1 Iꞌtia nʉmʉ Felipere, Natanaerẽ Jesú pijíca beꞌro Galileapʉre Caná wãmetiri macãpʉ niꞌcʉ̃ omocã dʉꞌtewĩ. Cʉ̃rẽ bosenʉmʉ weepeowã. Jesú paco topʉ nico niwõ. 2 Ʉ̃sã quẽꞌrãrẽ Jesú meꞌrã pijiwã. 3 Na bosenʉmʉ weeri cura vino na sĩꞌrĩsere tojaqueꞌa waꞌawã. Tojo weego Jesú paco co macʉ̃rẽ niwõ:

—Macʉ̃, vino peꞌtia waꞌapʉ.

4 Cʉ̃ core yʉꞌtiwĩ:

—¿Deꞌro weeacjo yʉꞌʉre wereti? Yʉꞌʉ pacʉ cũuꞌque ejaweꞌe yʉꞌʉre yujupʉ, niwĩ.

5 Tojo nimicã, co peꞌe ti wiꞌi tĩacoꞌterãrẽ niwõ:

—Nipeꞌtise cʉ̃ dutisenʉcʉ̃ queoro weeya.

6 Topʉ seisparʉ ʉ̃tã meꞌrã weeꞌqueparʉ niwʉ̃. Judío masã ñaꞌasere coerã aco poseyeseparʉ niwʉ̃. Niꞌcãrʉ̃rẽ aco cincuenta o setenta litro sãjãseparʉ niwʉ̃. 7 Jesú ti wiꞌi tĩacoꞌterãrẽ niwĩ:

—Aꞌteparʉpʉ acore piosãaña.

Na cʉ̃ dutironojõta weewã. Teparʉre añurõ piosãamuꞌmuõꞌowã. 8 Tojo wééca beꞌro Jesú narẽ niwĩ:

—Cãꞌrõ bosenʉmʉ sʉꞌori weegʉ́ tiropʉ waamii, miaña, niwĩ.

Na “Jaʉ” ni, miawã.

9 Ti bosenʉmʉ sʉꞌori weegʉ́ Jesú weesere masĩticʉ niwĩ. Topʉ tĩacoꞌterã diaꞌcʉ̃ aco níꞌquere cʉ̃ vino dʉcayuꞌquere masĩwã. Ti bosenʉmʉ sʉꞌori weegʉ́ tere sĩꞌrĩñaꞌgʉ̃, omocã dʉꞌteꞌcʉre pijio, niwĩ:

10 —Ne waro vino tĩarã, añusere tĩamʉꞌtãsama. Pajiro sĩꞌrĩ́ca beꞌropʉ mejõ nisema tĩabuꞌipeosama. Mʉꞌʉ añuse vino peꞌere beꞌropʉ tĩadutiapã.

11 Jesú aꞌtere Galilea wãmetiro Caná wãmetiri macãpʉ weewĩ. Aꞌte ne waro cʉ̃ tutuaro meꞌrã weeĩꞌonʉꞌcãꞌque niꞌi. Tere ĩꞌarã, ʉ̃sã cʉ̃ buꞌerã cʉ̃rẽ ẽjõpeowʉ.

12 Tojo waꞌáca beꞌro Jesú Capernau wãmetiri macãpʉ waꞌawĩ. Cʉ̃ paco, cʉ̃ acabijirã cʉ̃ meꞌrã waꞌawã. Ʉ̃sã cʉ̃ buꞌerã quẽꞌrã waꞌawʉ. Ti macãpʉre ʉ̃sã pejeti nʉmʉrĩ niwʉ̃.

13 Judío masã bosenʉmʉ Pascua wãmetiri bosenʉmʉ dʉporo niwʉ̃. Ti bosenʉmʉ na ñecʉ̃sʉmʉa Egiptopʉ níꞌcãrã wijaꞌquere wãcũrĩ bosenʉmʉ niwʉ̃. Ti bosenʉmʉ dʉporoacã Jesú Jerusalẽ́pʉ waꞌawĩ. 14 Topʉ etagʉ, Õꞌacʉ̃ wiꞌipʉ waꞌawĩ. Ti wiꞌipʉre waꞌicʉrã duarãrẽ ĩꞌawĩ. Na wecʉare, ovejare, tojo nicã bujare duawã. Na wẽjẽ, Õꞌacʉ̃rẽ ʉ̃jʉ̃amorõpeoajã niwã. Ãpẽrã quẽꞌrã apeye diꞌta cjasere niyeru dʉcayuri masã topʉ dujiwã. 15 Na tojo weecã ĩꞌagʉ̃, Jesú tãrãrĩ dare apowĩ. Ti da meꞌrã waꞌicʉrã duarãrẽ, na yarã ovejare, wecʉare tãrãnʉrʉ̃wĩrõpeꞌocãꞌwĩ. Niyeru dʉcayuri masã peꞌere niyerure ṍrẽ́stedijowĩ. Na ye mesarire tuuquecũupeꞌocãꞌwĩ. 16 Buja duarãrẽ niwĩ:

—Ãꞌrãrẽ miiwijaaya. Yʉꞌʉ pacʉ ya wiꞌire duari wiꞌi weeticãꞌña.

17 Cʉ̃ tojo weecã ĩꞌarã, todʉporocjʉ̃ Davi cʉ̃ ojaꞌquere ʉ̃sã wãcũwʉ̃. Cʉ̃ aꞌtiro ojacʉ niwĩ:

18 Judío masã wiorã cʉ̃ cõꞌawĩrõcã ĩꞌarã, Jesure sẽrĩtiñaꞌwã:

—¿Noanojõ dutiro meꞌrã mʉꞌʉ duari masãrẽ cõꞌawĩrõmasĩti? Mʉꞌʉ tojo weemasĩsere weeĩꞌose meꞌrã ĩꞌoña ʉ̃sãrẽ.

19 Jesú narẽ yʉꞌtiwĩ:

—Aꞌti wiꞌire cõꞌacãꞌña. Iꞌtia nʉmʉ beꞌro yʉꞌʉ apogʉti tja.

20 Wiorã cʉ̃rẽ niwã:

—Basioweꞌe. Aꞌti wiꞌire wéérã, cuarenta y seis cʉ̃ꞌmarĩ yoogowã. ¿Mʉꞌʉ peꞌe iꞌtia nʉmʉ beꞌro tuꞌajanʉꞌcõgʉ̃sari tja? niwã.

21 Jesú ti wiꞌire ucũgʉ̃, cʉ̃ ya upʉre ucũgʉ̃ weewĩ. 22 Ʉ̃sã cʉ̃ ucũꞌquere cʉ̃ wẽrĩ masã́ca beꞌropʉ tʉꞌomasĩwʉ̃. Tere wãcũrã, cʉ̃ ucũꞌquere “Diacjʉ̃ta nipĩ”, ni ẽjõpeowʉ. Tojo nicã Õꞌacʉ̃ ye queti ojáca pũrĩpʉ cʉ̃rẽ ojaꞌque quẽꞌrãrẽ ẽjõpeowʉ.

23 Pãjãrã Jerusalẽ́pʉ Pascua bosenʉmʉrẽ nerẽwã. Na Jesú tutuaro meꞌrã weeĩꞌosere ĩꞌawã. Tere ĩꞌarã, Õꞌacʉ̃ oꞌóꞌcʉ nimi nírã, cʉ̃rẽ ẽjõpeowã. 24-25 Jesú peꞌe narẽ ĩꞌamasĩpeꞌogʉ, ne ãpẽrã werero marĩrõ cʉ̃ basu masã na wãcũsere masĩpeꞌocãꞌwĩ. Tojo weegʉ cʉ̃ “Yʉꞌʉre ẽjõpeoma”, nitiwĩ.