Tɛnɛ Faalaaliiti.
6.
Dòun zunu, ni è ɓɔɠɔ ɠɛɛʋɛ ga zeelagai è-wɔɔlai ta maaɠuye vai zu, ni è minazeɠeni è-zeiɲɔɠɔi ʋɛ, 
ni è ɓɔɠɔ ɠilia ga è-laawooiti, ni è ɓɔɠɔ ɠɛa ga kasoɠa nu ga è-laawooiti maaʋele, 
naa ma, nii ɗa kɛ dòun zunu, ɓɔɠɔ vie, tɔɔzei è loa è-zeiɲɔɠɔi yeezaama, li è ɓɔɠɔmaayei bɛ, è ɓɔi da ga maanɛɛnɛi. 
Mina va bu, ɲiimɛnii ʋa lɔ è-ɠaazu, ɓaa è-ɠaazuɠɔlɔgiti ti ʋa pɛɛ ma mɛɛ. 
Ɓɔɠɔ vie ga dopai ɠɛʋele, é ɠulazu dosoiti zea, eɠɛʋelei wɔnii a ɗa kɛ la, é ɠula wɔni zo nui ná-tumɔi zu. 
Ɗɛi è ga ɲaka nui, li lɛɛ pupuiti pɔ bɛ, è ti ʋɛtɛ, ti ziɛ ʋeleiti sumɔ, è ɠigi zɔlɔɔ. 
Ta-wɛlɛma nu la ná, ta-ɠalamɔn la ná, ta-ɠundiɠi la ná, 
ta ɗa ti-ɠɔnɔgi ɓɛtɛ, foɠo undaaɠulazuʋɛ, ti ti-laamianigi ɠaalɛ ba molo leʋe ziɛgi zu. 
Ɲaka nui, ɗa yɛsu laani, eyɛsu yeelɛ? Siɛgi ɓɛgele ɠa è wuzeɠezu la, è ɠula ɗa-ɲiimɛnii zu? 
È lago ɲi, è lago ɠaazuʋɛɛ ma, è yeeiti da ɓɔɠɔ ma, è lago zaamale, 
kɛlɛ naama ziɛgi zu, baladai ɠa ɠula è viliba eɠɛ siɛziɛ nui, nimizai zeeli è ma eɠɛ kɔɔɠɔ nui. 
Nu ɲakai ɠa ga telebotala nui, toɠa a ɗa li ga zɛɛ ɓɔɛiti boga, 
é ɗa ɠaazuʋɛ loo ma, é ɗa ɠɔɠɔiti gaaloɠa, é ɗa poogiti kɛ ga yeeɓeɠaiti, 
yaava ɠisiɛi nɔ ɠa é ziimaʋɛ, faa ɲɔi nɔ ɠa a ɗa ɠisiɛ su yeenɔpɛ, é ɗa kpɔɛleʋe vai ɠɛ. 
Naa ɠa é ba, koloɠolo fai ɠa ɠɛ ga kulafilibai, naa ɠa ba ɠila nɔ, é ɠoloɠolo, ma zale la ná. 
Faa lɔzita ɠa ná, nii bɛlɛɠulaai Ɠɔoɠɔ GALAGI ʋɛ, toɠa vɔlɔ ga dɔfela, niiti ti ga maaɲɛɛi: 
gaazulɛɛ ɠaazui, zɛɛ wo nɛgi, nui sɔ ge la ba, nuiti ti naa ma ɲamai ʋuuzu ga ti-yeeiti, 
nu yii nii é ɠisiɛzu telebotala vaiti su, nu ɠɔɠɔiti ti zuvilaai ɓizɛzu faa ɲɔu ɠɛɛzuʋɛ, 
zɛɛ zeelei, é zɛɛ zeele wooi wosu, ta zɔi é kpɔɛi leʋezu ɠɛɛɠɛlointi zɔɠɔzu. 
Dòun zunu, ɠizɛ è-ɠɛɛ ná-deveiti su, mina è-lee ná-tɛnɛ gooiti too ya! 
Makɛ ti ma yeenɔpɛ è-yiimaʋɛ, ti zɛlɛ ɠɔbu. 
Ta lo è luɠɔ ɗa-ziɛi zu, ti è makɛ è-laazuʋɛ, ti yɛpɛ è ʋɔ, ɗa wuunna. 
Mazɔlɔɔ devei ɠa ga lanboi, kalagi ɠɛ ga wozakalagi, zelilogi ta maaɠoloi, ta ga pelei é lo zɛnvui ʋa. 
Ta è makɛ wɛɛnziɛ anzanui ziɛ ʋelei ma, ta è-zeiɲɔɠɔi anzai ná-kpɔɛ nɛɛnɛgi ma. 
Mina ɠaazuɠula ná-pagi ʋa è-yiimaʋɛ, mina ɓɔɠɔ yɛ ná, é ʋa è zeɠe ga gaazuɠɔlɔgiti. 
Mazɔlɔɔ koloɠolo anzanui maaʋele ma, ɗa ʋala ɗa-ɓulu ɓuɠai nɔ ma, kɛlɛ anzanui é zini bɛ, ɗa ɠɛ è ʋala è-yɛnvui pɛ ma. 
Nu ɠa zoo nɛi é abui lɔ ná-zuvai zu, é la ná-seɠeiti kpein gala ɓaa? 
Nu ɠa zoo nɛi é ziɛ abulekai ɠa, é la kɔɠɔiti gala ɓaa? 
Zenɔ ɠana é la, ga naama nui nii é ʋilɛsu seiɲɔɠɔi anzai ʋolu, a vɔɔɠuna ba, salalalai la yɛga. 
Nu la unma nui ʋɛlɛʋiliga, nii é unmai wosu ga é kogi zulaave, tɔɔzei ani la zea, nii a mi. 
Anɛɛ naa ʋe, ni ta sona, maanɛɛʋɛ é potogi ve ga seizu lɔfela, ani ʋagɔi kpein é ná-pɛlɛi wu, toɠa naa pɛ fe. 
Kɛlɛ zɔi é wɛɛnziɛgi ɠɛɛzu anzanui ʋɔ, naa ʋalagɛ faaɠaaɠai ma, ɗa naa ɠɛɛna, ɗa ɓɔɠɔ ɠoloɠolosu, ɗa ɓɔɠɔi. 
Toɠa kpɔlɔi zɔlɔɔ ta ɓaaɠulamai, ná-unfegi la ɓega eyɛsu ɠɔ. 
Mazɔlɔɔ toloi ɠa ɗa anzazinigi yiiɠula, é la maawɔinɠa ɠɛa, yeei é potokulai ɠɛɛzu la. 
É la unmɔɔ gani nɔpɛ soga, é la vaa bu ɲɛgɛlɛin, anɛɛ ni ɗa lobɛani mɔinmɔin teʋesu.