Tɛnɛ Faalaaliiti.
4.
Dòun zunuiti, à woilo ɠɛɛɠɛ lɛnɛ gooiti ma, à woilo ga pagɔ, wo keleɠelegi ɠwɛɛ. 
Nà kala pagɔ veezu wo ya, à mina nà-kala gooiti pili ya. 
Gè ɠɛni kɛ̀ɛ ya, ga doun zunu ɠilagi, dèe nɛ̀ɛni ʋɛ gola, eɠɛ doun zunu ɠila kpegi. 
Kɛ̀ɛ ɠɛni kàlasu, é ɗa ɠɛ mà: «Dàawooiti so ga è-yii pɛ, nà-deveiti so, ɗa zɛnvui wo. 
Ɠimalai ɠaiziɛ, ta keleɠelegi, mina yeema dàawooiti ma, mina zeɠe ti ʋa. 
Mina ɠɛlɛ ɠimalai ʋa, toɠa ɓɔ è ʋa, nɛɛ ʋɛ, toɠa ɓaa è maazu. 
Wɛlɛ ɠimalai lɔɔzeigi ʋa: Ɠimalai ɠaiziɛ, keleɠelegi ɠaiziɛ ga è zɔlɔɔ ganii kpein. 
Bɔɔlɔ, toɠa è wuzeɠe, ni ɗa ɠilina ba, toɠa ɠɛ ga lɛbiya è ʋɛ. 
Toɠa bɔɔlɔ pagɔi lɔ è unba, é è maaɠili ga masa bɔɔlɔ maayikiai.» 
Woilo dòun zunu, dàawooiti gaaɠa, naazu, ɗa è-zii zuɠooza. 
Gè è ɠalagɛ ga ɠimalai ma ʋelei, gè lo è luɠɔ telebo peleiti su. 
Ni ɗa ɠɛna ziaa ɠana, è-ɠɔɠɔ zu la ɠataga, ni ɗa ɠɛna ɓizaa, è-ɠɔɠɔi la ziɠaa. 
Ɠili kpaan è maaɠolo vai ʋa, nii è sɔlɔɔgai, mina too ya, yɛ ɠilini ba, mazɔlɔɔ naa ɠa è-yɛnvui su. 
Mina ziɛ ga nu ɲɔiti ta-ʋelei, mina ʋilɛ naati kɛʋelei ʋolu, niiti ti faa ɲɔi ɠɛɛzu. 
Maaɠooza ta-ʋelei ʋa, mina ziɛ la, zeɠe ba, è ziɛ yɛ. 
Mazɔlɔɔ faa ɲɔu ɠɛ nui naati, ti la ɲia, ni ti la faa ɲɔi ɠɛɛni, ta ʋala ɲiimɛnii ma, ni ti la nui ta looni. 
Mazɔlɔɔ ti-ɠɔnɔgi ɠa ga faa ɲɔi, ta-ɓɔɔle lɔɔi ɠa ga suɲɔulai. 
Telebo nuiti ta-ʋelei ɠɛɛʋɛ eɠɛ, geelaalaosu wozakalagi, nii ma wozakalagi ɠaa yɛsu wɔɔlɔzu, eyɛsu foloi tɛ. 
Faa ɲɔu ɠɛ nuiti ta-ʋelei ɠɛɛʋɛ eɠɛ kpidii, ti la ti ɠɔɠɔziɠa ani ɠwɛɛ. 
Dòun zunu, woilo dàawooiti ma, woilo ga pagɔ kpɔ̀ɛ wooiti ma. 
Mina yeema ti ma, kɛlɛ makɛ ti ma è-yiimaʋɛ. 
Mazɔlɔɔ niiti ti yeezeizu ti wu, ta ʋa ga zɛnvui naati pɔ, ti kɛdɛyai ve ti-ɓusɛi ya. 
Makɛ è-yii ma, é leʋe anii pɛ ba, mazɔlɔɔ toɠa zɛnvui wo fai ma ungi su. 
Mina ɓe è-laaʋɛ ʋa, é ʋa ɗa zɛɛiti bo, mina è-lakɔlɔgiti zɛ ná, ti ʋa ɗa yaava ɓɔɛiti bo. 
Ɠaazulo ɠakala ʋelei ʋa, wɛlɛ ɠakalaʋɛ ga pagɔ. 
Pelei zuɓɛtɛ, ʋɛ è ziɛzu ná, pelei è laai da, ziɛ ga naa. 
È mina zeɠe ba, è ʋa li ga yeezazu ʋelei, ɓaa ɠɔʋɛzu ʋelei, ɠɔɠɔɠula faa ɲɔu ɠɛɛ vai zu.