Luka.
3.
A aaꞌwan e gendu a na Kaisa Tibariya da̱na̱i mogono ma gbain ma̱ Roma, ngono n na̱shi n nda n da̱na̱ ta̱ za̱la̱ va̱ yi: Bontu Bilatu† o tsugono tsa Yahuda, Hiridu Antiba o tsugono tsa̱ Ga̱lili, Filibu zawaꞌa va̱ yi o tsugono tsa Ituriya na̱ Tarakunita, Lisaniya waru a yuwusan tsugono tsa Abiliya. 
A yashi i na Hanana na̱ Kayafa a̱ da̱na̱i nan abara ganu, a̱vu adanshi a̱ A̱sula̱ a̱ ta̱wa̱ ya Yahaya mawun ma Zakariya a̱tsuma̱ o una. 
U garasa ta̱ uba̱ta̱ suru zuzu nu Uɗolu wa̱ Urdu, a yuwusaan ama alajiya a na a̱a̱ rumbu† le, adama u roco a vadala† ta̱ a̱ nusu le, tsa̱ra̱ a yuwaan le gafura. 
Cine u ri uɗanu adama a Yahaya a̱tsuma̱ a Aatagada a Ishaya, vumava̱sula̱, ana, “Uɗyo wu nanza e ɗewu a̱tsuma̱ o una, ‘I foɓoo Zagbain ure, i yuwan ure wa̱ yi mejege. 
O to shiton uka̱ri suru, agaɗi na̱ nsasan suru a ta vala le. A ta lapula re na ri ugondoru. O to shiton muka̱ri mu re. 
Vaɗilima̱ suru te ene iwawi ya̱ A̱sula̱.’ ” 
Adama o ndolo a ɗa Yahaya dammai oɓolo a ama a na a̱ ta̱wusa̱i ya̱ꞌa̱ yi, tsa̱ra̱ u rumbu le, “A̱ɗu apili! Zane damma nɗu i suma a̱tsuma̱lima̱ a na a̱ ri lo a̱ ta̱wa̱? 
I yuwan ili i na yoo roco i vadala ta̱ a̱tsuma̱ o unusu† u ɗu. She i uwa a dansa o okolo a̱ ɗu a na Ibrahim a̱yi ɗa akaya a̱ ɗu wan. A̱sula̱ a ta gura yuwaan Ibrahim muwun na atali a nda. 
Aaɓau a̱ tu ufoɓu wu gasa ɗanga a aralu e le. Uɗanga u na u matsain ili ya̱ a̱ɓula̱ shi suru, o to koɗo yi, a̱vu a vari yi a akina.” 
Reve amaꞌa e ece yi, “Cine tsaa yuwan?” 
A̱vu u damma le, “Za na ri na̱ a̱tugu e re, u ca za na ri na̱ a̱yi shi za ta̱. Za na ri ni ilyalya waru u yuwan ne.” 
A̱za̱ o ushishi wu utafa o ro a̱ ta̱wa̱ ta̱, tsa̱ra̱ u rumbu le, reve e ece yi, “Manlu, nye tsaa yuwan?” 
Reve u damma le, “She i ushi ili i na i laꞌai ili i na a damma nɗu i ushi wan.” 
A̱soja o ro waru a̱ ta̱wa̱ ta̱ e ece yi, “A̱tsu gba, nye tsaa yuwan?” A̱vu u damma le, “She i usa ikebe yi za ro nu ucira wan, ko i yuwaan za ro epen pere m pere wan. I yuwan ankuri na atsupu a̱ ɗu.” 
Ama e ipiri yu uta̱wu yi Zamawawa, reve a̱ ka̱ra̱ a majiyan ko Yahaya a̱yi ɗaɗa Zamawawaꞌa. 
A̱vu u usu le, “N rumbu ɗu ta̱ na̱ mini, agba za na laꞌa numu tsugbain u ta̱ lo a̱ ta̱wa̱. Vunu va atan a̱ yi n rawa n ka̱nza̱ m ba̱ɗa̱ shi. A̱yi ɗa wa̱a̱ rumbu ɗu na̱ Ruhu va Akiza na akina. 
U ta̱ na aakpatalutsu o uyeluwu o ukere wa̱ yi, u ta raɗa oosoroto cece, a̱vu u ɓoloto ishina ya̱ yi o mopon, agba owopoꞌo u ta̱ kula̱to le na akina a na a̱ ri n kima̱ shi.” 
Re va̱ a̱bunda̱ ɗa Yahaya yuwain alajiya a Alabari a Saꞌani a̱ tyo e ekere a ama. 
A̱vu u yuwaan Hiridu Antiba mogono nla̱ngi adama a Hiridiya, ka vu zawaꞌa va̱ yi, ni iwuya ya̱ a̱bunda̱ i na u yuwain. 
Reve u yuwisan iwuya i ro, ana u zuwai Yahaya o uꞌwa wa ali. 
Ana a̱ rumbuyi ama a na a̱ ta̱wa̱i suru, a̱vu fo a̱ rumbu Yesu. A̱yi a̱tsuma̱ a avasa, reve zuva kpa̱tuꞌwa̱, 
reve Ruhu va Akiza telee yi na̱ lipu oroci a muɗa. A̱vu a uwwa uɗyo ɗe zuva ana, “A̱vu ɗa Mawun ma̱ va̱, macigata ma̱ va̱, na̱ a̱vu ɗa maa yuwusan ma̱za̱nga̱ lon.” 
Yesu shi ta̱ na aꞌwan a na a yuwain zuzu na̱ mataꞌatsu, ana u temei uritosu wa̱ yi. A tara yi ta̱ ana a̱yi mawun ma̱ Isuhu ma ɗa. Isuhu ulobo wa̱ Heli u ɗa. 
Heli ulobo wa Matata u ɗa. Matata ulobo wa̱ Levi u ɗa. Levi ulobo wa Maliki u ɗa. Maliki ulobo wa Yana u ɗa. Yana ulobo wa̱ Isuhu u ɗa. 
Isuhu ulobo wa Matiya u ɗa. Matiya ulobo wa̱ Emos u ɗa. Emos ulobo wa Nahum u ɗa. Nahum ulobo wa Azaliya u ɗa. Azaliya ulobo wa Najaya u ɗa. 
Najaya ulobo wa Maꞌata u ɗa. Maꞌata ulobo wa Matiya u ɗa. Matiya ulobo wa Simiya u ɗa. Simiya ulobo wa̱ Isuhu u ɗa. Isuhu ulobo wa Yahuda u ɗa. 
Yahuda ulobo wa Yowana u ɗa. Yowana ulobo wa Risa u ɗa. Risa ulobo wa̱ Zerubabe u ɗa. Zerubabe ulobo wa Shayatiya u ɗa. Shayatiya ulobo wa̱ Niri u ɗa. 
Niri ulobo wa Maliki u ɗa. Maliki ulobo wa Adi u ɗa. Adi ulobo wa Kosama u ɗa. Kosama ulobo wa Alamadama u ɗa. Alamadama ulobo wa̱ Iri u ɗa. 
Iri ulobo wa̱ Yosi u ɗa. Yosi ulobo wa Eliyaza u ɗa. Eliyaza ulobo wa Yorima u ɗa. Yorima ulobo wa Matata u ɗa. Matata ulobo wa̱ Levi u ɗa. 
Levi ulobo wa Saminu u ɗa. Saminu ulobo wa Yahuda u ɗa. Yahuda ulobo wa̱ Isuhu u ɗa. Isuhu ulobo wa̱ Yonana u ɗa. Yonana ulobo wa̱ Eliyaki u ɗa. 
Eliyaki ulobo wa Malaya u ɗa. Malaya ulobo wa Mena u ɗa. Mena ulobo wa Matata u ɗa. Matata ulobo wa Natan u ɗa. Natan ulobo wa̱ Da̱wuda u ɗa. 
Da̱wuda ulobo wa̱ Yese† u ɗa. Yese ulobo wa̱ Obe u ɗa. Obe ulobo wa Buwaza u ɗa. Buwaza ulobo wa Salumuna u ɗa. Salumuna ulobo wa Nashon u ɗa. 
Nashon ulobo wa Aminadabu u ɗa. Aminadabu ulobo wa Aram u ɗa. Aram ulobo wa̱ Hesuruna u ɗa. Hesuruna ulobo wa Farisa u ɗa. Farisa ulobo wa Yahuda u ɗa. 
Yahuda ulobo wa Yakubu u ɗa. Yakubu ulobo wa Ishiyaku u ɗa. Ishiyaku ulobo wa Ibrahim u ɗa. Ibrahim ulobo wa̱ Tera u ɗa. Tera ulobo wa Naho u ɗa. 
Naho ulobo wa̱ Seru u ɗa. Seru ulobo wa̱ Reyu u ɗa. Reyu ulobo wa̱ Fele u ɗa. Fele ulobo wa̱ Eba u ɗa. Eba ulobo wa̱ Shela u ɗa. 
Shela ulobo wa̱ Kena u ɗa. Kena ulobo wa Afasha u ɗa. Afasha ulobo wa̱ Shem u ɗa. Shem ulobo wa̱ Nuhu u ɗa. Nuhu† ulobo wa Lame u ɗa. 
Lame ulobo wa̱ Metusela u ɗa. Metusela ulobo wa Anuhu u ɗa. Anuhu ulobo wa Jare u ɗa. Jare ulobo wa Mahalalel u ɗa. Mahalalel ulobo wa̱ Kena u ɗa. 
Kena ulobo wa̱ Enos u ɗa. Enos ulobo wa̱ Shitu u ɗa. Shitu ulobo wa Ada̱mu.† Ada̱mu za na A̱sula̱ a yuwain.