2
1 ʻOku ne fakahā ki Saione hono fakailifia ʻoe fakamaau ʻae ʻOtua. 12 ʻOku ne enginaki ki he fakatomala, 15 Pea tuʻutuʻuni ʻae ʻaukai, 18 Mo ne fakahā ʻae tāpuaki ki ai. 21 ʻOku ne fakafiemālieʻi ʻa Saione ʻi he ngaahi tāpuaki ni, 28 Pea mo ia ʻe hoko mai.
1 Ifi ʻae meʻalea ʻi Saione,
pea fanongonongo ʻae ilifia ʻi hoku moʻunga tapu:
ke tetetete ʻae kakai kotoa pē ʻoe fonua,
koeʻuhi ʻoku hoko ʻae ʻaho ʻo Sihova, he ʻoku ofi ia;
2 Ko e ʻaho ʻoe fakapoʻuli, pea mo e fakapoʻupoʻuli,
ko e ʻaho ʻaoʻaofia, pea mo e poʻuli matolu:
hangē ko e pongipongi kuo mafola ʻi he funga moʻunga,
ʻoku hau pehē ʻae kakai lahi mo mālohi;
naʻe ʻikai pehē ʻi muʻa, pea ʻe ʻikai toe hangē ko ia ʻamui,
ʻo aʻu ki he ngaahi taʻu ʻoe ngaahi toʻutangata lahi.
3 ʻOku kai ʻe he afi ʻi honau ʻao;
pea ʻoku vela ʻae ulo afi ʻi honau tuʻa:
ko e fonua ʻoku hangē ko e ngoue ko Iteni ʻi honau ʻao,
pea ki mui ʻiate kinautolu ʻoku hangē ko e toafa kuo lala;
ʻio, pea ʻe ʻikai hao ha meʻa meiate kinautolu.
4 ʻOku nau hā mai hangē ko e hā mai ʻae fanga hoosi;
pea hangē ko e kau tangata heka hoosi, ʻe pehē ʻenau lele.
5 Hangē ko e ʻaulolongo ʻoe ngaahi saliote ʻi he funga moʻunga,
ʻe pehē ʻenau hopohopo, ʻo hangē ko e mumuhu ʻoe ulo afi ʻi heʻene kai ʻae mohuku mōmoa,
ʻo hangē ko e kakai mālohi kuo fakataha ki he tau.
6 ʻE mamahi lahi ʻae kakai ʻi honau ʻao:
ʻe peko ʻae mata kotoa pē.
7 Te nau lele hangē ko e kau tangata mālohi;
te nau kaka ʻi he ʻā, hangē ko e kau tangata tau;
pea te nau laka taki taha ʻi hono hala, ka ʻe ʻikai ha taha te ne veuki ʻae fakaʻotu:
8 Pea ʻe ʻikai te nau feteketekeʻi ʻae taha ki he taha;
ka te nau taki taha ʻalu ʻi hono hala:
pea ka nau ka tō ki he heletā,
ʻe ʻikai te nau lavea.
9 Te nau lele fano pe ʻi he kolo;
te nau lele ʻi he fukahi ʻā,
te nau kaka ki he tuʻa fale;
te nau hū ʻi he ngaahi matapā sioʻata, hangē ko e kaihaʻa.
10 ʻE tetetete ʻae fonua ʻi honau ʻao;
pea ʻe ngalulululu ʻae langi:
ʻe poʻuli ʻae laʻā mo e māhina,
pea ʻe taʻofi ʻenau ulo ʻe he ngaahi fetuʻu:
11 Pea ʻe fakaongo hono leʻo ʻe Sihova ki heʻene kautau:
he ʻoku lahi ʻae fakataha ʻo ʻene kautau:
pea ʻoku mālohi ia ʻoku fai ki heʻene folofola:
koeʻuhi ko e ʻaho ʻo Sihova ʻoku lahi mo fakamanavahē;
pea ko hai te ne faʻa tuʻu ai?
12 ʻOku pehē ʻe Sihova, “Pea ko eni foki, mou tafoki kiate au ʻaki homou loto kotoa,
pea ʻi he ʻaukai, pea ʻi he tangi, mo e tangilāulau:”
13 Pea mou haehae homou loto, kae ʻikai ko homou kofu pe,
pea tafoki kia Sihova, ko homou ʻOtua:
he ʻoku ne angalelei mo ʻaloʻofa,
ʻo tuotuai ki he houhau, pea ʻoku ne angaʻofa lahi,
pea ʻoku ne fakatomala ʻi he kovi.
14 ʻE ʻilo ʻe hai? Pe te ne tafoki mo fakatomala,
pea tuku mai ki mui ha tāpuaki ʻiate ia;
ʻio, ha feilaulau meʻakai, pea mo e feilaulau meʻainu kia Sihova ko homou ʻOtua?
15 Ifi ʻae meʻalea ʻi Saione,
tuʻutuʻuni ha ʻaukai,
ui ʻae fakataha mamafa:
16 Tānaki ʻae kakai,
fakatapui ʻae fakataha,
fakakātoa mai ʻae kau mātuʻa,
tānaki ʻae fānau, pea mo kinautolu ʻoku kei huhu:
ke ʻalu ʻae tangata taʻane mei hono fale teuteu,
pea mo e taʻahine mei hono loki.
17 Tuku ke tangi ʻae kau taulaʻeiki, ʻae kau faifekau ʻa Sihova, ʻi he vahaʻa ʻoe fale hala mo e feilaulauʻanga,
pea ke nau lea pehē, “ʻE Sihova, fakamoʻui hoʻo kakai,
pea ʻoua naʻa ke tuku ho tofiʻa ki he manuki,
ke puleʻi ʻakinautolu ʻe he hiteni:
koeʻumaʻā ʻenau pehē ʻi he lotolotonga ʻo hoʻo kakai,
‘ʻOku ʻi fē honau ʻOtua?’ ”
18 Pea ʻe toki fuaʻa ʻa Sihova ki hono fonua,
pea ʻofa mamahi ki hono kakai.
19 ʻIo, ko Sihova te ne tali, pea pehē ki hono kakai,
“Vakai, te u ʻatu kiate kimoutolu ʻae koane, mo e uaine, mo e lolo,
pea te mou mākona ai:
pea ʻe ʻikai te u toe tuku ʻakimoutolu ke manukiʻi ʻe he hiteni:
20 Ka te u ʻave ke mamaʻo ʻiate kimoutolu ʻae tau mei he tokelau,
pea te u kapusi ʻakinautolu ki ha fonua kākā mo lala,
ʻoku hanga hono mata ki he tahi hahake,
pea mo hono tuʻa ki he tahi mamaʻo atu ʻaupito,
pea ʻe ʻalu hake hono namukū,
pea ʻe ʻalu hake hono ʻeho ʻo ia,”
Koeʻuhi kuo ne fai ʻae ngaahi meʻa lahi.
21 “ʻE fonua, ʻoua naʻa manavahē;
fiefia pea nekeneka: koeʻuhi ʻe fai ʻe Sihova ʻae meʻa lahi.
22 ʻOua naʻa manavahē, ʻe fanga manu ʻoe vao!
He ʻoku tupu ʻae mohuku ʻi he toafa,
pea ʻoku fua ʻae ʻakau,
ko e ʻakau ko e fiki mo e vaine, ʻoku tuku mai hona mālohi.
23 “Pea mou fiemālie, ʻe fānau ʻa Saione,
pea fiefia ʻia Sihova, ko homou ʻOtua:
koeʻuhi kuo ne foaki kiate kimoutolu fakalelelelei ʻae ʻuha muʻa,
pea te ne tuku ke tō kiate kimoutolu ʻae ʻuha,
ko e ʻuha muʻa, mo e ʻuha mui,
ʻi he ʻuluaki māhina.
24 Pea ʻe fonu ʻi he uite ʻae ngaahi hahaʻanga,
pea ʻe pito mahuohua ʻae ngaahi tataʻoʻanga ʻi he uaine mo e lolo.
25 Pea te u toe ʻomi kiate kimoutolu ʻae ngaahi taʻu ne kai
ʻe he heʻe mo e ʻunufe maumau, mo e ʻunufe, mo e ʻunufe fulufulu,
ko ʻeku kau tau lahi naʻaku fekau kiate kimoutolu.
26 Pea te mou kai ʻi he mahu, pea te mou mākona ai,
pea fakamālō ki he huafa ʻo Sihova ko homou ʻOtua,
ʻaia kuo ne fai fakaofo kiate kimoutolu:
pea ʻe ʻikai toe mā ʻa hoku kakai ʻo lauikuonga.
27 Pea te mou ʻilo ʻoku ou ʻi he haʻohaʻonga ʻo ʻIsileli,
pea ko Sihova au ko homou ʻOtua, kae ʻikai ha taha kehe:
pea ʻe ʻikai toe mā ʻa hoku kakai ʻo lauikuonga.
28 “Pea ʻe hoko ʻamui, te u huaʻi hoku Laumālie ki he kakai kotoa pē;
pea ʻe kikite homou ngaahi foha mo homou ngaahi ʻofefine,
pea ʻe misi ʻe hoʻo kau mātuʻa ʻae ngaahi misi,
pea ʻe mamata ʻae ngaahi meʻa hā mai ʻe hoʻo kau talavou:
29 Pea ki he kau tamaioʻeiki mo e kau kaunanga,
te u huaʻi foki hoku Laumālie ʻi he ngaahi ʻaho ko ia.
30 Pea te u fakahā ʻae ngaahi meʻa fakaofo ʻi he langi, pea ʻi māmani,
ko e toto, mo e afi, mo e ʻahu ʻoe afi.
31 Pea ʻe liliu ʻae laʻā ʻo poʻuli,
mo e māhina ke toto ʻi he teʻeki hoko ʻae ʻaho lahi,
pea fakamanavahē ʻo Sihova.
32 Pea ʻe pehē, ko ia ʻe ui ki he huafa ʻo Sihova ʻe fakamoʻui ia:
koeʻuhi ʻe ai ʻae fakamoʻui ʻi he moʻunga ko Saione, pea ʻi Selūsalema,
ʻo hangē ko e folofola ʻa Sihova,
pea ʻi he toenga ʻe uiuiʻi ʻe Sihova.”