1 Bana Madaḡa ꞌahogano Iesuꞌa ane tahiꞌatahiꞌa teite vuidi mebaḡa zamaḡano onamiro. Ebu ane tahiꞌatahiꞌaꞌa vuidi maḡa ririꞌe madu ꞌevoreze hina hasiga mute vaḡinadu huga aro. 2 Rehano Farisea azaḡa nuꞌa horozadu ziro, raenaꞌa, “Zaꞌe nougadu Bana Madaḡa goroḡa varadeꞌenaꞌa, vuidi hiriveꞌohe?”

3 Iesuꞌa naenaeziro, raenaꞌa, “Zaꞌe Buka Zaḡoḡa zamaḡano, Davidaꞌa nagini haḡairotaꞌaꞌe meꞌodiro ga? Davida ani ane ḡatiniroteꞌe azaḡa teite ogomuze hauḡadu vinize ruziro. 4 Eꞌanoꞌo aniꞌe Badiꞌa ne diuḡadu dibuꞌo azaḡaniꞌa daꞌo auꞌeteꞌe dibuꞌo berediḡa aro. Aniꞌe goro ḡoeꞌa varadiro ebu ane ḡatiniroteꞌe azaḡa zuni ziniro.” 5 Ebu Iesuꞌa zinaꞌa, “Eḡe, Vaze Ubugaꞌe, Bana Madaḡa Zuhiꞌaḡa.”

6 Ebu Bana Madaḡa ꞌahogano, Iesuꞌa nuꞌonuꞌo neḡa diuḡadu vazevaze ihoziro. Eꞌea edaꞌe nae ꞌevoꞌa rudanoga vazeḡa zuni radiunu. 7 Mose goro ḡoeꞌa ihozeꞌeteꞌe azaḡa zu Farisea azaḡaꞌe Iesuꞌa Bana Madaḡano vaze eꞌe fainiꞌuma ga mene rae ehamu radiro. Mazaḡa aniꞌa vaze eꞌe fainine, zeḡe kotao ohonoga uratiro.

8 Rehano Iesu aniꞌe zeꞌa nouge rae zamarinutaꞌaꞌe ederiro. Ebu ꞌevoꞌa rudanoga vazeḡa niro, raenaꞌa, “Iḡunadu vaze ḡuḡuvaḡa zama ꞌada eda aroꞌi!” Ebu ani eda onamiro. 9 Ebu Iesuꞌa zinaꞌa, “E za ḡadizeꞌohe. Mose goro ḡoeꞌaꞌe Bana Madaḡa zamaḡano nagini haḡaine idaḡa raꞌohe? Manoḡa haḡaiꞌuma ga sauꞌa haḡaiꞌuma? Ḡaboziꞌuma ga zimiꞌuma?” 10 Iesuꞌa zeḡe niduꞌa ḡiaze ḡemadu vaze eꞌe niro, raenaꞌa, “ꞌEvoꞌo einoꞌi!” Aniꞌa einirotene, ꞌevoꞌaniꞌa manoriro.

11 Rehano ze maḡune rudanadu zeḡe zeḡeꞌa Iesu mazao nagini haḡaiꞌuma rae ḡoaniro.

12 Eꞌe madaḡano Iesu ani maḡa onamadu ohere faḡa Badiꞌa mazao kuraro. 13 Ebu oherebau moneo ani tahiꞌatahiꞌa huze tibuziro. Ebu tahiꞌa 12 daꞌo zamazadu Apostolo azaḡa rae huziro.

14 Nizeꞌe ꞌahiꞌeꞌe: Simona niḡa ꞌahoḡaꞌe Petero, Petero negoḡa niḡa Aniderea, Iakobo, Ioane, Filipo, Batolomeo, 15 Mataio, Tomasi, Alefeo ubuḡa niḡa Iakobo, Roma gavamani utito ziniꞌeteꞌe duḡuruḡa* Giriki, duḡuruḡa niḡaꞌe Zealota vazeḡa niḡa Simona, 16 Iakobo ubuḡa niḡa Iuda ebu Iesu revoharoteꞌe vazeḡa, Isakariota vazeḡa niḡa Iuda.

17 Eꞌe enogano, Iesu ani tahiꞌatahiꞌa teite maḡanonoꞌo ovaradu haba sebaḡano edaro. Eꞌe habaꞌanoꞌe ane hegoteꞌeteꞌe azaḡa ḡuḡuvaḡa ebu haba nunu azaḡa ḡehaḡaniꞌa radiunu. Zeꞌe Iudea habaꞌa, Ierusalema neḡa boro zu davara genaḡa neḡa boro Taea ebu Sidonaonoꞌo Iesu hari abitoga zu ugize faizoḡa radu ariro. 18 Ebu Iesuꞌa vine sauꞌaniꞌa diuḡadu sausauziroteꞌe azaḡa zuni faiziro. 19 Zeḡe niduꞌa ani ahiri obonihi reiro, mazaḡa ugi faineꞌeteꞌe inaraḡaꞌe ani mazaonoꞌo buanadu zeḡe nidua manoriro.

20 Ebu Iesuꞌa ane tahiꞌatahiꞌa ḡiazeꞌenaꞌa ziro, raenaꞌa,

27 Eḡe ḡoere egoniꞌeteꞌe azaḡaꞌe ziꞌohe. Agireze azaḡa zamaroꞌi zu heꞌeheꞌeꞌeteꞋe azaḡa mazao manoḡa haḡaoꞌi! 28 Za rae sausauzeꞌeteꞌe azaḡaꞌe Badiꞌa manohuga hidoga veize uminoꞌi zu zae mazao haḡai sauꞌa haḡaeꞌeteꞌe azaḡa veize kuranoꞌi! 29 Vazeꞌa ḡanigo faꞌonoꞌidene, naeḡa zu notonohanoꞌi! Vazeꞌa dabuaḡo meiꞌadu hena bare ꞌahoga zuni meihi roꞌidene, aꞌa zu hanoꞌi! 30 Iniuꞌa nagini umiꞌoꞌidene hau tauḡoꞌi, ebu iniuꞌa ḡauḡo mae buroꞌidene, ago bare moꞌi! 31 Vazeꞌa zae mazao haḡai manoḡa haḡaeꞌeteꞌe uratoꞌidene, zae zuni zeḡe mazao haḡai manoḡa haḡaoꞌi!

32 Zaꞌa zae vetuḡaziꞌeteꞌe azaḡa daꞌo vetuḡazine, Badiꞌaꞌa mene niguziꞌuma. Sauꞌa azaḡa zuni zeḡe vetuḡaziꞌeteꞌe azaḡa vetuḡaziꞌohe. 33 Ebu zaꞌe zae mazao manoḡa haḡaeꞌeteꞌe azaḡa mazao daꞌo manoḡa haḡaine, Badiꞌaꞌa mene niguziꞌuma. Sauꞌa azaḡa zuni ꞌouge haḡaeꞌohe. 34 Ebu zaꞌe ḡauze bare ziniꞌuma raꞌeteꞌe azaḡa daꞌo zinihi reine, Badiꞌaꞌa mene niguziꞌuma. Sauꞌa azaḡa zuni ḡauze bare meiniꞌuma rae zamareꞌenaꞌa, sauꞌa azaḡa ḡauze ziniꞌohe.

35 Rehano agireze azaḡa vetuḡazoꞌi, zu zeḡe mazao manoḡa haḡaoꞌi! Ebu bare naenaeniꞌuma rae mene zamareꞌenaꞌa zenoꞌi! ꞌOugine, Badiꞌaꞌa naeḡa boro ziniꞌuma, ebu zaꞌe Ḡihiꞌa Hune Badiꞌa ubuga reꞌuma. Mazaḡa Badiꞌa mene matuꞌo hauꞌeteꞌe azaḡa ebu sauꞌa haḡaeꞌeteꞌe azaḡa zuni Badiꞌaꞌa vetuḡaziꞌohe. 36 Zae Mama Badiꞌaꞌa vaze vetuḡaziꞌeteꞌe teige, zae zuni vaze vetuḡazoꞌi!

37 Vaze mazao sauꞌa azaḡa rae ago zoꞌi! ꞌOugine Badiꞌaꞌa zae zuni sauꞌa azaḡa rae mene ziꞌuma. Vazeꞌa sauꞌa haḡaoꞌidene, riḡa ago ḡorezoꞌi! ꞌOugine Badiꞌaꞌa zuni zae sauꞌa riḡa mene ḡoreziꞌuma. Zeḡe sauꞌa rae modoꞌi! ꞌOugine Badiꞌaꞌa zuni zae sauꞌa rae modiꞌuma.

38 Ḡauze zenoꞌi! ꞌOugine Badiꞌaꞌa manohuga ziniꞌuma. Badiꞌaꞌa zaꞌe iriꞌavone fosafosanoga, taugoga, zuꞌizuꞌinoga ebu foraꞌaḡa beuꞌe ruruno ziniꞌuma. Zaꞌa vaze mazao nagini haḡaine, Badiꞌaꞌa zae mazao ꞌouge haḡaiꞌuma.”

39 Iesuꞌa hari ꞌahoga idaniro, raenaꞌa, “Kuruḡa vazeḡaniꞌa kuruḡa vazeḡa ibitohaune, anianine hoꞌona ꞌuite ovoiꞌuma. 40 Tahiꞌaꞌe ani ihore vazeḡa mene vitiniꞌuma. Rehano iniu faifaine ihonine, ani zuni ihore vazeḡa teigiꞌuma.

41 Ḡaꞌe nabugo ubumao beꞌa dinunuḡa ḡianeꞌohe. Rehano nougadu ḡae ubumao beꞌa gado ireḡa mene ḡianeꞌohe? 42 Ḡaeꞌa ubumaḡo beꞌa gado ireḡa izema ḡianogano, negoḡo mazao ꞌahige raꞌohe. 'Negohe, ubumaḡo beꞌa dinunu eꞌe mae vaḡinihi!' Ḡa, zama guhi vazeḡa! Ibite geno ḡae mazao gado ireḡa eꞌe mae vaḡinoꞌi! Ebu ḡaꞌa faine ehamanadu negoḡo mazao ubuma dinunuḡa mae vaḡiniꞌuma.

43 Eꞌe teige, ire manoḡaꞌe maḡa sauꞌa mene iniꞌohe, u ire sauꞌaꞌe maḡa manoḡa mene iniꞌohe. 44 Ireꞌe maḡa horonadu nagi ireḡa edereꞌohe. Figi maḡaꞌe ire renoga zamaḡano mene iniꞌohe zu vaini maḡaꞌe ḡunu renoga zamaḡano mene iniꞌohe. 45 Eꞌe teige, vaze manoḡaꞌe zamaḡano manoḡa zamaradu manoḡa fureneꞌohe, ebu sauꞌa vazeḡaꞌe sauꞌa zamaradu sauꞌa fureneꞌohe. Mazaḡa nagini zamaḡano iriꞌave radiuꞌetaꞌaꞌe hebeꞌaꞌonoꞌo buauꞌohe.

46 Zaꞌe eḡe mazao, 'Zuhia Boro, Zuhia Boro,' rae huheꞌohe, rehano nougadu eꞌa ḡoereꞌeteꞌe haḡaiḡaꞌe mene haḡaeꞌohe? 47 Eḡe vaḡe onaadu ḡoerehe egadu haḡaeꞌeteꞌe vazeḡaꞌe iniu heuḡa rae eḡeꞌa ihoziꞌuma. 48 Aniꞌe raha huꞌi vohutuna ovoadu vatava riḡa rana neḡa ohoneꞌeteꞌe vazeḡa heuḡa. Zobozoboꞌa feuradu ne eꞌe haganine, ne aꞌe edau gigaraꞌuma, mazaḡa haba riḡano ogoraro. 49 Rehano eḡe ḡoere egadu haḡaiḡa mene haḡaeꞌeteꞌe vazeḡaꞌe, haba zoreḡano neḡa ogoruꞌeteꞌe heuḡa. Zobozoboꞌa feuradu ne eꞌe haganine, zogone higanadu fahau ḡuzuhiꞌuma.