun, ga ti sɔba nui ɠula kɛlɛma. Wɛlɛ ʋɛti: Lev 5:1; TɠN 17:2.
§29:26 ti ɗa kpɔbai ɠaiziɛ ta-ɠundiɠii ya: Tati pelei taɠili ɓalaa ka ga nii: ti pɔ ga totuɠɔi ti-wooi mɛni ɓaa totuɠɔi yeezei ti wu.