Tukpɔɠaaleʋe Nuiti.
15.
Yeeɠɛɠalai tanigaa leʋegai ma, moloi é ga ɓeleegi, naa leʋe ziɛgi zu, Samesɔn liini laaliizu anzai ma ga boli yiʋoi, é ɗa ɠɛ: «Nà lɛɛzu ànzai ná-pɛlɛi wu.» Kɛlɛ anzai kɛɛɠɛ la ɠɛni kɛɛni, é ʋa lɛ ná. 
Naa ɠɛni ma: «Gè ɠɛa laani da ga wɔin la è ma, gè fea è-wɔɔlai ya ga anza. Deɠe anzanui la ʋani, é ʋa leʋe tɔun ba ɓaa? Naa zeɠe tɔun potogi zu.» 
Samesɔn ɠɛni ti ma: «Niizu gè la mɔ ɠɛa ga sɔba nu Filiseti nuiti ta-vaa zu, ni nà faa ɲɔu ɠɛɛna ga tiye.» 
Samesɔn liini, é koʋe unsaʋagɔ (300) zo, é felefelegiti wɔɔngiti gili ɓɔɠɔ ʋa, é sɔmɔgi ɠili ti-wɔɔn felegɔiti saama. 
É abui loni sɔmɔgiti ba, é yeeɓe koʋeiti ba, ti ʋilɛ Filiseti nuiti ta-moloiti su, nii é ga ɓeleegi, ma ɠiliiti ta ma mɔɔiti ti ɠala, ta wolive ɓeleiti. 
Filiseti nuiti ti ɠɛni ma: «Ɓɛ ɠa é niima vai ɠɛai?» Ti ɠɛni ti ma: «Samesɔn ʋe, Timena nui nɛkoi, tɔɔzei naa anzai zeɠeʋɛ, é fe bɔɔlai ya ga anza.» Filiseti nuiti ti liini, ti anzanui naa ɠala, ta kɛɛɠɛ. 
Samesɔn ɠɛni ti ma: «Zekana wo kɛɛzu la ɓaa? Gè la mɔ looɠoga eyɛsu gè nɔnɔ ʋotokula wo ma.» 
É laalɛɛni ti wu, é ti zuloɠani gola. Naa ʋolu, é li é zei Etame pugi zu. 
Filiseti nuiti ti liini ti ʋu Zuda yooi zu, ti vaza Leyi ʋele. 
Zuda nuiti ti gaazaɠagi woni, ti ɠɛ ma: «Lee vaa zu wo lɛai gi laalɔɠɔma?» Ti ɠɛni ti ma: «Gi ʋaaʋɛ ga gi Samesɔn ɠili, gi naa ʋotokula, nii é kɛai ga giye.» 
Naa ɠa é kɛɛni, Zuda yooi zu zunu waasaʋagɔ (3 000) liini Etame pugi zu, ti ɠɛ Samesɔn ma: «È la suɠwɛɛ ɓaa ga Filiseti nuiti ta zeini ade unda? Leeni ɠa è kɛai ga giye?» É ti wooɠaaʋoteni, é ɠɛ ti ma: «Gè ti zogɛ, eɠɛʋelei ti sògai la.» 
Ti ɠɛni ma: «Gi ʋaaʋɛ gi è ɠili, naa ʋolu gi è ve Filiseti nuiti zea.» Samesɔn ɠɛni ti ma: «À ɠona bɛ̀, ga wo la pàa wa ɓɔɠɔi.» 
Ti gooɠaaʋoteni, ti ɠɛ ma: «Ɓa-o, gá pɔ nɔ ga gi è ɠili, gi è leʋe ti ʋɔ, kɛlɛ gi la è ʋaazu.» Ti gilini ga galu niinɛ felegɔ, ti kula pugi zu. 
Siɛgi zu ti zeelini la Leyi, Filiseti nuiti ti kpeei looni ga koozunɛɛi, ti daaɠomi. Ɠɔoɠɔ GALAGI ná-Zɛnvui yeini Samesɔn ma gaamanɔ. Galuiti ti ɠɛni zee ʋa, naati ti ɠɛni eɠɛ gezei, nii abui galaai, gili ɠaluiti pɛ ti ʋuuni ya, ti ɠula zee ʋa. 
É soovalegi nɛkpɛ ɠae niinɛi ɠaani, é yeemaaleni, é seɠe, é zunu waagila (1 000) paani ga naa. 
Samesɔn ɠɛni ma: «Gè poomaiti gaalɛ ba ga soovale nɛkpɛ ɠae gilagi, ungo gè zunu waagila (1 000) paa, ga soovale nɛkpɛ ɠae gilagi.» 
Siɛgi zu é ɓeni la ga ɓɔɛ, é soovale nɛkpɛ ɠaegi ʋilini ya. Ti naama adaʋɛ laasei pɛɛni ga Lamate-Leyi. 
Kpɔɔle wɔin wola ɓɔini da, é wooɠulani Ɠɔoɠɔ GALAGI ma, é ɠɛ: «Ɗa ɠa è kizo faa wolai nii ɠɛai ga zèei, nɛ̀i gè ga ɗa-wotiɠɛ nui, niizu nà ga za ga kpɔɔle wɔin, nà ga loo tatipɛlɛʋolulala nuiti zeezaama?» 
Gaamanɔ, GALA ge kɔtui ma yeɠei laalaoni, nii é Leyi, ziɛi ɠulani ná, Samesɔn ɓɔɔleni, ziilɛi tɔɔn, ziila é zɛbɛi zɔlɔɔ ʋolu. Naa ɠa é kɛɛni ti ziɛungi naa laasei pɛɛni ga En-Ɠakɔlee, naa ná-ziɛungi, toɠa dɛ ná zaaɠaza Leyi. 
Samesɔn ɠɛni ga tukpɔɠaaleʋe nui Izelayɛle yooi zu, Filiseti nuiti ta-ziɛgi zu kona ʋuufelegɔ (20) laawu.