1 Zuhiꞌa azaḡa, zae tuḡure azaḡaꞌe haḡai duduḡano daꞌo zuhiꞌazoꞌi, ebu vaze nu daꞌo ago faizoꞌi, rehano niduꞌa faizoꞌi! Mazaḡa za mene ꞌougine, zae Zuhiꞌa, adureo radiuꞌeteꞌeꞌa, haḡaize ḡianadu eꞌe naeḡa ziniꞌuma.

2 Zaꞌe iḡaiḡa kurauꞌenoꞌi! Zamazeꞌe raꞌaneꞌenaꞌa bohanadu, Badiꞌa mazao manoḡa tauḡi raꞌenaꞌa kuranoꞌi! 3 Ebu emeḡe veize zuni kuranoꞌi, emeḡeꞌa Badiꞌa ḡoere haramiꞌuma ibiḡa aneꞌa haḡaifine. ꞌOugine, Keriso hariḡa Badiꞌaꞌa ane zamao ibite obonetiroteꞌe emeḡeꞌa harame fureniꞌuma. Eꞌe Keriso hariḡa harameꞌeteꞌe uꞌano ḡuꞌano ohohiro ꞌahine, za ꞌouge umizeꞌohe. 4 Ebu Badiꞌaꞌa gau ꞌadi iniroteꞌe idunaḡano Keriso hariḡa eḡeꞌa doḡoꞌani rae furenifine kuranoꞌi!

5 Mada manoḡa hidoꞌidene Keriso aḡuꞌa azaḡa danazoga veize faine zamare haḡaoꞌi! 6 Ebu zeḡe teite ḡoeroꞌidene, iḡaiḡa ḡoere iniga hina namize ḡorezoꞌi! ꞌOugine za ze teite ḡoretitine faine naenaeziꞌuma.

7-8 Eꞌe zae uꞌa Tukiko tuḡuneꞌohe. Aniꞌe emeḡe nego zu emeḡe zamarone. Ebu anie ekalesia azaḡa faifairu danazeꞌeteꞌe vazeḡa, zu Zuhiꞌa Boro tuḡure haḡaeꞌenaꞌa eḡe teite gaueꞌohe. Aniꞌe ꞌadama eḡeꞌa nouge nouge radiuꞌeteꞌe edemaziꞌuma, zaeꞌa eꞌe ederadu inarifine. 9 Onesimo zuni ani teite tuḡune amiꞌuma. Aniꞌe emeḡe nego zu emeḡe zamarone. Ebu aniꞌe hubehune Badiꞌa zamareꞌohe, zuni aniꞌe zae nabudi ꞌahoga. Zeꞌe emeḡeꞌa nouge nouge radiuꞌeteꞌe niduꞌa edemaziꞌuma.

10 Eḡe teite ḡuꞌano radiuꞌeteꞌe vazeḡa ꞌahoga, niḡa Arisitakoꞌa zae veize uhiu tuḡureꞌohe. Banabasi nabuga, Mareko zuni uhiu tuḡureꞌohe. Aneꞌa amiꞌuma ḡoeꞌa eḡeꞌa ibite tuḡuriro. Eꞌanoꞌo ani amoꞌidene, faine mae ḡihinoꞌi! 11 Vaze ꞌahoga niḡa Iesu, ane zuni uhiu tuḡureꞌohe. Niḡa ꞌahogaꞌe Iusto rae huneꞌohe. Badiꞌaꞌa vaze zama ibito zenoga veize eḡe teite gaueꞌeteꞌe azaḡa boꞌaḡano zeḡe uḡidu ahi daꞌoꞌe Iuda azaḡa. Ze iḡaiḡa eḡe danaheꞌetene zamaheꞌa matueꞌohe.

12 Zae nabudi ꞌahoga, Epafara, aniꞌe Keriso Iesu tuḡure vazeḡa. Ani zuni uhiu tuḡureꞌohe. Ani zae veize kurauꞌetene, iḡaiḡa inare kurauꞌohe, Badiꞌaꞌa zae mazao urateꞌeteꞌe ḡauḡa niduꞌa edere hauḡadu, edau gigaranoga veize. 13 Eꞌa ani horoninutene, aniꞌe hubehune zae ebu Laodikea zu Hierapoli neḡa azaḡa veize inare haḡueꞌohe. 14 Emeḡe nego zu emeḡe zamorone, doketa vazeḡa niḡa Luka ebu Demaꞌa uhiu tuḡureꞌohe. 15 Izidi eḡeꞌa uhiu tuḡureꞌeteꞌe ḡoeꞌa Laodikea neḡano Badiꞌa mone raꞌeteꞌe azaḡa zenoꞌi ebu roḡae ꞌahoga, niḡa Numufa zu ane neo kurauꞌeteꞌe azaḡa veize zuni zenoꞌi.

16 Fefa ꞌadi vaze ꞌahoganiꞌa zae mazao meꞌode hauḡoꞌidene, hena, Laodikea ekalesiaḡa veize tuḡuroꞌi, zeḡe kuru neḡano meꞌode furenoga. Ebu zaꞌe, hena, Laodikea ekalesia veize eḡeꞌa tuḡuriroteꞌe fefaḡa madu meꞌodoꞌi!

17 Ebu Arekipo ninaꞌa, “Zuhiꞌa Boroꞌa haroteꞌe gauḡa haḡae hauḡoꞌi!”, rae noꞌi!

18 Eḡe Pauloꞌa uhiu ḡoeꞌa ꞌadi eḡe ꞌevore hina mirineꞌohe. Eḡeꞌa Keriso hari manoḡa uꞌano ḡuꞌano radiuꞌeteꞌe zamaroꞌi, ebu kuranoꞌi! Badiꞌa manohuganiꞌa zae teite radiuꞌenoꞌi!