1 Beꞌro Jesú Tiberia wãmetiri ditara sumutopʉ ʉ̃sãrẽ apaturi bajuawĩ. Aꞌtiro waꞌawʉ. 2 Ʉ̃sã topʉre nirã́ aꞌticʉrã niwʉ̃: Simó Pedro, Tomás “Sʉꞌrʉaꞌcʉ” na nigʉ̃́, tojo nicã Natanae Galilea diꞌtacjʉ̃ Caná wãmetiri macãcjʉ̃. Ãpẽrã quẽꞌrã ʉ̃sã pʉarã Zebedeo põꞌrã niwʉ̃. Tojo nicã ãpẽrã pʉarã Jesú buꞌerã ninemowã.

3 Ʉ̃sã topʉ nirĩ cura Simó Pedro ʉ̃sãrẽ niwĩ:

—Waꞌi wẽjẽgʉ̃ waꞌagʉti.

Ʉ̃sã cʉ̃rẽ niwʉ̃:

—Ʉ̃sã quẽꞌrã waꞌarãti, niwʉ̃.

Ʉ̃sã waꞌa, yucʉsʉpʉ mʉjãsãjãwʉ̃. Ti ñamirẽ waꞌi wẽjẽboꞌreamiwʉ̃. Ne wẽjẽticãti.

4 Boꞌrequeꞌawãꞌcãtiri cura Jesú ti ditara sumutopʉ bajuawĩ. Ʉ̃sã cʉ̃rẽ ĩꞌamasĩtiwʉ. 5 Cʉ̃ ʉ̃sãrẽ niwĩ:

—¿Wẽjẽati? niwĩ.

—Wẽjẽtiasʉ, niwʉ̃.

6 Ʉ̃sã tojo nicã tʉꞌogʉ, ʉ̃sãrẽ niwĩ:

—Diacjʉ̃ peꞌe doqueñoña mʉsã wejecʉre. Tojo weerã wẽjẽrãsaꞌa. Cʉ̃ dutironojõta weewʉ. Pãjãrã waro wẽjẽwʉ̃. Ne wejecʉre wãꞌcõticãti. 7 Tojo waꞌacã ĩꞌagʉ̃, yʉꞌʉ Jesú ʉpʉtʉ maꞌinoꞌgʉ̃ Pedrore niwʉ̃:

—Marĩ wiogʉ nimi.

Yʉꞌʉ tojo nicã tʉꞌogʉ, Simó Pedro suꞌtiro buꞌicjãrõrẽ wejesãñawĩ. Jesú tiropʉ waꞌagʉ, doqueñojãwĩ.

8 Ʉ̃sã peꞌe yucʉsʉ meꞌrã sumutopʉ waꞌire wejenʉjãwʉ̃. Ʉ̃sã cien metros yoaro decopʉ paꞌsawʉ. 9 Topʉ nʉjãtarã, pecameꞌe cʉ̃ wĩjã́ca meꞌerẽ ĩꞌawʉ̃. Ti meꞌepʉ niꞌcʉ̃ waꞌi pʉ̃ꞌonʉꞌcõnoꞌwʉ̃. Pã́ quẽꞌrã niwʉ̃. 10 Jesú ʉ̃sãrẽ niwĩ:

—Waꞌi mʉsã wẽjẽꞌcãrãrẽ miitia.

11 Cʉ̃ tojo nicã, Simó Pedro yucʉsʉpʉ mʉjãsãjãa, waꞌire wejemajãwĩ nucũporopʉ. Waꞌi pacarã ciento cincuenta y tres sãjãawã. Ticʉrã pãjãrã sãjãamicã, wejecʉ tʉ̃ꞌrʉ̃tiwʉ. 12 Jesú ʉ̃sãrẽ niwĩ:

—Baꞌarã aꞌtia.

Ʉ̃sã cʉ̃rẽ ĩꞌamasĩrã, ne niꞌcʉ̃pʉta “¿Noanojõ niti mʉꞌʉ?” ni sẽrĩtiñaꞌmaꞌatiwʉ. 13 Jesú pã́rẽ ʉ̃sãrẽ etiwĩ. Waꞌi quẽꞌrãrẽ etiwĩ.

14 Jesú masã́ca beꞌro pʉati ʉ̃sãrẽ bajuatojawĩ. Niꞌcãrõacã meꞌrã iꞌtiati waꞌaro weewʉ.

15 Ʉ̃sã baꞌáca beꞌro Jesú Simó Pedrore sẽrĩtiñaꞌwĩ:

—¿Simó, Joná macʉ̃, mʉꞌʉ ãꞌrã yʉꞌrʉoro yʉꞌʉre maꞌiyʉꞌrʉnʉꞌcãti?

Pedro cʉ̃rẽ niwĩ:

—Ʉ̃ʉ, wiogʉ, mʉꞌʉ masĩꞌi yʉꞌʉ mʉꞌʉrẽ maꞌisere.

Jesú cʉ̃rẽ niwĩ:

—To pũrĩcãrẽ yʉꞌʉre ẽjõpeorãrẽ coꞌteya. Narẽ buꞌeya.

16 Apaturi Pedrore sẽrĩtiñaꞌnemowĩ:

—¿Simó, Joná macʉ̃, yʉꞌʉre maꞌiti?

—Ʉ̃ʉ, mʉꞌʉ masĩꞌi yʉꞌʉ mʉꞌʉrẽ maꞌisere.

Jesú niwĩ tja:

—To pũrĩcãrẽ yarãrẽ buꞌeya. Narẽ coꞌteya.

17 Apaturi ninemowĩ tja:

—¿Simó, Joná macʉ̃, yʉꞌʉre mʉꞌʉ maꞌiti?

Jesú iꞌtiati cʉ̃rẽ sẽrĩtiñaꞌcã ĩꞌagʉ̃, Pedro pũrõ bʉjawetiwĩ. Cʉ̃rẽ niwĩ:

—Wiogʉ, nipeꞌtisere mʉꞌʉ masĩꞌi. Masĩꞌi yʉꞌʉ mʉꞌʉrẽ maꞌisere.

Jesú cʉ̃rẽ niwĩ:

—To pũrĩcãrẽ narẽ buꞌeya. Narẽ coꞌteya, niwĩ tja. 18 Mʉꞌʉrẽ diacjʉ̃ta nigʉ̃ti. Mʉꞌʉ maꞌmʉ nígʉ̃, mʉꞌʉ ʉaro suꞌtirore sãña, mʉꞌʉ noꞌo waꞌasĩꞌrĩrõ waꞌacũwʉ̃. Beꞌro mʉꞌʉ bʉcʉ ẽjãgʉ̃, mʉꞌʉ ye omocãrĩrẽ sĩomorõgʉ̃saꞌa. Apĩ mʉꞌʉrẽ suꞌti sãa, mʉꞌʉ waꞌasĩꞌrĩtiro miagʉ̃sami.

19 Jesú tojo nígʉ̃, Pedro cʉ̃ deꞌro waꞌa wẽrĩatjere nígʉ̃, tojo niwĩ. Cʉ̃ wẽrĩse meꞌrã masã Õꞌacʉ̃rẽ añurõ ucũrãsama nígʉ̃, tojo niwĩ.

Beꞌro Jesú cʉ̃rẽ niwĩ:

—Yʉꞌʉre ẽjõpeosirutunuꞌcũcãꞌña.

20 Beꞌro Pedro majãmiĩꞌagʉ̃, yʉꞌʉ na beꞌro sirutucã ĩꞌawĩ. Yʉꞌʉ Jesú maꞌinoꞌgʉ̃ niwʉ̃. Yʉꞌʉta todʉporo ʉ̃sã baꞌatʉocatero “¿Noa mʉꞌʉrẽ ĩꞌatuꞌtirãpʉre oꞌorosari?” ni sẽrĩtiñaꞌwʉ̃. 21 Pedro yʉꞌʉre ĩꞌagʉ̃, Jesure sẽrĩtiñaꞌwĩ:

—Wiogʉ, ãꞌrĩ warore ¿deꞌro waꞌarosari?

22 Jesú cʉ̃rẽ niwĩ:

—Cʉ̃ maata wẽrĩcã, mʉꞌʉ ye cjase mejẽta niꞌi. Cʉ̃ yʉꞌʉ apaturi aꞌtiri curapʉ catitʉocã quẽꞌrãrẽ mʉꞌʉ ye cjase mejẽta niꞌi. Wãcũnʉrʉ̃tigʉta. Mʉꞌʉ yʉꞌʉre sirutuya, niwĩ.

23 Jesú tojo níꞌquere tʉꞌorã, cʉ̃rẽ ẽjõpeorã yʉꞌʉre “Cʉ̃ ne wẽrĩsome” nise seꞌsa waꞌawʉ. Jesú yʉꞌʉre “Cʉ̃ wẽrĩsome”, nitiwĩ. Aꞌtiro peꞌe niwĩ: “Yʉꞌʉ apaturi aꞌtiri curapʉ catitʉocã, mʉꞌʉ ye cjase mejẽta niꞌi”, niwĩ Pedrore.

24 Yʉꞌʉ Juã niꞌi. Yʉꞌʉ ĩꞌaꞌquere ojaꞌa. Tojo weero “Diacjʉ̃ta niꞌi”, ni masĩnoꞌo.

25 Apeye Jesú weenemoꞌque peje niꞌi. Yʉꞌʉ tʉꞌoñaꞌcã, cʉ̃ weeꞌquenʉcʉ̃ ojacãma, peje pũrĩ waro yʉꞌrʉoquejocãꞌbosaꞌa.