1 Niꞌcã nʉmʉ dajaritero beꞌro tres nicã Pedro, Juã Õꞌacʉ̃ wiꞌi pajiri wiꞌipʉ ñubuerã waꞌacãrã niwã. Ti wiꞌipʉre ʉmʉcorinʉcʉ̃ ti horata Õꞌacʉ̃rẽ masã ñubuenuꞌcũcãꞌcãrã niwã. 2 Topʉ na waꞌasetirinʉcʉ̃ niꞌcʉ̃ masʉ̃ wĩꞌmagʉ̃pʉta dojoriwiꞌi sijamasĩtigʉ bajuaꞌcʉ dujicʉ niwĩ. Õꞌacʉ̃ wiꞌi sope pʉꞌto ne sãjãarõ masã cʉ̃rẽ miaa dʉpomʉjãcãrã niwã. Ti sope wãmeticaro niwʉ̃ Añurĩ Sope. Nipeꞌtirã sãjãarãnʉcʉ̃rẽ niyeru sẽrĩdujicʉ niwĩ. 3 To na sãjãacã ĩꞌagʉ̃, Pedro, Juãrẽ niyeru sẽrĩcʉ niwĩ. 4 Cʉ̃ tojo sẽrĩcã, na pʉarãpʉta cʉ̃rẽ ĩꞌacãrã niwã. Pedro peꞌe “Ĩꞌaña ʉ̃sãrẽ”, nicʉ niwĩ.

5 Cʉ̃ tojo nicãta, cʉ̃ narẽ pũrõ ĩꞌacʉ niwĩ. “Yʉꞌʉre niyeru, apeyenojõ oꞌorãtirã weesama”, ni wãcũcʉ nimiwĩ.

6 Pedro cʉ̃rẽ nicʉ niwĩ:

—Yʉꞌʉ niyeru mooꞌo. Moomigʉ̃ta, mʉꞌʉrẽ apeyenojõ añusere weetamugʉ̃ti. Jesucristo Nazarecjʉ̃ tutuaro meꞌrã mʉꞌʉrẽ sijacã weegʉti. 7 Tojo nígʉ̃ta, cʉ̃ dujigʉre diacjʉ̃camocãrẽ ñeꞌe, wejewãꞌcõnʉꞌcõcʉ niwĩ. Cʉ̃ wejewãꞌcõcãta, maata cʉ̃ dʉꞌpocãrĩ añua waꞌacʉ niwĩ.

8 Cʉ̃ sijamasĩtigʉ níꞌcʉ wãꞌcãnʉꞌcãgʉ̃ta, buꞌpumajã, sijanʉꞌcãcʉ niwĩ. Tojo buꞌpuma sijagʉta, Õꞌacʉ̃ wiꞌipʉ na meꞌrã sãjãacʉ niwĩ. Ti wiꞌipʉ sãjãejagʉ, eꞌcatise oꞌocʉ niwĩ Õꞌacʉ̃rẽ.

—Añuꞌu, Õꞌacʉ̃. Mʉꞌʉ niꞌcãrõacã yʉꞌʉre sijacã weeꞌe, nicʉ niwĩ.

9-10 Nipeꞌtirã Õꞌacʉ̃ wiꞌipʉ nirã́ cʉ̃rẽ ĩꞌamasĩcãꞌcãrã niwã.

—Sĩꞌi sõꞌo buꞌpuma sijagʉ Õꞌacʉ̃rẽ eꞌcatise oꞌogʉ Añurĩ Sopepʉ niyeru sẽrĩdujiꞌcʉta nimiba, nicãrã niwã. Cʉ̃rẽ ĩꞌamasĩ, beꞌro ĩꞌamarĩa waꞌacãrã niwã.

11 Sijamasĩtigʉ níꞌcʉ Pedro quẽꞌrãrẽ ne duꞌusĩꞌrĩticʉ niwĩ. Masã cʉ̃rẽ ĩꞌamarĩa, Pedro quẽꞌrã tiropʉ omasãjãacãrã niwã. To na nerẽrõ sope pʉꞌto tiꞌaya marĩrĩ tucũ nicaro niwʉ̃. Ti tucũ wãmeticaro niwʉ̃ Salomó tucũ.

12 Pedro masã cʉ̃ tiro omasãjãacã ĩꞌagʉ̃, narẽ aꞌtiro nicʉ niwĩ:

—¿Deꞌro weerã mʉsã tocãꞌrõ ĩꞌamarĩati? ¿Deꞌro weerã mʉsã ʉ̃sãrẽ pũrõ ĩꞌati? Mʉsã ʉ̃sãrẽ “Na añurã nitjĩarã, na tutuaro meꞌrã sijacã weema”, ¿niti? 13 Ʉ̃sã tutuaro mejẽta niapʉ. Jesú cʉ̃ tutuaro meꞌrã cʉ̃ sijamasĩtigʉ níꞌcʉ sijami. Marĩ ñecʉ̃sʉmʉa Abrahã, Isaa, Jacob, ãpẽrã marĩ ñecʉ̃sʉmʉa na wiogʉ níꞌcʉ nimi Õꞌacʉ̃ ʉꞌmʉsepʉ nigʉ̃́. Cʉ̃́ta tja “Yʉꞌʉ macʉ̃ añuyʉꞌrʉagʉ nimi” ni, tutuasere ĩꞌoami. Cʉ̃ macʉ̃ta ãꞌrĩ sijamasĩtigʉ níꞌcʉre sijacã weeami. Cʉ̃rẽta mʉsã wiorãrẽ oꞌowʉ. Pilato ĩꞌorõ mʉsã cʉ̃rẽ ʉatiwʉ. Cʉ̃ “Cʉ̃rẽ duꞌugʉti weeꞌe” nimicã, mʉsã “Duꞌuticãꞌña”, niwʉ̃. 14 Jesú añugʉ̃ ñaꞌase moogʉ̃ nimiwĩ. Cʉ̃ añugʉ̃ nimicã, mʉsã cʉ̃rẽ teewʉ. Jesure duꞌuwĩrõdutitiwʉ. Masʉ̃ ñaꞌagʉ̃ masãrẽ wẽjẽgʉ̃ peꞌere duꞌudutiwʉ Pilatore. 15 Jesú catise oꞌogʉ peꞌere wẽjẽdutiwʉ. Cʉ̃ pacʉ pũrĩcã cʉ̃ macʉ̃rẽ wẽrĩꞌcʉpʉre masõcʉ niwĩ. Cʉ̃ tojo weeꞌquere ʉ̃sã ĩꞌawʉ̃. 16 Jesúta cʉ̃ tutuaro meꞌrã ãꞌrĩ sijamasĩtigʉre sijacã weeami. Mʉsã ĩꞌamasĩgʉ̃ta nimi cʉ̃ sijamasĩtigʉ níꞌcʉ. Ʉ̃sã Jesucristore ẽjõpeorã niyucã, cʉ̃rẽ yʉꞌrʉoami mʉsã ĩꞌorõ. Ʉ̃sã mejẽta cʉ̃rẽ yʉꞌrʉoapʉ.

17 »Yʉꞌʉ acawererã, mʉsã Õꞌacʉ̃ macʉ̃ta nimi, ni tʉꞌomasĩtitjĩarã, Jesure wẽjẽdutiwʉ. Mʉsã wiorã quẽꞌrã mejãrõta weewã. 18 Dʉporopʉ Õꞌacʉ̃ cʉ̃ ye queti weremʉꞌtãrĩ masã nipeꞌtirãrẽ aꞌtiro wereduticʉ niwĩ: “ ‘Cristo yʉꞌʉ beseꞌcʉ piꞌetigʉsami’, nicʉ niwĩ Õꞌacʉ̃”, ni wereturiacãrã niwã. Mʉsã Jesure wẽjẽcã, na tojo ojaꞌcaronojõta waꞌawʉ. 19 Mʉsã ñaꞌarõ weesetiꞌquere bʉjawetiya. Bʉjaweti dʉcayuya. Õꞌacʉ̃ ʉaronojõ weeya. Tojo weecã, Õꞌacʉ̃ mʉsã ñaꞌarõ weeꞌquere acobojogʉsami. Acobojo, ejerisãjãcã weegʉsami. 20 Cʉ̃ beseꞌcʉre oꞌógʉsami. Cʉ̃ tojo weecã, aꞌti turipʉre apaturi aꞌtigʉsami tja. Cʉ̃ aꞌtiacjʉ Jesucristo Õꞌacʉ̃ beseꞌcʉ nimi. 21 Dʉporopʉ Õꞌacʉ̃ ye queti weremʉꞌtãrĩ masã aꞌtiro ni werecãrã niwã: “Õꞌacʉ̃ beseꞌcʉ ʉꞌmʉsepʉ tojánígʉ̃sami yujupʉ. Beꞌro Õꞌacʉ̃ aꞌti turire dʉcayugʉsami cʉ̃ ne waropʉ weeꞌcaronojõta. Cʉ̃ tojo weeatji dʉporo aꞌti turipʉre cʉ̃ macʉ̃ Jesucristore oꞌógʉsami.” 22 Dʉporopʉ Moisé Õꞌacʉ̃ ye queti weremʉꞌtãrĩ masʉ̃ marĩ ñecʉ̃sʉmʉarẽ aꞌtiro nicʉ niwĩ: “Beꞌropʉ marĩ wiogʉ Õꞌacʉ̃ niꞌcʉ̃ cʉ̃ ye queti wereacjʉre oꞌógʉsami. Cʉ̃ yʉꞌʉre oꞌóꞌcaro weronojõta cʉ̃rẽ oꞌógʉsami. Cʉ̃ quẽꞌrã marĩ acaweregʉ nigʉ̃sami. Mʉsã nipeꞌtise cʉ̃ weresere tʉꞌorã, añurõ tere ẽjõpeoya. 23 Cʉ̃ dutisere weesĩꞌrĩtirãnojõ wẽrĩrãsama. Õꞌacʉ̃ narẽ cõꞌagʉ̃sami. Ãpẽrã judío masã meꞌrã ne ninemosome majã”, nicʉ niwĩ Moisé. 24 Nipeꞌtirã dʉporocjãrãpʉ Õꞌacʉ̃ ye queti weremʉꞌtãrĩ masã niꞌcãrõacã waꞌasere ojamʉꞌtãcãrã niwã. “Beꞌropʉ tojo waꞌarosaꞌa”, ni ojacãrã niwã. Ne waro Samue wãmetigʉ tere ojamʉꞌtãcʉ niwĩ. Cʉ̃ beꞌrocjãrã quẽꞌrã mejãrõta ojabʉrocãrã niwã.

25 »Todʉporopʉ marĩ ñecʉ̃ Abrahãrẽ Õꞌacʉ̃ aꞌtiro nicʉ niwĩ: “Mʉꞌʉ pãrãmi nituriagʉ meꞌrã nipeꞌtirã aꞌti diꞌtacjãrãrẽ añurõ weegʉti.” Abrahãrẽ Õꞌacʉ̃ tojo níꞌquere ãpẽrã Õꞌacʉ̃ ye queti weremʉꞌtãrĩ masã marĩ ñecʉ̃sʉmʉarẽ wereturiacãrã niwã. Õꞌacʉ̃ cʉ̃ diaꞌcʉ̃ mejẽtare nigʉ̃ weetipĩ. Marĩ na pãrãmerã nituriarã nirã́ quẽꞌrãrẽ tojota nigʉ̃ weepĩ. 26 Cʉ̃ tojo níꞌcʉta marĩrẽ añurõ wéégʉ, marĩ judío masãrẽ cʉ̃ macʉ̃ wẽrĩꞌcʉpʉre masõ, oꞌómʉꞌtãcʉ niwĩ. Marĩ ñaꞌarõ weesere cõꞌa, duꞌudutigʉ tojo weecʉ niwĩ, nicʉ niwĩ Pedro.