1 Õꞌacʉ̃ Moisére nicʉ niwĩ:

—Niꞌcãti faraṍrẽ, tojo nicã Egiptocjãrã masãrẽ buꞌiri daꞌretʉogʉtigʉ weeꞌe majã. Aꞌte beꞌro faraṍ mʉsãrẽ duꞌuoꞌogʉsami, duꞌuoꞌogʉ peꞌe. Mejõ nipeꞌtise mʉsã ye meꞌrã cõꞌawĩrõbutiagʉsami. 2 Niꞌcãrõacãrẽ Israe curuacjãrã ʉmʉarẽ, numiarẽ Egiptocjãrã na pʉꞌto nirãrẽ uru, plata meꞌrã weeꞌquere sẽrĩdutiya, nicʉ niwĩ.

3 Õꞌacʉ̃ Egiptocjãrãrẽ Israe curuacjãrãrẽ ĩꞌa, eꞌcaticã weecʉ niwĩ. Apeyema tja faraṍ docacjãrã wiorã, tojo nicã ti diꞌtacjãrã Moisére wiopesase meꞌrã ĩꞌacãrã niwã.

4 Moisé faraṍrẽ nicʉ niwĩ:

—Aꞌtiro niami Õꞌacʉ̃: “Ñami deco nicã nipeꞌtiro Egiptopʉre sijagʉsaꞌa. 5 Yʉꞌʉ to sijari curare nipeꞌtirã Egiptocjãrã põꞌrã masã maꞌmisʉmʉa faraṍ macʉ̃ cʉ̃rẽ wiogʉ sãjãdʉcayuacjʉ meꞌrã, téé cʉ̃rẽ daꞌracoꞌtego trigo ãrʉ̃agõ macʉ̃, tojo nicã waꞌicʉrã bajuamʉꞌtãꞌcãrã wẽrĩrãsama. 6 Tojo waꞌacã, nipeꞌtiro Egiptopʉre caricũ utirãsama. Todʉporopʉ ne niꞌcãti tocãꞌrõ utitiwã. Beꞌropʉ quẽꞌrãrẽ ne apaturi tocãꞌrõ utisome majã”, niami. 7 Israe curuacjãrã waꞌtero peꞌema ne niꞌcʉ̃ masʉ̃rẽ, ne niꞌcʉ̃ waꞌicʉre diayi tuꞌtisome. Tojo weese meꞌrã mʉsã Õꞌacʉ̃ Egiptocjãrãrẽ, Israe curuacjãrãrẽ dʉcawaasere masĩrãsaꞌa. 8 Beꞌro nipeꞌtirã mʉꞌʉ doca wiorã nirã́ yʉꞌʉ tiro aꞌti, ejaqueꞌatjĩarã, “Waꞌagʉsaꞌa nipeꞌtirã Israe curuacjãrã meꞌrã”, nirãsama. Na yʉꞌʉre tojo niticãma, yʉꞌʉ waꞌasome, nicʉ niwĩ Moisé.

Tojo nitoja, Moisé uase meꞌrã faraṍ ya wiꞌire wijaa waꞌacʉ niwĩ. 9 Beꞌro Õꞌacʉ̃ Moisére nicʉ niwĩ:

—Faraṍ mʉsã sẽrĩsere yʉꞌtisome. Cʉ̃ oꞌóticãma, yʉꞌʉ tutuasere weeĩꞌonemonoꞌrõsaꞌa Egipto diꞌtapʉre, nicʉ niwĩ Õꞌacʉ̃.

10 Moisé, Aarṍ meꞌrã Õꞌacʉ̃ níꞌcaronojõta faraṍrẽ peje weeĩꞌonemocãrã niwã. Õꞌacʉ̃ peꞌe faraṍrẽ narẽ yʉꞌrʉnʉꞌcãcã weecʉ niwĩ. Tojo weegʉ faraṍ Israe curuacjãrãrẽ duꞌuoꞌoticʉ niwĩ.