Mepepelime ma
Yakubu
Ucuɗuwu wa aatagada a nda
Yakubu zawaꞌa vu Zagbain Yesu Zamawawa a̱yi ɗa za na ɗanai aatagada a nda. U ɗana ta̱ mepepelime ma nda a̱ tyo a̱za̱ e Itoni e Yesu aza na a̱ ri ubazu ba̱ta̱ ba̱ta̱ a̱tsuma̱ o uvaɗi adama a̱ a̱tsuma̱lima̱ a na oo sowuso adama e itoni ya̱ Yesu Zamawawa.
Ana a̱tsuma̱lima̱ a yuwain a̱bunda̱ lon, reve e beteꞌwe a̱ tyo ba̱ta̱ ba̱ta̱. A̱yi ɗa i zuwai Yakubu ɗanaa nle mepepelime ma nda adama a na u ciga nle a kaɓa asuvu waru a yuwan ankuri a̱tsuma̱ e itoni i na a yuwusan. A̱yi ɗa i zuwai aatagada a nda a yuwusan adanshi adama a̱ a̱tsuma̱lima̱, na addama, na̱ makaɓa ma asuvu, oɓolo na avasa, waru na̱ nden n na mu ntsayi a yuwan a̱tsuma̱ a̱ nden n na a yuwusan a̱tsuma̱ e itoni.
A̱za̱ e Itoni anaꞌan na̱ a̱bunda̱ o to sowuso a̱tsuma̱lima̱ e ekere a aza a na a̱ kurusu Zamawawa shi. Suru na̱ ne suru tsu toni niyi ulobonu. Aatagada a nda o roco tsu ta̱ itoni ya̱ Yesu a̱yi ɗa a yuwan ili i saꞌani usana suru.
Ili i na i ri pe a̱tsuma̱ a aatagada a nda
1. Ica̱su (1:1)
2. Wuma wu ucawu wo okolo nu ugbozu (1:2-18)
3. Mawwa nu ukurusu wi ikaka ya̱ A̱sula̱ (1:19-27)
4. She vu roco aɗangulu a̱ tyo a̱za̱ e ikebe wan (2:1-13)
5. Ucawu wo okolo na̱ linga (2:14-26)
6. Ugbozu ni idanshi (3:1-18)
7. Morono ma atsuvu adama a̱ tsuꞌutsa̱ nu uvaɗi (4:1–5:6)
8. Makaɓa ma asuvu, ni isaꞌani, oɓolo na avasa (5:7-20)
1
Ucuɗuwu
1 A̱mu ɗa Yakubu, aagbashi a̱ A̱sula̱ waru aagbashi e Yesu Kristi Zagbain Zamawawa.
N ta ɗanasaa a̱za̱ e Itoni ya amayun a na a̱ ri ubazu suru a̱tsuma̱ o uvaɗi.
N ta̱ lyungusu ica̱su i va̱.
Uritosu adama a̱ ma̱lyungwa̱
2 Nꞌutsa̱ n va̱ suru, i yuwan ma̱za̱nga̱ mantsa ma na addama a̱ ta̱wa̱ nɗu icuꞌun icuꞌun. 3 Adama a na i reve ta̱ cine ma̱lyungwa̱ mo ndolo ma tsu zuwa ucawu wo okolo a̱ ɗu u ta̱wa̱ na̱ makaɓa ma asuvu. 4 I kaɓa asuvu hali ma̱lyungwa̱ ma̱ ɗu mo koto. Ana i kaɓai asuvu o ndolo i to oꞌwo nu ucawu wo okolo ugbamu waru i ta̱ da̱na̱ ushiwun, yaa lamba ili i saꞌani shi. 5 Za na lambai ugbozu suru, u pati A̱sula̱, waru u ta ca yi ugbozuꞌu. A̱sula̱ a tsu ca ta̱ vuma neꞌe pere. U tsu gbarana za na pati niyi ili shi. 6 Amma na̱ vu pati ili i ro, vu ciga vu ꞌyuwan vu ca okolo, agba vu kuɗa okolo wan. Ni i kuɗa okolo i ta̱ da̱na̱ gashi ikeɗu i mala ma na upepu u tsu zuwusa yi a̱ ka̱nda̱ruwusa̱. 7 Cuꞌun vuma ndolo yuwan majiyan ma na Zagbain aa yuwaan yi ili ro wan, ko keꞌen. 8 Cuꞌun vuma ndolo tsu gura yuwaan aciya̱yi majiyan ma̱ ta̱ shi, waru u tsu gura kuru ure u ta̱ shi.
9 A̱za̱ e Itoni aza a na a̱ ri ni ili shi, a yuwan afalu adama a na A̱sula̱ a̱ ꞌya̱sa̱n le ta̱. 10 A̱za̱ e Itoni aza a na a̱ ri ni ikebe, a yuwan afalu fo adama a na A̱sula̱ a zuwa le ta̱ a̱ ka̱ɗa̱to aciyele. A̱za̱ e ikebe o to koto ana yipa̱lu ya anlya i na i tsu uta̱ o ogozo. 11 Urana u tsu ta̱wa̱ ta̱ nu usuɗuwu wa̱ yi, a̱vu u ꞌyeweto anlya, a̱vu waru yipa̱lu ya̱ yi i riya̱ e iɗa, reve ulobonu wa̱ yi u koto. Ne ɗa waru za vu utsuru oo koto a̱yi pe a̱tsuma̱ a linga va̱ yi.
12 A̱sula̱ a̱ tsu ta̱wa̱a̱ ta̱ ama a na a kaɓai asuvu na ankuri na̱ ma̱lyungwa̱ na̱ ma̱za̱nga̱. Nna̱ ma̱lyungwa̱ mo koto, A̱sula̱ a ta ca ookokolo a wuma u babu ukotu e ekere a za na riya̱i a̱ ma̱lyungwa̱ꞌa̱ shi. A̱sula̱ a yuwaan ta̱ aza a na a ciga niyi nzuwulai n nda.
13 Na̱ vuma ciga yuwan ili i babu ulobonu, cuꞌun vuma ndolo she u damma A̱sula̱ a̱ lyungwa̱ yi ta̱ wan. Za lo na aa gura lyungwa̱ A̱sula̱ a yuwan iwuya shi, waru A̱sula̱ a̱ tsu lyungwa̱ ama a yuwan iwuya shi. 14 Icigi i maluwa ma na tsaa yuwan iwuya u tsu lyungwa̱ tsu ta̱ tsu yuwan ili, reve u pusa̱n tsu ana. 15 Maluwa mo ndolo u tsu yuwan ta̱ a̱a̱tsuma̱ reve u matsan unusu, ne ɗa waru unusu u ndolo u tsu yuwan mgbain hali u ta̱wa̱a̱ nu ukwa̱.
16 Ama a na n cigai a̱bunda̱, she i kuru ili ye epen wan. 17 Ili i na i ri ulobonu suru uneꞌe u ɗa diga uba̱ta̱ wa̱ A̱sula̱ ɗe zuva, ne ɗa waru ili suru i na i ri babu unusu. Ili i nda suru a ca tsu ta̱ le diga ya Dada na yuwain ekan a zuva. Ne ɗa u ri kuci, u tsu vadala cine ululu u tsu vadala babu usa̱n shi. 18 Icigi ya̱ yi i ɗa tsoo oꞌwo ama a na u ɗangwai, ɗaɗa u lyunguwa̱ ntsu ikaka ya amayun, ikaka i ɗaɗa i matsan ntsu tsa̱ muwun mu ufaru.
Zuwai atsuvu a̱ ɗu
19 Ncigata n va̱, i da̱na̱ na̱ mawwa babu usa̱n, amma i yuwan adanshi goꞌo wan, waru i yuwan upan goꞌo wan. 20 Ni i yuwan upan, ko ili i saꞌani i ta̱ i na A̱sula̱ a ciga nɗu i yuwan, yaa yuwan shi. 21 I lyawa tsipere ni iwuya. Waru i ka̱mba̱to aciya̱ɗu ili i ro i ɗa shi, waru i usu ikaka i na a̱ shuwa̱i a̱tsuma̱ a̱ ɗu, ikakaꞌa i ta̱ nu ucira u na waa wawa ɗu.
22 I yuwan ili i na ikakaꞌa i damma nɗu, she yu uwwa na atsuvu a̱ ɗu goon wan, ni i yuwan ne, i yuwaan ta̱ aciya̱ɗu tsulo. 23 Na̱ vuma uwwa adanshi a̱ A̱sula̱ agba u yuwan ili i na u damma niyi shi, cuꞌun vuma ndolo ta̱ gashi vuma na ka̱lyuwa̱i aciya̱yi a̱ ma̱dubi. 24 Reve nu u ka̱ra̱ a̱vu wi icina cine u ri babu usa̱n. 25 Agba na̱ vuma ka̱lyuwa̱ wila̱ wa̱ A̱sula̱ u na u ri ulobonu lon, reve u lyuwa elime a yuwusan ili i na wila̱ꞌa̱ u dammai, vuma ndolo ta̱ tsura̱ abaꞌun na asuvu nden a na wila̱ u cayi.
26 Na̱ vuma aa yuwusan majiyan gashi u to tonishi A̱sula̱, agba u gura guza̱ una̱ wa̱ yi shi, wu luma̱ ta̱ aciya̱yi, waru itoni ya̱ A̱sula̱ ya̱ yi pere ɗa. 27 Ure u saꞌani u na wu ntsayi o toni A̱sula̱ Dada tsu a̱yi ɗa a̱ ka̱lyuwa̱ mkpaꞌan na̱ nruna̱, reve waru a suma nshinda̱ mu uvaɗi.