1 Moisé, Aarṍ Israe curuacjãrã wiorã meꞌrã ucṹca beꞌro, faraṍ tiropʉ waꞌa, cʉ̃rẽ aꞌtiro nicãrã niwã:

—Õꞌacʉ̃, Israe curuacjãrã wiogʉ, mʉꞌʉrẽ aꞌtiro weredutiami: “Yarã masãrẽ masã marĩrõ, yucʉ marĩrõpʉ duꞌuoꞌoya. Na topʉ yʉꞌʉre eꞌcatipeorã, bosenʉmʉ weepeorãsama”, niami, nicãrã niwã.

2 Tere tʉꞌogʉ, faraṍ peꞌe aꞌtiro yʉꞌticʉ niwĩ:

—¿Noanojõ niti mʉsã wiogʉ nigʉ̃́? ¿Deꞌro wee cʉ̃ dutisere tʉꞌo, Israe curuacjãrãrẽ duꞌuwĩrõbosari? Mʉsã “ʉ̃sã wiogʉ Õꞌacʉ̃” mʉsã nigʉ̃rẽ masĩtisaꞌa. Tojo nicã Israe curuacjãrãrẽ ne duꞌuwĩrõsome, nicʉ niwĩ.

3 Faraṍ tojo nicã tʉꞌorã, Moisé, Aarṍ cʉ̃rẽ nicãrã niwã:

—Õꞌacʉ̃, hebreo masã wiogʉ, ʉ̃sãrẽ põtẽrĩgʉ̃ aꞌticʉ niami. Tojo weerã ʉ̃sã masã marĩrõ, yucʉ marĩrõpʉ waꞌarãsaꞌa. Iꞌtia nʉmʉ waꞌanoꞌrõsaꞌa. Topʉ ʉ̃sã wiogʉ Õꞌacʉ̃rẽ waꞌicʉrãrẽ wẽjẽ, ʉ̃jʉ̃amorõpeorã waꞌarãsaꞌa. Tojo weeticãma, duti pũrĩse meꞌrã ʉ̃sãrẽ buꞌiri daꞌregʉsami. Tojo weetigʉ, aꞌmewẽjẽse meꞌrã wẽrĩcã weegʉsami, nicãrã niwã.

4 Tere tʉꞌogʉ, faraṍ peꞌe aꞌtiro nicʉ niwĩ:

—Moisé, Aarṍ, ¿deꞌro weerã masãrẽ daꞌraduꞌucã weeti? Daꞌrarã waꞌato, nicʉ niwĩ.

5 Apeyere faraṍ nicʉ niwĩ:

—Niꞌcãrõacãma Israe curuacjãrã aꞌti diꞌtapʉre pãjãrã waro masãputima. ¿Na pãjãrãrẽ daꞌraduꞌucã weesĩꞌrĩrã weeti?

6 Na tojo níca nʉmʉrẽta faraṍ sʉꞌori daꞌrase dutiri masãrẽ, tojo nicã Israe curuacjãrã narẽ dutituriarãrẽ aꞌtiro duticʉ niwĩ:

7 —Mʉsã Israe curuacjãrãrẽ na wiꞌseri weerã yeese cujirire weedutirã, tábutire oꞌoticãꞌña majã. Na basu waꞌa weetjĩarã tábutire miirã waꞌato. 8 Todʉporo na wiꞌseri weerã yeeꞌque cujiri weeꞌcarocãꞌrota weeato tja. Ne niꞌcã cuji dʉoticãꞌto. Na nijĩsijarã bajuróma aꞌtiro caricũma: “Teꞌa, marĩ wiogʉ Õꞌacʉ̃rẽ eꞌcatipeorã, waꞌicʉrãrẽ wẽjẽ ʉ̃jʉ̃amorõpeorã waꞌarã”, nima. 9 Narẽ nemorõ tutuaro daꞌranemocã weeya. Tojo weese meꞌrã narẽ nisoo weresere wãcũsome, nicãrã niwã.

10 Tojo weerã sʉꞌori daꞌrase dutiri masã, tojo nicã Israe curuacjãrã narẽ dutituriarã Israe curuacjãrã wiorã tiropʉ masãrẽ weredutirã waꞌacãrã niwã:

—Faraṍ mʉsãrẽ niꞌcãcã meꞌrã ne tábutire oꞌonemodutitiami. 11 Niꞌcãrõacãrẽ mʉsã basuta tere mʉsã noꞌo bocaro aꞌmasijarã waꞌarãsaꞌa. Tojo weemirã, todʉporo mʉsã yeeꞌque cujirinʉcʉ̃ta yeerãsaꞌa tja. Ne dʉosome, nicãrã niwã.

12 Tere tʉꞌorã, Israe curuacjãrã nipeꞌtiro Egiptopʉ tábutire aꞌmarã waꞌacãrã niwã. 13 Faraṍ sʉꞌori daꞌrase dutiri masã, nipeꞌtise nʉmʉrĩ masãrẽ na todʉporo oꞌoꞌque cujiricãꞌrõta oꞌoduticãrã niwã. 14 Tojo nicã Egiptocjãrãta Israe curuacjãrã narẽ dutituriarãrẽ paamʉjã, aꞌtiro nicãrã niwã:

—¿Deꞌro weerã mʉsã ñamicaꞌa, niꞌcãcã quẽꞌrãrẽ todʉporopʉ mʉsã weeꞌcarocãꞌrõta te cujirire weerã ẽmʉejaweti? nicãrã niwã.

15 Israe curuacjãrã narẽ dutituriarã peꞌe faraṍ tiropʉ cʉ̃rẽ aꞌtiro ni wererã waꞌacãrã niwã:

—Wiogʉ, ʉ̃sã mʉꞌʉrẽ daꞌracoꞌterãrẽ ¿deꞌro weegʉ tojo ñaꞌarõ weeti? 16 Mʉꞌʉ yarã sʉꞌori daꞌrase dutiri masã ʉ̃sãrẽ tábutire oꞌotima. Tere oꞌotimirã, “Ticʉse cujiri weeya”, nima. Tojo nicã, ʉ̃sãrẽ paama. Ʉ̃sã mejẽta buꞌiritiꞌi. Wiogʉ, mʉꞌʉ yarã daꞌrase dutiri masã buꞌiritima, nicãrã niwã.

17 Faraṍ peꞌe narẽ yʉꞌticʉ niwĩ:

—Mʉsã nijĩsijarã niꞌi. Tojo weerã aꞌtiro ninuꞌcũꞌu: “Ʉ̃sã wiogʉ Õꞌacʉ̃rẽ waꞌicʉrãrẽ wẽjẽ, ʉ̃jʉ̃amorõpeorã waꞌacã duꞌuoꞌoya”, niꞌi. 18 Daꞌrarã waꞌaya majã. Mʉsãrẽ tábuti oꞌotimicã, todʉporo mʉsã yeeꞌque cujiricãꞌrõta yeeya, nicʉ niwĩ.

19 Israe curuacjãrã narẽ dutituriarã faraṍ “Ticʉse cujirita yeeya” nicã tʉꞌorã, diasaꞌro tʉꞌoñaꞌcãrã niwã. 20 Na faraṍ tiropʉ níꞌcãrã wijaarã, Moisére, Aarṍrẽ narẽ coꞌteꞌcãrãrẽ bocaejacãrã niwã. 21 Narẽ aꞌtiro nicãrã niwã:

—Õꞌacʉ̃ mʉsã weepetíyeꞌquere ĩꞌa, mʉsãrẽ buꞌiri daꞌreato. Faraṍ, tojo nicã ãpẽrã cʉ̃rẽ sʉꞌori daꞌrase dutiri masã ʉ̃sãrẽ ñaꞌarõ ĩꞌatuꞌtima. Mʉsã basuta cʉ̃rẽ diꞌpjĩ oꞌo, ʉ̃sãrẽ wẽjẽdutirã weronojõ weeapã. Tojo weerã mʉsãta buꞌiritiꞌi, nicãrã niwã.

22 Na tojo nicã tʉꞌogʉ, Moisé Õꞌacʉ̃rẽ aꞌtiro ni ñubue, sẽrĩcʉ niwĩ:

—Wiogʉ, ¿deꞌro weegʉ mʉꞌʉ ãꞌrã masãrẽ ñaꞌarõ weeti? ¿Deꞌro weedutigʉ yʉꞌʉre aꞌtopʉ aꞌtidutiati? 23 Mʉꞌʉ ye cjasere yʉꞌʉ faraṍ meꞌrã ucũnʉꞌcãca nʉmʉ meꞌrã, cʉ̃ mʉꞌʉ yarã masãrẽ nemorõ ñaꞌarõ weenuꞌcũcãꞌmi. Mʉꞌʉ peꞌe mʉꞌʉ yarã masãrẽ ne yʉꞌrʉweticã weeweꞌe, nicʉ niwĩ.