Tɛnɛ Faalaaliiti.
9.
Ɠimalai ná-pɛlɛi loni, é ma ɓɛdɛ dɔfelaiti saɠani. 
É toganiiti paani, é dɔɔi ɠɛʋele ɓɛtɛ, é taɓalii ɠaaɓɛtɛni. 
É ná-botiɠɛ anzanuiti teʋeni toli bosuʋɛ, ti lɛɛni adaʋɛti, ɗa ɠɛ ná, è zɛlɛ taai maazu, ti ɗa ɠɛ: 
«Wɔiti wo la dɛ faa mɔinmɔin kwɛɛ, à ʋaa lɛɛ ʋɛ.» É boni naati ma, niiti ti la ɠeleɠeleni, é ɠɛ: 
«À ʋa, à nà-ɓului ta mi, à dɔɔi ɓɔle, nii gè supuai. 
À ɠɛlɛ nuiti ta-ziɛpolui ʋa, niiti ti la dɛ faa mɔinmɔin kwɛɛ, wa zɛnvui wo. À ziɛ ga keleɠele pelei! 
Zɔi a zelii lo waso nui ma, naa ɠa ɗa bɛlɛlalai zɔlɔɔ, zɔi a nu ɲɔi maaɠolo, naa ɠa ɗa poomugi zɔlɔɔ. 
Mina ɲɛɛɠulasu nui zɔgi wo ma, mazɔlɔɔ toɠa è wɔinzeɠe, kɛlɛ ɠima nui zɔgi wo ma, toɠa è nɛɛ ʋɛ. 
Ungo, ɠima nui lɛnɛ, ta ɠa ɓɔ ná-ɠimalai ʋa. Telebo nui ɠala, ta ɠa ɓɔ ná-faaɠwɛgi ʋa. 
Ɠimalai lɔɔzeigi ɠa é ga Ɠɔoɠɔ GALAGI ɠaazuluabai, è GALA Ɲadegai ɠwɛɛ, é ga kidafaawui. 
Mazɔlɔɔ nɔ̀un nà, ɠimalai, sàɓu zu, è-zii ma voloiti su ɠa ɠooza, è-zii ma ɠonagiti suɠooza. 
Ni ɗa ga ɠima nu, ɗa suɠulanumai zɔlɔɔ, ni ɗa ga waso nu, ɗa ɠila kpe ka ɗa sulɔnɔgi zɔlɔɔ.» 
Titigi ɠa ga eɠɛ anzanui é zɔngɔzu, é la faa ɠaaɠaazu, é la faa ɠwɛɛ. 
Toɠa zeini ná-pɛlɛlaʋɛ, seizuʋɛ ɠa ga adaʋɛti ti zɛlɛgai taai maazu. 
É ɗa teʋe nuiti toli, niiti ti liizu ga pele zakpai, 
«Zɔi é la dɛ faa mɔinmɔin kwɛɛ, naa ɠale ma, é ʋa ʋɛ!» Zɔi balagai ɠigi ma, é ɠɛ naa ma: 
«Ziɛi unmaai nɛɛ ʋɛ, daamianigi é miizu dɔɔɠuzu, naa nɛɛ ʋɛ!» 
Ti la suɠwɛɛ ga ta ta li laazu gɔvɛiti ma, niiti anzanui naa ti lolisu, naati ta niina gɔvɛalaazu.