Aɓakuke Ná-Sɛʋɛi.
1.
Keela wooi ɠa ga nii, GALA ge dɛɛni ga GALA goo wo nui Aɓakuke. 
Nà yɛsu è lolisu eyɛsu siɛgi ɓɛgele zeeli, Ɠɔoɠɔ GALAGI, ga è kpɔbai ɠɛ? È la woilosu gòoi ma. Nà kpeei loozu ga: «É ɓɔiɗa!» È la unmɔɔgi wosu? 
Leeni vaa zu è telebotala vaiti pɛ dɛɛzu ga ze? Leeni vaa zu è vaazu bu, è ɠɛ ga maanɔɠɔ vai ʋɛtɛ nu? Toomai ta nuɓusɛ maanɔɠɔ vai nɔ ɠa gè kaazu màaɠoolii zu, sakpegi ta kpɔɛ vaiti nɔ ɠa ti ɠɛɛzu adaʋɛ pɛ. 
Naa maaʋele ma, nu la mɔ ziɛzu ga tɔgi, sɔle faa la mɔ ziɛzu. Mazɔlɔɔ faa ɲɔu ɠɛ nuiti ti la vaazu bu, telebo nuiti ti ʋa boti ɠɛ, tukpɔiti ti ɠaaleʋezu, ta leʋezu yaavai maazu. 
Maliɠii ɠɛ ma: «À ɠaazulo dɛɛ zii ɠiligiti ba, wo laa ɠa vɔ ga duai. Mazɔlɔɔ wa yɛsu vulua, wo naa ɠa, nii é ʋaazu ɠɛɛzu, fai naa é ɠɛɛzu, nu a la bona wo ma, wo la ɓena la da. 
Nà ʋaazu ga Ɓaɓilɔne nuiti, suɲɔu nuɓusɛiti, ti ziliai, ti ɓizɛzu eteai zu ga boa yooiti kula ti ya. 
Ti maayikiʋɛ, ti maalua, tiya ɓɔɠɔ ɠa ti ti yiima vai levezu ga ta-zobogi. 
Ta-zooiti kpizɛʋɛ, é leʋe kɔii ʋa, ta-ɲiigi ɠaawanaʋɛ, é leʋe zuluɓuiti tɔnɔi ʋa, ti nu ɓɛɛzu kpidii. Ta-zoo ɓizɛ nuiti ti ɠɔɠɔa loɠa, ti zeɠe ɠoozama, ti ʋa, ti ɠoʋe eɠɛ koɠɛi, é loozu ná-daamianigi ma. 
Nuɓusɛi naati pɛ ta ʋaazu tooma vai nɔ ma, ti ɠaazulogai nɔ ti-ɠakalaʋɛ ʋa, ti ɗa duɔiti gaalɛ ba eɠɛ ɲaɠaegi, 
ti ɗa ɲɛɛɠula masagiti su, ti ɗa kundiɠiiti ɲɛɛ. Ada ɓiin ge la ti ɠaazu ga faa, ta pɔlɔi ziɠitona siɠigi ʋa, ti lɛ ga ti naati so, 
ti leʋe eɠɛ fiilɛ wolai, ti li ná taɠili, ti ɠɛ ga sɔba nui, ta-zɛbɛi ɠa ti kɛɛzu ga ta-ɠalagi.» 
Kɛlɛ kaite wɔlɔwɔlɔ, ɗa ɠa è ga Ɠɔoɠɔ GALAGI, ɗa ga nà-GALAGI, ɲadegai, gi la zaa! Ɠɔoɠɔ GALAGI, nà-fasai é màkɛsu, è yiimazeɠea ga gi zili nui niiti, è zobogi ve ti ya, è ɠɛ ti tukpɔi la gi unma. 
È-ɠaazuʋɛti ɲadegɛ gola, è ʋa va bu ga è faa ɲɔi ɠa, è la zooga zeizu kpɛ, è ɗa wɛlɛ nimiza vai ʋa. Leeni vaa zu è wɛlɛzu nɔ, è la faa nɔpɛ bosu, naa zu, nii yaava nuiti ti bosu? Leeni vaa zu è maaɠɛsu kpɔ, siɛgi zu nu ɲɔiti ti zɔiti koloɠolosu da, tama naati sɔlegai ti ʋa? 
Ɗa nuɓusɛiti sosu, eɠɛ kpoloɗɛi wu ɠaleiti, eɠɛ ani vulu goiti ti-ma un ge la ná. 
Mazɔlɔɔ Ɓaɓilɔne nuiti ta nuiti sosu, eɠɛ kalei kalagi sosu, ti ʋa ga tiye ta-lumɔi zu, ti ti ʋu ɓɔɠɔ ma ta-zeemai zu. Naazu ta ɠoozunɛɛzu, ti ɲaɠai ɠula. 
Ti ɗa zalaɠai ɠula ta-lumɔiti bɛ, ti ani maku nɛɛnɛgiti gala ta-zeemaiti bɛ, mazɔlɔɔ naati saɓui zu, ta zoo ti laami, daamianigi mɔin ti ya, gola nɛɛ. 
Ti yɛ nɔ ta-lumɔiti suwosu, ti ɗa zii ɠiligiti paa, maawɔinɠa la su?