2 Eruk, gäk Ninive yotpärareken ku yäk. Kuŋkaŋ manbiŋam gäwerayäŋ täyat u kaŋ yäwet. 3 Ude yäŋirän Jonatä mani buramiŋpäŋ Ninive yotpärareken kuŋkuk. Ninive uwä yotpärare taŋiinik, kukŋi ŋonitä kukŋi udude kweno uwä edap yaräkubä tärewek. 4  * Mat 12:41; Luk 11:32 Eruk, Jona yotpärare gägäniken yäput peŋpäŋ kepma kubä kuŋpäŋ yotpärare bämopiken itkaŋ gera terak ŋode yäŋahäŋkuk; Edap 40 ude täreŋirän Ninive yotpärare api peŋ awähurek! yäk.

5 Jonatä ude yäŋirän eruk, Ninive mähemitä Anutu täŋo man nadäwä bureni täŋkuk. Nadäwä bureni täŋpäpäŋ mominita nadäwätäk täŋpäŋ, nak jop irit kadäni peŋpäŋ tek waki-wakipäŋ täŋkuŋ. Ekäni iroŋi kudup udegän täŋkuŋ. 6 Täŋirä Ninive nanik täŋo intäjukun ämatä biŋam u nadäŋkaŋ akuŋpäŋ tek täga yäŋopmäŋpäŋ peŋpäŋ tek waki-wakipäŋ täŋpäŋ päŋku kädäkut gänaŋ maŋit itkuk.

7 Täŋkaŋ Ninive ämawebe kuduptagäntä nadäkta manbiŋam ŋode pewän kuŋkuk; Intäjukun ämakät epän ämaniyetä ŋode peŋ täwetkaŋ, Kubätä ketem kubä nämoinik näŋpek. Äma ba yawak, ketem ume nämoinik näneŋ yäk. 8 Nämo! Äma ba yawak imaka, tek waki-wakipäŋ täŋput. Täŋpäŋ ämawebe kuduptagäntä Anutuken yäŋapik man kehäromi yäneŋ. Täŋpäŋ kuŋat-kuŋari waki u ba ämik täktäk täk täkaŋ u peneŋ! yäk. 9 Ude täŋirä Anututä butewaki käwep nadäŋ nimiŋpäŋ ninta kokwawak nadätak u peŋirän nämo paotne yäk.

10 Täŋpäkaŋ manbiŋam pewän kuŋkuko u nadäŋpäŋ buramiŋpäŋ ämawebe kudup wakiwaki mäde ut imiŋirä Anututä yabäŋkuk. Yabäŋpäŋä nadäk iŋitkuko u yäpmäŋ äyäŋutpäŋ kowata pewän ahäŋ yämikta nadäŋkuko u peŋkuk.