1 N ta̱ ni ili i saꞌani i na maa damma adama a̱ Fibi, ka na a yuwusan a̱ga̱nda̱ a̱tsuma̱ a̱ a̱a̱ꞌisa̱ a̱ a̱za̱ e Itoni a Kankiriya. 2 N ta patishi ɗu ankuri i ushi yi a̱tsuma̱ a Zagbain o ure u saꞌani u na ama a̱ A̱sula̱ aa tsu yuwan. I kamba yi a̱tsuma̱ o ure u na yaa gura suru, adama a na u kamba mu ta̱ na ama a̱ a̱bunda̱ fo.

3 I ca̱sa̱ Birisika na̱ Akila, ◊ Ajy. 18:2. aza a na a yuwain ulinga oɓolo na̱ a̱mu a̱tsuma̱ a tsugbashi tsa̱ Yesu Zamawawa. 4 A̱ usu ta̱ a̱ kuwa̱ adama a kamba mu. N godyoo le ta̱ lon, waru a̱mu a̱ ndeꞌen shi a̱ꞌisa̱ a̱ a̱za̱ e Itoni a Atakpaci suru o godyoo le ta̱. 5 Waru, i ca̱sa̱a̱ mu a̱a̱ꞌisa̱ a̱ a̱za̱ e Itoni a na o tsu ɓolotosu a̱tsuma̱ o uꞌwa u le.

Waru i ca̱sa̱a̱ mu iꞌutsa̱ ya amayun i va̱ Abayinitu. A̱yi ɗa vuma na fara oꞌwoi za vi Itoni e iɗa ya Asiya.

6 I ca̱sa̱a̱ mu Meri, za na yuwaan ɗu ulinga wa̱ a̱ɓula̱ lon.

7 I ca̱sa̱a̱ mu ama a̱ va̱, Andranika na̱ Juniya, aza a na a̱ da̱na̱i a̱tsuma̱ o uꞌwa wa ali oɓolo na̱ a̱mu. O oꞌwo ta̱ a̱za̱ e Itoni kafu a̱mu, waru ajiya a ta casu le tsugbain.

8 I ca̱sa̱a̱ mu Amfiliya, a̱yi iꞌutsa̱ ya amayun i va̱ i ɗa a̱tsuma̱ e itoni yi Zagbain.

9 I ca̱sa̱a̱ mu Uribanu, za na yuwayin Zamawawa a̱ga̱nda̱ oɓolo na̱ a̱tsu.

I ca̱sa̱a̱ mu iꞌutsa̱ ya amayun i va̱ Isitaki.

10 I ca̱sa̱a̱ mu Abali, za na rocoi amayun a ɗa u toniyi Zamawawa.

I ca̱sa̱a̱ mu Aristobulu na ama o uꞌwa a̱ yi.

11 I ca̱sa̱a̱ mu Hiruduyan, moron ma̱ va̱.

Waru i ca̱sa̱a̱ mu Nakisu na aza a na a̱ ri a̱tsuma̱ o uꞌwa wa̱ yi, aza a na a̱ ri a̱za̱ e Itoni yi Zagbain.

12 I ca̱sa̱a̱ mu Tarafina na̱ Tarafusa, a̱ma̱ci a na a yuwain ulinga u saꞌani adama a Zagbain.

I ca̱sa̱a̱ mu na̱wa̱yi va amayun va̱ Barisisa, ka ro na yuwain ulinga u saꞌani adama a Zagbain.

13 I ca̱sa̱a̱ mu Rufo, za na ri aagbashi a saꞌani adama a Zagbain. Waru i ca̱sa̱ mma va̱ yi, za na oꞌwoi gashi mma va̱.

14 I ca̱sa̱a̱ mu Asinkirita, na̱ Filiguna, na̱ Hamisa, na̱ Baturoba, na̱ Hema, oɓolo na̱ a̱za̱ e Itoni a na a̱ ri oɓolo ne ele.

15 I ca̱sa̱a̱ mu Fililugu, na̱ Juliya, na̱ Niriyu, na̱ mawun ma̱ a̱na̱wu mo usheli ma̱ yi, na̱ Ulumfa, oɓolo na ama a̱ A̱sula̱ a na a̱ ri oɓolo ne ele.

16 I ca̱sa̱la̱i ni icigi yi Zamawawa.

A̱ꞌisa̱ a̱ a̱za̱ e Itoni a Zamawawa suru a̱ ta̱ ca̱sa̱sa̱ ɗu.

17 Ama a̱ va̱, i ka̱mbuwa̱ ugbozu u ɗu ulobonu adama a aza a na a̱a̱ ta̱wa̱a̱ nu uneꞌesun nu uꞌya̱sa̱sa̱n wa asuvu e ekere o ucawu wo okolo wa ama, reve o rito ili i ro koꞌo ni ili i na i tsura̱i. I suma le! 18 Aza a na a yuwusan ne a yuwusaan Zamawawa Zagbain tsu a̱ga̱nda̱ shi, amma a ta yuwusan ili i na aa uwwaa aciyele uyoꞌo. A tsu yuwusan ta̱ ica ye pere, reve a̱ luma̱ ama a na e revei cuꞌun morono ma adanshi me iwuya ma nda shi. 19 A̱za̱ e Itoni suru a uwwa ta̱ a na yaa yuwusan tsutoni e ekere a Zagbain, adama o ndolo n ta yuwusan ma̱za̱nga̱ adama a̱ ɗu. Amma n ciga ɗu ta̱ i ka̱mbuwa̱ ugbozu a̱tsuma̱ e ili i na i ri ili i saꞌani, amma gba i suma iwuya.

20 A̱sula̱ a na gba a̱ tsu ta̱wa̱a̱ na asuvu nden, aa jima shi u ta minjira Male reve u ca ɗu ucira a aci a̱ yi.

N ta yuwusan avasa isaꞌani ya̱ Yesu Zagbain tsu da̱nu oɓolo na̱ a̱ɗu.

21 Timoti za na a yuwusan ulinga oɓolo na̱ a̱mu, u ta̱ lyungusa̱a̱ ɗu ni ica̱su ya̱ yi. Waru ama a̱ va̱ fo, Lusiya, na̱ Yason, na̱ Susibatara a̱ ta̱ ca̱sa̱sa̱ ɗu.

22 A̱mu ɗa Tatiyu, n ta ɗanasa ili i na Bulu dammai n ɗana. A̱mu fo n ta̱ ca̱sa̱sa̱ ɗu a̱tsuma̱ a Zagbain.

23 Gayu ta̱ ca̱sa̱sa̱ ɗu. U ushi mu ta̱ oɓolo na̱ a̱a̱ꞌisa̱ a̱ a̱za̱ e Itoni suru a̱tsuma̱ o uꞌwa wa̱ yi.

Arasata, za vu uzuwa wi ikebe a̱ lyuci gbain, ni iꞌutsa̱ i tsu Kawata a̱ ta̱ ca̱sa̱sa̱ ɗu fo.

24 N ta yuwusan avasa Zagbain tsu Yesu Zamawawa u roco ɗu isaꞌani suru. Ami.* Akuci a atagada o ro a̱ ri nu uguzu u nda shi.

25 Tsu cayi A̱sula̱ tsugbain! U tsu zuwa ɗu ta̱ yi isawan nu ucira a̱tsuma̱ o ucawu wo okolo a̱ ɗu, cine Alabari a Saꞌani a dammai. Ikaka i ɗa adama e Yesu Zamawawa ni ifoɓi i na u sokoi nu ujimu. 26 Amma gogo iɗana ya ama̱sula̱ a zuwa le ta̱ e reve amayun a alanga e eteshe. Waru A̱sula̱, a na a̱ tsu kuwa̱ shi, a zuwa ta̱ uvaɗi ma̱ɓula̱ e reve amayun a nda, tsa̱ra̱ a̱ usu waru aa yuwan tsutoni na̱ a̱yi. 27 Lyawa A̱sula̱, za na a̱yi ɗa goon u ri nu ugbozu, u ushi tsugbain o ure wa̱ Yesu Zamawawa babu ukotu. Ami.