Yawe näkä Juda nanikta kehäromi yäpmäkta intäjukun api täŋkentäŋ yämet. Täŋira Devit täŋo äboriye wäp biŋam ba Jerusalem nanik täŋo wäp biŋamtä Juda nanik täŋo nämo api yärepmirek. 8 Täŋpäkaŋ kadäni uken Yawe näkä Jerusalem nanik api täŋkentäŋ yämet. Täŋira ämawebe kehäromini nämotä Devit kehäromi nikek itkuko ude api itneŋ. Täŋpäŋ Devit täŋo äboriyetä Jerusalem nanikta intäjukun api täŋ yämineŋ, Yawe täŋo aŋero ba Anututä ini täŋ yämeko ude. 9 Täŋkaŋ kadäni uken näkä äma äbori äbori Jerusalem täŋpäwakta äbäk täkaŋ uwä api däpmäŋ morewet.

10  * Jol 2:28; Apos 10:45; Tai 3:5; Rom 8:15,26; Mat 24:30; Jon 19:37; Rev 1:7; Hib 12:2 Täŋpäkaŋ Devit täŋo äboriye ba Jerusalem ämawebe näkä orakorak kädet ba yäŋapik man yäkyäk kädet iwatta kehäromi api piŋ yäbaret. Ude täŋira äma yäput pewä kumbuko u kaŋpäŋ konäm butewaki jägämi pähap api täŋ imineŋ, miŋiye naniyetä nanakiye tepi ba intäjukun naniktä kumbänkaŋ täneŋo ude.