7
1 ʻOku lāunga ʻae Siasi ko e meʻa ʻi hono tokosiʻi, 3 Mo hono lahi ʻoe kovi. 5 Ka ʻoku ʻikai te ne falala ki he tangata ka ki he ʻOtua. 8 ʻOku ne ikuna hono ngaahi fili. 14 ʻOku fakafiemālieʻi ia ʻe he ʻOtua, ʻaki ʻae ngaahi talaʻofa, 16 Mo e veuveuki ʻoe ngaahi fili, 18 Pea mo ʻene ʻaloʻofa.
1 ʻOiau ʻeku mamahi!
He ʻoku ou hangē kuo ʻosi ʻae tānaki ʻoe ngaahi fua ʻoe faʻahitaʻu mafana, hangē ko e toenga kālepi ʻoe toʻukai:
ʻoku ʻikai ha fuhinga kālepi ke kai:
naʻe holi hoku loto ki he ʻuluaki toʻukai.
2 Kuo ʻauha ʻae kau māʻoniʻoni mei māmani:
pea ʻoku ʻikai ha kau angatonu ʻi he kakai:
ʻoku nau toitoi kotoa pē ki he toto;
ʻoku nau taki taha tuli ʻa hono tokoua mo e kupenga.
3 Koeʻuhi ke nau fai fakamātoato ʻi he kovi ʻaki ʻae ongo nima ʻosi pe,
ʻoku ʻeke ʻe he houʻeiki, pea ʻeke mo e fakamaau ki he meʻa foaki;
pea mo e tangata māʻolunga ʻoku ne fakahā hono loto kovi pea pehē,
ʻoku nau ʻufiʻufi ia.
4 Ko e lelei lahi ʻiate kinautolu ʻoku hangē ko e ʻakau talatala pe:
ko ia ʻoku fungani angatonu ʻoku māsila ʻi he ʻa talatala:
ʻoku hoko mai ʻae ʻaho ʻo ho kau leʻo,
pea mo ho ʻaʻahi;
ko eni ʻe hoko ʻenau puputuʻu.
5 ʻOua naʻa mou falala ki he kaumeʻa,
ʻoua naʻa mou falala ki ha takimuʻa:
leʻohi ʻae matapā ʻo ho ngutu,
meiate ia ʻoku faʻaki ki ho fatafata.
6 He ʻoku fakaongokoviʻi ʻe he foha ʻa ʻene tamai;
ʻoku tuʻu hake ʻae taʻahine ki heʻene faʻē,
ʻae taʻahine ʻi he fono, ki heʻene faʻē ʻi he fono;
ko e ngaahi fili ʻoe tangata, ʻae kau tangata ʻi hono fale.
7 Ko ia te u hanga kia Sihova;
te u tatali ki he ʻOtua ʻo ʻeku fakamoʻui;
ʻe fanongo mai kiate au ʻa hoku ʻOtua.
8 ʻOua naʻa ke viki kiate au, ʻe hoku fili:
ʻo kau ka hinga te u toetuʻu hake:
ʻo kau ka nofo ʻi he poʻuli, ʻe hoko ʻa Sihova ko e maama kiate au.
9 Te u kātaki ʻae houhau ʻo Sihova,
he kuo u fai angahala kiate ia,
ke ʻoua ke ne fakamatala maʻaku, mo fai ʻae fakamaau koeʻuhi ko au;
te ne ʻomi au ki he maama,
pea te u mamata ki heʻene māʻoniʻoni.
10 Pea ʻe toki mamata ai ʻa hoku fili,
pea ʻe ʻufiʻufi ʻi he mā ʻaia naʻe pehē mai kiate au,
‘Komaʻā Sihova ko ho ʻOtua?’
ʻE sio ʻa hoku mata kiate ia:
ko eni, ʻe malaki hifo ia ʻo hangē ko e pelepela ʻi he ngaahi hala.
11 ʻI he ʻaho ko ia ʻe langa ho ngaahi ʻā,
ʻi he ʻaho ko ia ʻe hiki ke mamaʻo ʻae fono.
12 ʻI he ʻaho ko ia ʻe haʻu ia, ʻio, kiate koe mei ʻAsilia, pea mei he ngaahi kolo kuo teu,
pea mei he potu mālohi ʻo aʻu ki he vaitafe,
pea mei he tahi ki he tahi,
pea mei he moʻunga ki he moʻunga.
13 Ka neongo ia ʻe lala ʻae fonua koeʻuhi ko kinautolu ʻoku nofo ai,
ko e fua ʻo ʻenau faianga.
14 Fafangaʻi ʻa hoʻo kakai ʻaki ʻae meʻa tā,
ʻae kakai ʻo ho tofiʻa,
ʻaia ʻoku nofo ngaongao ʻi he vao ʻakau ʻi he lotolotonga ʻo Kameli:
tuku ke nau kai ʻi Pesani mo Kiliati,
ʻo hangē ko e ngaahi ʻaho ʻi muʻa.
15 “ʻO fakatatau mo e ngaahi ʻaho ʻo hoʻo haʻu mei he fonua ko ʻIsipite, te u fakahā kiate ia,
ʻae ngaahi meʻa fakaofo.”
16 ʻE mamata ʻe he ngaahi puleʻanga, pea te nau ofo ʻi heʻenau mālohi kotoa pē:
te nau ʻai honau nima ki honau ngutu;
ʻe tuli ʻa honau telinga.
17 Te nau ʻemo ʻae efu, hangē ha ngata,
te nau ngaolo mei honau ngaahi luo hangē ko e kelemutu ʻoe fonua:
te nau manavahē kia Sihova ko hotau ʻOtua,
pea te nau ilifia koeʻuhi ko koe.
18 Ko hai ha ʻOtua ʻoku hangē ko koe, ke fakamolemole ʻae hia,
pea ke laka atu ʻi he angahala ʻi he toenga ʻo hono tofiʻa?
ʻOku ʻikai te ne maʻu ʻa hono houhau ʻo taʻengata,
he ʻoku ne fiefia ʻi he ʻaloʻofa.
19 ʻE toe foki mai ia, te ne manavaʻofa kiate kitautolu;
te ne ikuʻi ʻetau ngaahi hia;
pea te ke lī ʻenau ngaahi angahala kotoa pē, ki he loloto ʻoe tahi.
20 Te ke fakapapau ʻae moʻoni kia Sēkope,
pea mo e ʻaloʻofa kia ʻEpalahame,
ʻaia naʻa ke fuakava ki heʻemau ngaahi tamai talu mei he ngaahi ʻaho ʻi muʻa.