1 Beꞌro Booz ti macã sãjãrĩ sope pʉꞌtopʉ waꞌa, dujicʉ niwĩ. Topʉ masã nerẽwʉacãrã niwã. Cʉ̃ topʉ dujiri curare Booz Rure “Apĩ mʉsã acaweregʉ waro mʉsãrẽ coꞌteacjʉ nisami” níꞌcʉ yʉꞌrʉacʉ niwĩ.

Booz cʉ̃rẽ ĩꞌagʉ̃, “Aꞌto dujigʉ aꞌtia”, nicʉ niwĩ. Cʉ̃ tojo nicã tʉꞌogʉ, cʉ̃ tiro waꞌa, ejanujãcʉ niwĩ. 2 Beꞌro Booz diez bʉcʉrã wiorãrẽ, ti macãcjãrãrẽ pijio, dujiduticʉ niwĩ. Na dujíca beꞌro Booz cʉ̃ acaweregʉre aꞌtiro nicʉ niwĩ:

3 —Noemí Moab diꞌtapʉ níꞌco dajamo. Co marĩ acaweregʉ Elimelec mijĩ ya diꞌta níca diꞌtare duasĩꞌrĩgõ weeamo. 4 Tere masĩdutigʉ, mʉꞌʉrẽ wereꞌe. Mʉꞌʉ ti diꞌtare duusĩꞌrĩgʉ̃, ãꞌrã bʉcʉrã, ãpẽrã aꞌto dujirã tʉꞌoro “Duugʉti”, niña. Mʉꞌʉta Elimelec acaweregʉ waro niꞌi. Tojo weegʉ ti diꞌtare duumasĩꞌi. Mʉꞌʉ duusĩꞌrĩtigʉ, yʉꞌʉre wereya. Mʉꞌʉ ti diꞌtare duumʉꞌtãmasĩꞌi. Mʉꞌʉ beꞌrocjʉ̃ yʉꞌʉta niꞌi, nicʉ niwĩ Booz.

Tojo nicã tʉꞌogʉ, Booz acaweregʉ peꞌe: “Ti diꞌtare duugʉti”, ni yʉꞌticʉ niwĩ.

5 Booz cʉ̃rẽ apeyere werecasanʉꞌcõcʉ niwĩ:

—Mʉꞌʉ Noemí ya diꞌtare dúúgʉ pũrĩcã, Rut quẽꞌrãrẽ nʉmotigʉsaꞌa. Co moabita masõ wapewio nimo. Mʉꞌʉ tojo weecã, co meꞌrã mʉsã macʉ̃tigʉre, ti diꞌta wẽrĩꞌcʉ mijĩ Mahlṍrẽ wãmepeosirutunoꞌrõsaꞌa.

6 Tere tʉꞌogʉ, Booz acaweregʉ yʉꞌticʉ niwĩ:

—Tojo nicãma, ti diꞌtare duumasĩtisaꞌa. Beꞌropʉ yʉꞌʉ põꞌrãrẽ cũuatje to waꞌatibosaꞌa. Mʉꞌʉ duusĩꞌrĩgʉ̃, duuya. Yʉꞌʉ duumasĩtisaꞌa, nicʉ niwĩ.

7 Titapʉre Israe curuacjãrã tiropʉre aꞌtiro weesetise nicaro niwʉ̃. Niꞌcʉ̃ diꞌtare duagʉ o oꞌoyʉꞌrʉogʉ, diꞌta cʉogʉ cʉ̃ ya sapature tuwee, apĩ duugʉre oꞌoturiamʉjãcʉ niwĩ. Na duusere, duasere ĩꞌorã, tojo weecãrã niwã. 8 Na weesetiꞌcaronojõta wéégʉ, Booz acaweregʉ cʉ̃ ya sapature tuwee, Boore oꞌocʉ niwĩ. Beꞌro cʉ̃rẽ nicʉ niwĩ:

—Mʉꞌʉ peꞌe duuya.

9 Cʉ̃ tojo nicã tʉꞌogʉ, bʉcʉrãrẽ, ãpẽrã topʉ dujirãrẽ Booz aꞌtiro nicʉ niwĩ:

—Mʉsã tʉꞌoro niꞌcãcã yʉꞌʉ Noemírẽ co marãpʉ mijĩ Elimelec, cʉ̃ põꞌrã Quelión, Mahlón ye diꞌtare duugʉ weeꞌe. 10 Tojo nicã Rut moabita masõ, Mahlón mijĩ nʉmo níꞌco quẽꞌrãrẽ nʉmotigʉti. Tojo weecã, co marãpʉ wẽrĩꞌcʉ mijĩ wãme ninuꞌcũcãꞌrõsaꞌa. Cʉ̃ wãmerẽ cʉ̃ acawererã waꞌteropʉre, tojo nicã ti macãpʉre ne acobojosome. Niꞌcãcã mʉsã ʉ̃sã tojo weeꞌquere ĩꞌapʉ. Beꞌropʉre “Tojota queoro weewã”, nímasĩrãsaꞌa, nicʉ niwĩ.

11 Bʉcʉrã, nipeꞌtirã ãpẽrã topʉ nirã́ aꞌtiro yʉꞌticãrã niwã:

—Ʉ̃ʉ, ʉ̃sã mʉsã weeꞌquere queorota tʉꞌoapʉ. Õꞌacʉ̃ mʉꞌʉ nʉmo mʉꞌʉ ya wiꞌipʉ miisãjãacjore pãjãrã põꞌrãticã weeato. Raquel, tojo nicã Lea weronojõ niato. Marĩ Israe curuacjãrã na numia pãrãmerã nisirutudijatirã niꞌi.

Efratapʉre tocjãrãrẽ wiopesase meꞌrã ĩꞌanoꞌgʉ̃ niña. Belẽpʉre masʉ̃ bajuyoagʉ niña. 12 Õꞌacʉ̃ mʉꞌʉrẽ co meꞌrã pãjãrã põꞌrãticã weeato. Mʉꞌʉ põꞌrã pãjãrã waro masãputiato. Tamar, Judá na macʉ̃ Fares waꞌaꞌcaronojõ waꞌato.

13 Booz cʉ̃ níꞌcaronojõta, Rure cʉ̃ ya wiꞌipʉ miaa, core nʉmoticʉ niwĩ. Beꞌro co meꞌrã nicã, Õꞌacʉ̃ core nijĩpaco waꞌacã weecʉ niwĩ. Tojo wee niꞌcʉ̃ põꞌrãtico niwõ. 14 Tojo waꞌacã ĩꞌarã, Belẽ́cjãrã numia Noemírẽ aꞌtiro nicãrã niwã:

—Õꞌacʉ̃rẽ “Añuyʉꞌrʉami”, ni eꞌcatipeorã. Niꞌcãcã mʉꞌʉrẽ pãrãmiticã weeami. Cʉ̃rẽ mʉꞌʉrẽ coꞌtedutigʉ oꞌoami. Israe curuacjãrã cʉ̃rẽ añurõ ucũyʉꞌrʉnʉꞌcãto. 15 Cʉ̃ mʉꞌʉ pãrãmi mʉꞌʉrẽ wãcũtutuacã weegʉsami. Mʉꞌʉ bʉcʉo nirĩ curare mʉꞌʉrẽ coꞌtegʉsami. Mʉꞌʉ macʉ̃ nʉmo níꞌco cʉ̃rẽ põꞌrãtiamo. Co mʉꞌʉrẽ ʉpʉtʉ waro maꞌimo. Mʉꞌʉ siete põꞌrãtiboꞌcaro nemorõ wapatimo, nicãrã niwã.

16 Beꞌro Noemí wĩꞌmagʉ̃rẽ wʉamii, cʉ̃rẽ ĩꞌanʉrʉ̃, coꞌte masõco niwõ. 17 Numia co ya wiꞌi pʉꞌtocjãrã aꞌtiro nicãrã niwã:

—Niꞌcãrõacãrẽ Noemí niꞌcʉ̃ wĩꞌmagʉ̃ pãrãmitimo, nicãrã niwã.

Cʉ̃rẽ Obed wãme õꞌocãrã niwã. Beꞌropʉre cʉ̃ Isaí pacʉ nicʉ niwĩ. Isaí peꞌe Davi pacʉ nicʉ niwĩ.

18 Aꞌticʉrã Fares pãrãmerã nisirutudijarã nicãrã niwã:

Fares Hezrón pacʉ nicʉ niwĩ.

19 Hezrón Ram pacʉ nicʉ niwĩ. Ram Aminadab pacʉ nicʉ niwĩ.

20 Aminadab Naasón pacʉ nicʉ niwĩ. Nahasón Salmón pacʉ nicʉ niwĩ.

21 Salmón Booz pacʉ nicʉ niwĩ. Booz Obed pacʉ nicʉ niwĩ.

22 Obed Isaí pacʉ nicʉ niwĩ. Isaí Davi pacʉ nicʉ niwĩ.