1 Iesuꞌa bare ḡabode iḡuniroteꞌe ḡarugano fura fuꞌo zu aheu fare (7) radirotene, Pentekosi* Pentekosi ḡoere eꞌe hugaꞌe ḡae fuꞌo gaubanana (50). Iḡine Modeꞌeteꞌe Muiḡa madaḡanonoꞌo meꞌode onamo mada ḡae fuꞌo gaubanana meine, Pentekosi Muiḡa madaḡa meꞌuma. madaḡa meiro. Eꞌe madaḡano Zuhiꞌa Boro mone azaḡa niduꞌa haba tibano nuꞌoru radiro. 2 Eꞌe zamaḡano zavara boroꞌa onaeꞌeteꞌe teige guguḡa boroꞌa adureonoꞌo tabara gudau ovairo. Eꞌe guguḡaniꞌa zeḡeꞌa nuꞌoraroteꞌe neḡa irivaꞌoniro. 3 Ebu ireꞌa duhuruꞌeteꞌe heuḡaniꞌa mazane teige rovotadu, vaze tiba tiba ranao duhuranoga horoniro. 4 Ebu Vine Zaḡoḡaniꞌa eꞌea radiunuteꞌe azaḡa niduꞌa irivaꞌoziro, ebu Vine Zaḡoḡaniꞌa ibito zenadu, ḡoere ꞌahoga ꞌahogano ḡoeriro.

5 Eꞌe madaḡanoꞌe, Iuda azaḡa haba ꞌahoga ꞌahogano radiuꞌeteꞌeꞌa, Pentekosi muiḡa ꞌauḡoga rae Ierusalema neḡa onaadu eꞌea radiunu. Zeꞌe Badiꞌa gubaneꞌeteꞌe azaḡa. 6 Eꞌe haraḡa igirotene, vaze ḡuḡuvaḡaniꞌa isau onairo. Ebu ze zamaze ꞌadaꞌadaziro, mazaḡa Zuhiꞌa Boro mone azaḡaniꞌa ane ane ḡoereo ḡoeroga igiro ꞌahine. Aꞌe Iuda azaḡaniꞌa haba ꞌahoga ꞌahogano radiuꞌeteꞌe ḡoeꞌa. 7 Ebu ze zaguzaganadu, ꞌahige reiro. “ꞌAdi duḡuruꞌe niduꞌa Galilea azaḡa rehano, 8 nougaꞌahi emeḡe tiba tiba ḡoereo ḡoeroga igiꞌohe? 9 Emeꞌe Patia azaḡa, Media azaḡa, Elama azaḡa, ebu Mesopotamia habaꞌano, Iudea zu Kapadokia habaꞌano, Ponto zu Asia habaꞌano radiuꞌeteꞌe azaḡa, 10 Ferigia zu Pamufulia habaꞌano, Izipi habaꞌano radiuꞌeteꞌe azaḡa, zu Libia habaꞌa zamaḡano Kurene neḡa uhiḡano radiuꞌeteꞌe azaḡa. Ebu Roma neḡano radiuꞌeteꞌe azaḡa. 11 Eꞌe zamaḡanoꞌe Iuda azaḡa zu, Iuda mene azaḡa rehano zamaze ḡihuradu Iuda azaḡa teite kurau tiburuꞌeteꞌe azaḡa. Ebu Kerete ꞌumuḡa azaḡa zu Arabia habaꞌa azaḡa. Eme zeḡeꞌa Badiꞌa gigiꞌa haḡaiḡa emeḡe tiba tiba ḡoereo raꞌeteꞌe igiꞌohe.” 12 Ze zaguzagaro ebu zamaze ꞌadaꞌadaziro, ebu “ꞌAdi nagini?” rae ḡadititiro. 13 Rehano vaze nuꞌe ḡiriho ziniꞌenaꞌa, ꞌahige reiro. “Ze vaini vuḡa borofe gageha.”

14 Ebu Peteroꞌa apostolo azaḡa gaubanana tiba fare (11) teite iḡune edanadu, vaze ḡuḡuvaḡa mazao agoḡa borofeꞌenaꞌa haramiro. “Iuda azaḡa, zu Ierusalema neḡano radiuꞌeteꞌe azaḡa niduꞌa, eꞌe, haḡai ꞌadaꞌa nouge nouge fureranateꞌe rae bohanihi. Eḡe ḡoere fairu abitoꞌi! 15 Zaꞌe ꞌadi duḡuruꞌe vaini vuḡa gageha rae zamareꞌe gaogi. Ze mene gageha. ꞌAdi ꞌize oherebau, mada fuꞌo zu ḡazaḡa fare (9 koroko). Vazeꞌe oherebau mene gagiꞌuma.

16 Rehano ꞌadiꞌe peroveta vazeḡa Ioelaꞌa amahi rae fureniroteꞌe haḡaiḡaniꞌa fureraneha.

22 Isaraela azaḡa, ḡoere ꞌadi egoꞌi! Za edeḡa. Iesu, Nazareta neḡa vazeḡa ani, Badiꞌaꞌa tuḡunadu, gigiꞌa haḡaiḡa, zaguzagaꞌuma haḡaiḡa zu Badiꞌa tahi haḡaiḡa ḡehaḡa zae boꞌaḡano haḡaido. Badiꞌa ani eꞌe haḡaiḡa Iesu mazaonoꞌo haḡaadu, Iesuꞌe aneꞌa tuḡuniroteꞌe rae deheniro. 23 Ebu Iesu ani zae ꞌevoreo riꞌinirotaꞌaꞌe, Badiꞌaꞌa amahi toganiroteꞌe zu fureraꞌuma rae ederiroteꞌe haḡaiḡa. Ebu zaꞌe Badiꞌa goro ḡoeꞌa aḡuꞌa azaḡa zeadu, satauroo ikokoneadu runediro. 24 Rehano eꞌe vazeḡaꞌe Badiꞌaꞌa rune zamaḡano ḡaniḡanauꞌeteꞌeanoꞌo mae vaḡinadu, bare ḡaboniro, mazaḡa rune gigiꞌaḡaꞌe Iesu obone touga mene idaḡa ꞌahine.

25 Davida ani Iesu hari ꞌahige rae reiro.

29 Nego nabudi, e hubehune ziꞌohe. Vouḡafe Davidaꞌe rudanadu ḡuriro, ebu ani iduꞌe izidi ꞌize radiuꞌohe. 30 Aniꞌe peroveta vazeḡa ꞌahine, ani edeḡa Badiꞌaꞌa ane mazao ḡoeꞌa rinede tiro, raenaꞌa, Davida mariga ꞌahoganiꞌa ane iḡuri madu Kini reꞌuma.

31 Davida ani vesuꞌu fureraꞌuma haḡaiḡa horoneꞌenaꞌa, Kerisoꞌa bare ḡabode iḡuniꞌuma hariḡa rae fureniro, raenaꞌa, rune habaꞌano ani mene modiꞌuma, zu ahiꞌaꞌe mene ruhuraꞌuma. 32 Ebu Iesu ꞌadiꞌe Badiꞌaꞌa bare ḡaboniro. Emeḡe niduꞌa eꞌe horonadu, rae fureneꞌohe. 33 Ebu aniꞌe Badiꞌa edaꞌe moneo ohoniro, ebu Moga mazaonoꞌo Vine Zaḡoḡa madu emeḡe mazao ovoe beꞌunadu irivaꞌofiro. Vine Zaḡoḡaꞌe Badiꞌaꞌa tuḡuniꞌuma rae tiroteꞌe. Ebu zaꞌe eꞌe haḡaiḡa izidi ꞌada horoneꞌeteꞌe zu igiꞌeteꞌe.

34 U Davida ani Keriso teige adure ḡoha mene mae ḡihine itiro. Rehano ani ꞌahige reiro.

37 Ze eꞌe igirotene, zamaze tuḡano babaharo, ebu Petero zu apostolo azaḡa ḡadiziro. “Negofe duḡuru, eme nagini haḡaine manoḡa?”

38 Peteroꞌa naenaezinaꞌa, “Zae niduꞌa, zamaze ḡihunoꞌi, ebu Iesu Keriso niḡano bapatizo moꞌi! ꞌOugine Badiꞌaꞌa zae sauꞌa rae modiꞌuma, ebu Badiꞌaꞌa Vine Zaḡoḡa ziniꞌuma. 39 Badiꞌaꞌa ḡoere ꞌadi rae tirotaꞌaꞌe, Zuhiꞌa Boro emeḡe Badiꞌaꞌa zamaziꞌuma azaḡa niduꞌa veize. Aꞌe zae, ubudeze zu haba faḡa faḡa azaḡa niduꞌa.”

40 Ebu ani bare ḡoere ḡehaḡa hina haramiro, zu bare bare iraduguziro, raenaꞌa, “Haḡai veꞌoḡa azaḡa ꞌadi mazaonoꞌo vaḡinadu, ḡabone moꞌi!” 41 Eꞌanoꞌo iniu iniuꞌa ane haramo mae ḡihinirotaꞌaꞌe bapatizoziro. Ebu eꞌe madaḡano vaze maḡa boro uḡidu (3000) heuḡa bapatizo madu zeḡe moneo ragate mae zouziro.

42 Zeꞌe zamaze tiba hanadu, apostolo azaḡaniꞌa ihozidoteꞌe abito zinido ebu danatitido, tiburu ogaudo, zu tibano kuraudo. 43 Ebu apostolo azaḡaniꞌa zaguzagaꞌuma haḡaiḡa zu Badiꞌa tahi gigiꞌa haḡaiḡa ḡehaḡa haḡaido, ebu vaze niduꞌa zamazeo Badiꞌa rihone runiro. 44 Badiꞌa mazao fiiroteꞌe azaḡa niduꞌa tibano nuꞌoru radiudo, ebu ḡauze niduꞌa ḡahugotitido. 45 Ebu habaze, neze zu toheze seronadu, iniu monizeꞌa ferezinuteꞌe niduꞌa, zininu. 46 Ze mada niduꞌa Dibuꞌo Neḡano tibano nuꞌoranadu kuraudo. Ebu ane ane neo matuꞌuzeta zu zama tiba teite ogau tiburaudo, 47 zu Badiꞌa nigunido, ebu Ierusalema azaḡa niduꞌa zeḡe mazao matuꞌinu. Mada niduꞌa Zuhiꞌa Boroꞌa ḡabone hideꞌeteꞌe azaḡa ragate ragate mae zouzido.