Yämagurani.
32.
Moses pom terak kadäni käroŋi irirän ämawebe nadäwätäk täŋpäŋ päŋku Aron it gwäjiŋpäŋ ŋode iwetkuŋ; Moses, Isip komeken nanik nimagurani u jide ahäŋ imitak u nämo nadäkamäŋ unita gäk anutu kubä intäjukun it nimiŋpäŋ nimagutta täŋ nimi. 
Ude iweräwä Arontä ŋode yäwetkuk; Eruk, webejiye ba äpetjiye nanakjiye täŋo jukuwabik golpäŋ täŋpani u yäpmäŋ äbut. 
Ude yäweränä ämawebe kudup jukuwabiki ketäreŋpäŋ Aronken yäpmäŋ kuŋkuŋ. 
Yäpmäŋ päŋku imäwä kädäpken ijiŋpewän muräkaŋ upäŋ yäpmäŋpäŋ bulimakau nanaki wärani kubä täŋkuk. Täŋpäŋ iŋamiken peŋirän ämawebe unitä ŋode yäŋkuŋ; Isrel ämawebe, ŋo kawut! Ŋowä Isip komeken nanik nimagurani anutunin uba yäk. 
Ude yäŋirä Arontä kaŋpäŋ bulimakau dubiniken mobä bukä kubä täŋpäŋ ŋode yäwetkuk; Kwep äŋnak-äŋnak pähap täŋpäŋ Yawe api iniŋ oretne yäk. 
Eruk patkuŋo kome ket nämo yäŋeŋirän ämawebetä tom yäpmäŋ äbäŋpäŋ ätu gupe käbäŋi nikek ijikta däpmäŋit, ätu däpmäŋpäŋ Bänep Kubägän Täŋpäŋ Itta äŋnak-äŋnak täŋkuŋ. Ude täŋpäŋ maŋit itkaŋ ketem ume pähap naŋkaŋ eruk akuŋpäŋ täŋoret wakiwaki täŋkuŋ. 
Ude täŋ irirä Yawetä Moses iwetkuk; Ämawebe Isip komeken nanik yämagutkuno u kudän waki mebäri mebäri täŋ itkaŋ unita bäräŋek äpmo yabä! 
Ämawebe uwä kadäni käroŋi nämo itkaŋ kädet iwatta yäwetpäŋ yäwoŋäreŋkuro u mäde ut imiŋpäŋ anutu jopi bulimakau wärani kubä täŋkuŋ. U gwäjiŋ äpmoŋ imiŋpäŋ tom däpmäŋpäŋ ijiŋ imiŋkaŋ ŋode yäkaŋ; Isrel ämawebe, ŋowä Isip komeken nanik nimagurani anutunin yäk. 
Yawetä ude yäŋpäŋ Moses ŋode iwetgän täŋkuk; Ämawebe ŋonitäŋo mebäri nadätat. Uwä gwäki kehäromi. 
Unita nabä kätäŋiri kokwawakna pähaptä ämawebe Isip komeken nanik yämagutkuno uterak kaŋ ärowän. Ämawebe u kumäŋ-kumäŋ däpmäkta nadätat yäk. Ude täŋkaŋ gäk ba äbekaye oraŋkayeta nadäŋ tamiŋira äbot taŋi pähap kubä api itneŋ. 
Ude yäŋirän Mosestä Yawe Anutuni butewaki man ŋode iwetkuk; O Yawe, kokwawakatä ämawebekaye imata jop täŋpän waneŋ. Ämawebe uwä kehäromika pähap terak Isip komeken nanik yämagutkun. 
U täŋpi wawäwä Isip naniktä ŋode api yäneŋ; U ka! Anutunitä täŋyäkŋarani terak yämagutpäŋ pom terak kumäŋ-kumäŋ däpmäŋira kuduptagän paotinik kaŋ täŋput yäŋ nadäŋpäŋ yäŋ-yäkŋat yäpmäŋ kuŋkuk yäŋ api yäneŋ. Ude yäŋirä nämo api tägawek. Unita Yawe, kokwawakka pähap uwä kaŋ pe. Nadäk iŋitan u mäde ut imiŋpäŋ ämawebekaye nämo täŋpi waneŋ. 
Watä ämakaye biani Abraham, Aisak ba Jekop unita juku pi. Ba gäkŋa wäpka terak yäŋkehäromtak man ŋode yäwetkuno unita imaka, juku pi; Näkä nadäŋ tamiŋira äbekaye oraŋkaye mäden ahänayäŋ täkaŋ uwä guk jiraŋ ude api ahäneŋ. Ude täŋpäŋ äbekjiye orajiyeta kome päke ŋo yäpmäkta iwoyäŋ yämiŋkuro u yämiŋira inita biŋam tärek-täreki nämo api irek. 
Mosestä ude iweränä Yawe nadäk iŋitkuko u mäde ut imiŋpäŋ täŋpäwak ämawebeniyeken pewän ahäkta yäŋkuko u nämo täŋkuk.