1 Judío masã bosenʉmʉ Pascua waꞌatjo niꞌcã nʉmʉ dʉꞌsawʉ. Jesú cʉ̃ aꞌti turipʉ níꞌcʉ maata cʉ̃ pacʉ tiropʉ waꞌatjere masĩtojawĩ. Cʉ̃, cʉ̃ yarã aꞌti nucũcãcjãrãrẽ maꞌinuꞌcũcãꞌwĩ. Cʉ̃ wẽrĩse meꞌrã cʉ̃ ʉpʉtʉ maꞌisere ĩꞌowĩ.

2-4 Juda Iscariote, Simó macʉ̃rẽ wãtĩ aꞌtiro wãcũse oꞌocʉ niwĩ. Jesure ĩꞌatuꞌtirãpʉre oꞌoduticʉ niwĩ. Jesú peꞌe pũrĩcã cʉ̃ Õꞌacʉ̃ tiropʉ níꞌcʉ aꞌtiwʉ nisere masĩwĩ. Tojo nicã topʉ cʉ̃ dajatojaatjere, cʉ̃ pacʉ cʉ̃rẽ wiogʉ sõrõatje quẽꞌrãrẽ masĩwĩ. Aꞌtiro wéégʉ, ʉ̃sã baꞌadujiri cura Jesú wãꞌcãnʉꞌcã, cʉ̃ suꞌti buꞌicjãrõrẽ tuweecũuwĩ. Beꞌro marĩ ejerituwʉaropʉ tuucoeri caserore dʉꞌteõꞌowĩ. 5 Tuꞌajanʉꞌcõ, acore bapapʉ piosãawĩ. Te meꞌrã ʉ̃sã ye dʉꞌpocãrĩrẽ coenʉꞌcãwĩ. Beꞌro ti casero meꞌrã bopowĩ.

6 Cʉ̃ Simó Pedro ye dʉꞌpocãrĩrẽ coenʉꞌcãrĩ cura Pedro cʉ̃rẽ niwĩ:

—Wiogʉ, ¿yé dʉꞌpocãrĩrẽ coegʉsari?

7 Jesú cʉ̃rẽ niwĩ:

—Niꞌcãrõacã yʉꞌʉ weesere mʉꞌʉ tʉꞌomasĩtisaꞌa. Beꞌropʉ masĩgʉ̃saꞌa.

8 Pedro cʉ̃rẽ niwĩ:

—Yé dʉꞌpocãrĩrẽ mʉꞌʉ ne coesome.

Jesú cʉ̃rẽ niwĩ:

—Yʉꞌʉ coeticã, mʉꞌʉ yʉꞌʉ meꞌrãcjʉ̃ nisome.

9 Simó Pedro cʉ̃rẽ niwĩ:

—To pũrĩcãrẽ yé dʉꞌpocãrĩrẽ coegʉ, yé omocãrĩ, ya dʉpoa quẽꞌrãrẽ coeya.

10 Jesú peꞌe cʉ̃rẽ niwĩ:

—Marĩ uꞌáca beꞌro apaturi uꞌaapoya marĩsaꞌa. Sijáca beꞌro dʉꞌpocãrĩ diaꞌcʉ̃rẽ tuucoenoꞌsaꞌa. Mʉsã ũꞌirĩ marĩrã weronojõ niꞌi. Tojo nimicã, niꞌcʉ̃ mʉsã waꞌteropʉre ñaꞌagʉ̃ ũꞌirĩtigʉ weronojõ nimi, niwĩ Jesú.

11 Jesú cʉ̃rẽ ĩꞌatuꞌtirãpʉre oꞌoacjʉre masĩtojawĩ. Tojo weegʉ tojo niwĩ.

12 Ʉ̃sã ye dʉꞌpocãrĩrẽ coéca beꞌro cʉ̃ buꞌicjãrõ suꞌtirore sãña, ejanujãwĩ tja. Ʉ̃sãrẽ niwĩ:

—¿Mʉsã yʉꞌʉ weesere tʉꞌomasĩti? 13 Mʉsã yʉꞌʉre “Wiogʉ, ʉ̃sãrẽ buꞌegʉ” ni pisuꞌu. Tojota niꞌi mʉsã nírõnojõta. 14 Yʉꞌʉ mʉsã wiogʉ, mʉsãrẽ buꞌegʉ nimigʉ̃, mʉsã ye dʉꞌpocãrĩrẽ coeapʉ. Tojo weerã mʉsã quẽꞌrã mejãrõta weeya. 15 Mʉsãrẽ yʉꞌʉ weeꞌquere ĩꞌacũu, weesirutuato nígʉ̃ aꞌte queosere weeĩꞌoapʉ. Aꞌmerĩ añurõ weeya. 16 Mʉsãrẽ diacjʉ̃ weregʉti. Ne niꞌcʉ̃ daꞌracoꞌtegʉ “Yʉꞌʉ wiogʉ yʉꞌrʉoro niꞌi”, nímasĩtisami. Niꞌcʉ̃ oꞌónoꞌcʉ quẽꞌrã cʉ̃rẽ oꞌóꞌcʉ yʉꞌrʉoro nitisami. 17 Mʉsã yʉꞌʉ dʉꞌpocãrĩ coesere masĩrã, aꞌte yʉꞌʉ weeꞌquere wéérã, eꞌcatirãsaꞌa.

18 »Yʉꞌʉ mʉsã nipeꞌtirãpʉre ucũgʉ̃ weeweꞌe. Yʉꞌʉ beseꞌcãrãrẽ masĩꞌi. Õꞌacʉ̃ ye queti ojáca pũrĩpʉ nírõnojõta queoro waꞌarosaꞌa. Aꞌtiro ojanoꞌwʉ̃: “Yʉꞌʉ meꞌrã baꞌadujimigʉ̃, yʉꞌʉre aꞌpepũrĩmi”, ni ojanoꞌcaro niwʉ̃. 19 Yʉꞌʉ mʉsãrẽ wereyugʉ weeꞌe. Tojo weerã yʉꞌʉ níꞌque queoro waꞌacã, aꞌtiro nirãsaꞌa: “Diacjʉ̃ta Õꞌacʉ̃ oꞌóꞌcʉ nipĩ”, nirãsaꞌa. 20 Mʉsãrẽ queoro weregʉti. Yʉꞌʉ oꞌóꞌcãrã weresere tʉꞌo ẽjõpeorã, yʉꞌʉ quẽꞌrãrẽ ẽjõpeorãta weesama. Yʉꞌʉre ẽjõpeorã, yʉꞌʉre oꞌóꞌcʉ quẽꞌrãrẽ ẽjõpeosama, niwĩ Jesú.

21 Jesú ʉ̃sãrẽ wéréca beꞌro ʉpʉtʉ bʉjawetiwĩ. Tʉꞌota basiorota werewĩ:

—Diacjʉ̃ta nigʉ̃ti. Niꞌcʉ̃ mʉsã waꞌteropʉ yʉꞌʉre ĩꞌatuꞌtirãrẽ oꞌogʉsami, niwĩ.

22 Cʉ̃ tojo nicã tʉꞌorã, ʉ̃sã ¿noarẽ tojo nigʉ̃ weeti? nírã, mejõ aꞌmerĩ ĩꞌadujicãꞌwʉ̃. 23 Yʉꞌʉ Juã Jesú maꞌinoꞌgʉ̃ cʉ̃ pʉꞌto dujiwʉ. 24 Tojo weegʉ Simó Pedro Jesure sẽrĩtiñaꞌdutigʉ sĩ́opuawĩ. 25 Yʉꞌʉ cʉ̃ pʉꞌtoacã muꞌrĩwã, cʉ̃rẽ sẽrĩtiñaꞌwʉ̃:

—Wiogʉ, ¿noanojõ niti cʉ̃?

26 Jesú yʉꞌʉre niwĩ:

—Yʉꞌʉ pã́ yosóoꞌonoꞌgʉ̃ nigʉ̃sami. Cʉ̃ tojo níca beꞌro Simó macʉ̃ Juda Iscariotere yosóoꞌowĩ. 27 Cʉ̃ tojo wééca beꞌro wãtĩ Judare sãjãacʉ niwĩ. Jesú cʉ̃rẽ niwĩ:

—Mʉꞌʉ weeatjere weebaqueꞌoya.

28 Ʉ̃sã nipeꞌtirã topʉ baꞌadujirã, cʉ̃ tojo nisere tʉꞌomasĩticãti. 29 Niꞌcãrẽrã aꞌtiro wãcũwʉ̃: “Juda cʉ̃ niyerure coꞌtegʉ niyucã, Jesú cʉ̃rẽ apeyenojõ bosenʉmʉ cjasere duudutigʉ weeapĩ, o pajasecʉorãrẽ niyeru oꞌodutigʉ oꞌodutiapĩ”, niwʉ̃. 30 Juda cʉ̃ pã́rẽ ñeꞌéca beꞌro ʉ̃sã tiropʉ níꞌcʉ wijaa waꞌawĩ. Cʉ̃ wijaari cura ñamipʉ niwʉ̃.

31 Juda waꞌáca beꞌro Jesú ʉ̃sãrẽ niwĩ:

—Niꞌcãrõacã yʉꞌʉ Õꞌacʉ̃ macʉ̃ masʉ̃ weronojõ upʉtigʉpʉre yʉꞌʉ tutuasere ĩꞌonoꞌrõsaꞌa. Õꞌacʉ̃ tutuase quẽꞌrã yʉꞌʉ meꞌrãta ĩꞌonoꞌrõsaꞌa. 32 Yʉꞌʉ Õꞌacʉ̃ tutuasere ĩꞌocã, cʉ̃ quẽꞌrã yʉꞌʉ tutuasere maata ĩꞌogʉ̃sami. 33 Yʉꞌʉ meꞌrãcjãrã, cãꞌrõ mʉsã meꞌrã nitʉogʉsaꞌa. Mʉsã yʉꞌʉre aꞌmarãsaꞌa. Yʉꞌʉ judío masãrẽ todʉporopʉre níꞌcaronojõta mʉsãrẽ niꞌcãrõacã nigʉ̃ti. Yʉꞌʉ waꞌatjopʉre mʉsã waꞌamasĩtisaꞌa. 34 Mʉsãrẽ apeye maꞌma dutise cũugʉ̃ti. Yʉꞌʉ mʉsãrẽ maꞌirõnojõta aꞌmerĩ maꞌiña. 35 Mʉsã aꞌmerĩ maꞌicã, ãpẽrã nipeꞌtirã mʉsãrẽ yʉꞌʉ buꞌerã nisere masĩrãsama, niwĩ Jesú.

36 Simó Pedro cʉ̃rẽ sẽrĩtiñaꞌwĩ:

—Wiogʉ, ¿noꞌopʉ waꞌagʉsari?

Jesú cʉ̃rẽ niwĩ:

—Niꞌcãrõacã yʉꞌʉ waꞌatjopʉre mʉꞌʉ waꞌamasĩtisaꞌa. Beꞌropʉ yʉꞌʉre sirutugʉsaꞌa.

37 Pedro cʉ̃rẽ niwĩ tja:

—Wiogʉ, ¿deꞌro weeacjʉ yʉꞌʉ mʉꞌʉ meꞌrã maata waꞌamasĩtisari? Yʉꞌʉ quẽꞌrã mʉꞌʉ meꞌrãta wẽrĩmasĩꞌi.

38 Jesú cʉ̃rẽ niwĩ:

—¿Nirõta yʉꞌʉ meꞌrã wẽrĩmasĩti? Mʉꞌʉrẽ diacjʉ̃ta nigʉ̃ti. Cãrẽꞌquẽ cʉ̃ uuati dʉporo yʉꞌʉre iꞌtiati “Cʉ̃rẽ masĩweꞌe”, nigʉ̃saꞌa, niwĩ Jesú.