1 Õꞌacʉ̃ diaꞌcʉ̃ aꞌti nucũcãcjãrã wiorã dutirãrẽ sõrõmi. Cʉ̃ cũuꞌcãrã nima. Tojo weerã nipeꞌtirã añurõ yʉꞌtiya narẽ. 2 Noꞌo cʉ̃ wiorãrẽ yʉꞌrʉnʉꞌcãgʉ̃, Õꞌacʉ̃ dutiꞌquere yʉꞌrʉnʉꞌcãgʉ̃ta weemi. Mʉsã waꞌtero nirã́ wiorã mʉsãrẽ duticã ʉami. Tojo weegʉ narẽ yʉꞌrʉnʉꞌcãrãrẽ Õꞌacʉ̃ buꞌiri daꞌregʉsami. 3 Wiorã añurõ weerãrẽ uise oꞌotima. Ñaꞌarõ weerã́ peꞌere uise oꞌosama. Uitirãta nisetisĩꞌrĩrã, añurõ weeya. Mʉsã tojo weecã, wiorã “Mʉsã añurõ weeꞌe”, nirãsama. 4 Õꞌacʉ̃ mʉsã ye niatjere narẽ sõrõcʉ niwĩ. Tojo weerã ñaꞌarõ wéérã pũrĩcã, uiya. Wiorã ñaꞌarõ weerãrẽ buꞌiri daꞌrerã, Õꞌacʉ̃ dutiro weerã weema. Õꞌacʉ̃ ñaꞌarõ weerãrẽ buꞌiri daꞌredutigʉ wiorãrẽ cũucʉ niwĩ. 5 Tojo weerã marĩ wiorã dutisere yʉꞌtiroʉaꞌa. Buꞌiri daꞌreri nírã diaꞌcʉ̃, yʉꞌtiticãꞌrõʉaꞌa. Õꞌacʉ̃ marĩrẽ wiorã duticã ʉami nírã peꞌe, na dutisere queoro yʉꞌtimeꞌrĩcãꞌrõʉaꞌa. 6 Wiorã na daꞌrasere queoro wéérã, Õꞌacʉ̃rẽ daꞌracoꞌterã weronojõ nima. Tojo weerã na wapayedutisenojõrẽ wapayeya.

7 Na wiorã dutisereta queoro weeya. Na wapayeduticã, wapayeya. Na wiorã nise buꞌiri wiopesase meꞌrã narẽ ĩꞌaña. Narẽ añurõ wãcũña.

8 Ãpẽrãrẽ wapamooticãꞌña. Maata wapayepeꞌocãꞌña. Aꞌmerĩ maꞌise peꞌe peꞌtimasĩtisaꞌa. Tojo weerã aꞌmerĩ maꞌinuꞌcũcãꞌña. Noꞌo ãpẽrãrẽ maigʉ̃nojõ Õꞌacʉ̃ dutise cũuꞌquere queoro weegʉ weemi. 9 Õꞌacʉ̃ aꞌtere dutise cũucʉ niwĩ. “Mʉsã nʉmosãnumia nitirãrẽ, marãpʉsʉmʉa nitirãrẽ aꞌmetãrãticãꞌña. Ãpẽrãrẽ wẽjẽcõꞌaticãꞌña. Yajaticãꞌña. Ãpẽrã yere ʉoticãꞌña” ni, dutise cũucʉ niwĩ. Aꞌte, tojo nicã nipeꞌtise apeye dutise cũuꞌquere niꞌcãrõpʉta neonʉꞌcõmasĩꞌi. Aꞌtiro niꞌi. Mʉsã, mʉsã basu maꞌirõnojõta mʉsã tiropʉ nirãrẽ maꞌiña, niꞌi. 10 Marĩ maꞌise cʉorã, marĩ tiropʉ nirãrẽ ñaꞌarõ weesome. Tojo weerã narẽ maꞌírã, Õꞌacʉ̃ dutise cũuꞌquere weepeꞌocãꞌa.

11 Aꞌtere niꞌcãrõacã marĩ catiriterore wãcũrõʉaꞌa. Cãrĩrã weronojõ niticãꞌrã. Jesú cʉ̃ apaturi aꞌtiatjere añurõ tʉꞌoñaꞌa, wãcũnʉrʉ̃rã. Marĩ Õꞌacʉ̃ tiropʉ waꞌatjo cãꞌrõacã dʉꞌsasaꞌa. Marĩ ne waro Jesucristore ẽjõpeowãꞌcõrã, “Ʉꞌmʉsepʉ marĩ waꞌatje dʉꞌsayʉꞌrʉaꞌa”, nimiwʉ̃. Niꞌcãrõacãrẽ marĩ masĩꞌi. “Cãꞌrõacã dʉꞌsaꞌa Jesucristo apaturi aꞌtiatje”, niꞌi. 12 Aꞌtiro nicãrẽ ñaꞌarõ weese yʉꞌrʉmajã waꞌaꞌa. Niꞌcãrõacãrẽ boꞌremʉjãtiro weronojõ Jesucristo aꞌtiatjo cãꞌrõ dʉꞌsaꞌa. Tojo weerã marĩ ñaꞌasere masã ñamipʉ weewʉasenojõrẽ weeduꞌuroʉaꞌa. Aꞌtiro peꞌe weeroʉaꞌa. Añuse, ʉmʉco masã ĩꞌorõpʉ weesenojõ diaꞌcʉ̃rẽ weeroʉaꞌa. Marĩ Õꞌacʉ̃ yere wéérã, ñaꞌarõ weesere duꞌupeꞌocãꞌrãsaꞌa. 13 Ʉmʉco, bajuyoropʉ weesetironojõ weeroʉaꞌa. Bosenʉmʉ nicã queꞌa, caricũticãꞌrã. Numia meꞌrã ñaꞌarõ weeticãꞌrã. Numia quẽꞌrã, ʉmʉa meꞌrã ñaꞌarõ weeticãꞌña. Aꞌpepũrĩse meꞌrã tʉꞌoñaꞌticãꞌrã. Ãpẽrã yere ʉoticãꞌrã. 14 Aꞌtiro peꞌe weerã. Marĩ wiogʉ Jesucristo weetamuse meꞌrã cʉ̃ weronojõ añurõ nisetirã. Cʉ̃rẽ nemorõ masĩnemorã. Marĩ ñaꞌarõ ʉaripejasere weesĩꞌrĩrã, “Aꞌtiro weerãti”, ni wãcũticãꞌrã. Tere weeduꞌurã.