1 Eḡeꞌa ꞌadi raꞌetaꞌaꞌe, e ura za ederoꞌi! Eḡeꞌa zae, zu Laodikea neḡa azaḡa, ebu ize mene horohateꞌe azaḡa niduꞌa danazoga veize inareꞌohe. 2 E ura zeꞌa inaratitoga zu zamarotiteꞌenaꞌa tiburanoga. Ebu e ura zeꞌa Badiꞌa uꞌuru ḡauḡa edere hunoga. Uꞌuru ḡauḡa aꞌe Keriso. 3 Ebu Keriso mazao buꞌu Badiꞌaꞌa uꞌuru tidoteꞌe zamaroneḡa boro bagaḡa ederiꞌuma. 4 Eḡeꞌa ꞌadi raꞌetaꞌaꞌe, vazeꞌa zamaguhi ḡoeꞌa hina mene soꞌozifine. 5 Ḡianoꞌi! Eꞌe zae teite mene radiuꞌe rehano, eḡe zamaꞌe zae mazao radiuꞌohe. Eꞌanoꞌo zaeꞌa haḡai manoḡano radiuꞌeteꞌe zu zaeꞌa Keriso mazao fie gigaruꞌeteꞌe ederadu, matuꞌeꞌohe.

6 Eꞌanoꞌo Keriso Iesuꞌe Zuhiꞌa Boro radu zaꞌe mae ḡihiniro ꞌahine, ani teite tiburu radiuꞌenoꞌi! 7 Ebu ire taiganiꞌa rahao kame gigaruꞌeteꞌe teige, Keriso mazao kame gigaranadu, ane zamareꞌenaꞌa farau onamoꞌi! Ebu Epafaraꞌa Badiꞌa ḡoere ihozidoteꞌe teige obone giganoꞌi! Ebu Badiꞌa mazao iḡaiḡa manoḡa tauḡi roꞌi! 8 Vaze ḡoere faine ḡianoꞌi! Hena, zeḡeꞌa tutuze veꞌoziꞌuma. Zeꞌe Badiꞌa edeḡa zu vazeꞌa nouge nouge radiuꞌeteꞌe edeḡa niduꞌa raha adi ibiḡano ihoziꞌuma. Zeḡe ḡoereꞌe huga ꞌoꞌoꞌa zu ḡuriro ḡoeꞌa. Ḡoere aꞌe Kerisoonoꞌo mene onaeꞌohe, rehano amahi azaḡa edeḡanonoꞌo zu haba ꞌadi vineḡanonoꞌo. 9 Ḡianoꞌi! Mazaḡa Badiꞌa ḡabone zu haḡai niduꞌaꞌe Keriso zamaḡano iriꞌave radiuꞌohe. Kerisoꞌe vaze reirotene aniꞌe ize Badiꞌa, eꞌanoꞌo zaꞌe Keriso zamaḡano Badiꞌa haḡai niduꞌa horoneꞌohe. 10 Ebu zaꞌe Keriso teite tibuziro zu ani mazaonoꞌo haḡai ꞌadi niduꞌa meiro. Vine sauꞌa zuhiꞌaḡa, zuhiꞌa niduꞌa zu ḡau niduꞌaꞌe Keriso ꞌuꞌuḡano radiuꞌohe. 11 Iuda azaḡaꞌe, Badiꞌa mone raꞌetene, vaze ꞌevore hina ahiri ogaḡa variꞌe modadu iḡuri haḡaeꞌohe. Eꞌe teige zaꞌe, Keriso mone reirotene, Kerisoꞌa zamaroneze sauꞌa zu ḡaboneze sauꞌa variꞌe modeꞌenaꞌa, zamazeo iḡuri haḡairo. 12 Eꞌe hugaꞌe, zaeꞌa Badiꞌa ni mae ḡihinadu bapatizo meiroteꞌe zamaḡano, Keriso teite ḡuriro, ebu Keriso ane teite bare ḡabode iḡuniro. Mazaḡa Badiꞌaꞌa Keriso runeonoꞌo bare ḡaboniroteꞌe gigiꞌaḡa mazao zaeꞌa firo ꞌahine. 13 Ebu ibite vinezeꞌe rudanoga zu Badiꞌa mazaonoꞌo faraunu. U eꞌe madaḡanoꞌe, zae ḡabone sauꞌaꞌe ize mene variꞌe modiro. Rehano ꞌouge ize haḡairoteꞌea, Badiꞌaꞌa zaꞌe Keriso teite bare ḡaboziro. Ebu emeḡe sauꞌa niduꞌa rae modiro. 14 Ebu Badiꞌaꞌe Emeḡe haḡai sauꞌa uꞌano emeḡe ꞌuteꞌeteꞌe Iuda azaḡa goro ḡoeꞌaꞌe niduꞌa madu, Keriso teite satauroniro. ꞌOuge haḡaeꞌenaꞌa, Badiꞌaꞌe goro ḡoeꞌa niduꞌa ꞌuiro. 15 Ebu ꞌouge haḡaeꞌenaꞌa, Badiꞌaꞌa vine sauꞌa zuhiꞌaḡa zu zuhuꞌa inaraze mae buno ziniro. Mazaḡa goro ḡoeꞌa ꞌuiro ꞌahine, Sataniꞌa eꞌe ḡoeꞌa hina emeḡe ꞌutoga mene idaḡa. Ebu Keriso satauroniroteꞌe zamaḡano, vine niduꞌa Kerisoꞌa roꞌaze hauḡiroteꞌe, Badiꞌaꞌa hunio fureniro.

16 Eanoꞌo, zaeꞌa aueꞌeteꞌe zu gageꞌeteꞌe moneo ga muri muiḡa, bato iziḡa muiḡa zu Iuda azaḡa Bana Madaḡa uꞌano, vaze ꞌahoganiꞌa zae veꞌoḡa rae zoitene gararozenoꞌi! 17 Mene! Iuda azaḡa goro ḡoeꞌa zu muiḡa ꞌuḡuḡaꞌe Badiꞌaꞌa rae tiroteꞌe ḡauḡa manoḡa emege rifiuma vineḡa isoḡa. Rehano izidi ḡau manoḡa aꞌe fureraneha. Eꞌe ḡauḡa hugaꞌe Keriso. 18 Ḡurireꞌenaꞌa nize mae ovoeꞌeteꞌe zu tuḡure viga mazao kurauꞌeteꞌe azaḡa ḡoere ago egoꞌi! Zeꞌe za tutuze veꞌozihi raꞌohe. Zeꞌe tuḡure viga horoneha raꞌenaꞌa, nize mae iteꞌenaꞌa ḡoeriꞌuma, rehano ze zamaꞌe mene Badiꞌa mazaonoꞌo, ebu ze ꞌane zeꞌe nize boro azaḡa reꞌuma. 19 Zeꞌe Keriso mene hegoteꞌohe. Keriso ani ekalesia vadiga, ekalesia azaḡaꞌe ane ahiꞌa. Aꞌuꞌa zu viniga hina tibuzetene ahiri niduꞌa gigazeꞌohe. Ebu Badiꞌaꞌa ekalesia ibitoziniꞌenaꞌa inariꞌuma.

20 Zaꞌe Keriso teite rudauꞌetene, raha ꞌadi vineḡa zuhiꞌaḡaonoꞌo mae buzeꞌohe. Rehano zaꞌe nougadu ize raha azaḡa haḡaio radiuꞌeteꞌe teige zeḡe ḡoere igiꞌohe? 21 Ze ꞌahige raꞌohe, “Ago obone toꞌi! Ago au nuroꞌi! Ago obone nuroꞌi!” 22 ꞌAhiguḡa goro ḡoeꞌaꞌe vaze mazaonoꞌo onaeꞌohe. Eꞌe goro ḡoeꞌaꞌe mene faḡa haḡaeꞌohe zu dauḡeꞌohe. 23 Goro ḡoeꞌa ꞌuguḡaꞌe edeḡa boro ḡoeꞌa iraḡa, rehano hugaꞌe oꞌoꞌa. Zeꞌa kuru veize zeḡe bare inahiroteꞌe ḡauḡaꞌe vaze mazaꞌonoꞌo zu zeꞌe ḡurireꞌenaꞌa nize ufeta mae ovoiꞌuma, ga ahirize sausauneꞌetaꞌe Badiꞌa matuo hafine. Rehano goro ḡoeꞌa ꞌuguḡaꞌe gigiꞌaḡa oꞌoꞌa ꞌahine, zamarone sauꞌa mae vaḡiniꞌuma moneo mene danazeꞌohe.