1 Mada ꞌahogano Iesuꞌe haba ꞌahogano kurau radiro. Kuru hauḡirotene, ane tahiꞌa tibaniꞌa aradu niro, raenaꞌa, “Zuhiꞌa Boro, Ioane Babatizoꞌa ane tahiꞌatahiꞌa kuru ibiḡa ihoziroteꞌe teige, emeḡe zuni nougenouge kurauꞌeteꞌe ihofoꞌi!” 2 Ebu Iesuꞌa ziro, raenaꞌa, “Kuranoꞌidene ꞌahige kuranoꞌi!

5 Ebu Iesuꞌa zinaꞌa, “Hari ꞌahoga idaniꞌuma. Zae boꞌaḡano vaze tibaꞌe vazeḡeta reifo. Ohere nema ꞌahogano ani ane vaze vaḡe onamadu uminifo, raenaꞌa, 'Vazehe, fase, beredi uḡidu nu enoꞌi, 6 mazaḡa e vazehe ꞌahoganiꞌa iziduꞌu iꞌudoni feureha, rehano e neheo nagini haꞌuma ogomuḡa oꞌoꞌa.'”

7 Iesuꞌe ane tahiꞌatahiꞌa ḡadiziro, raenaꞌa, “Ane vazeꞌa ne zamaḡanonoꞌo ꞌahige naenaeniꞌuma ga? 'Nagini huḡane irareꞌohe! Ibiheta ꞌai bireha, ebu e tahiꞌaheta bazeꞌe ꞌahine, iḡunadu ḡau ni ꞌahoga mene ḡaniꞌuma!' Mene, aniꞌe mene ꞌouge reꞌuma! 8 E ziꞌohe, ane vaze uꞌano daꞌo, iḡunadu berediḡa mene haꞌuma, rehano aniꞌa bare bare umineꞌeteꞌe uꞌano, iḡunadu umideꞌeteꞌe ḡauḡa haꞌuma.

9 Eꞌanoꞌo eꞌe ziꞌohe. Za nagini uratoꞌidene, Badiꞌa mazao umidoꞌi, ꞌougine ziniꞌuma. Za nagini vaḡoꞌidene, Badiꞌa mazao umidoꞌi, ꞌougine hidiꞌuma. Badiꞌaꞌa danazoga uratine, ibihetao toketokeroꞌi, ꞌougine ibiheta vavaoziniꞌuma. 10 Umideꞌeteꞌe vazeḡaꞌe haꞌuma, vaḡeꞌeteꞌe vazeḡaꞌe hidiꞌuma ebu toketokereꞌeteꞌe vazeḡaꞌe ibiheta vavaohaꞌuma.

11 Zae boꞌaḡano moze nagiḡaꞌe, ane ubuganiꞌa ḡozone umidine, mohe haꞌumahe? 12 Ebu ubuganiꞌa bare kokoro maḡa umidine, moganiꞌa asiasi haꞌumahe? Mene ꞌougiꞌuma! 13 Zaꞌe haḡai sauꞌa azaḡa rehano, ḡau manomano ubudeze zenoga urateꞌohe. Eꞌe teige, zae Moze, adureo radiuꞌetaꞌaꞌe, ane mazao umideꞌeteꞌe azaḡa, Vine Zaḡoḡa hube hune ziniꞌuma!”

14 Mada ꞌahogano Iesuꞌa mene ḡoereꞌeteꞌe vaze ꞌahoga mazao vine sauꞌa hegone buniro. Ani bare ḡoerirotene, vaze ḡuḡuvaḡaꞌe zaguzagaro. 15 Rehano vaze nuꞌe horonadu raenaꞌa, “Iesuꞌa vine sauꞌa sauꞌa zuhiꞌaḡa Satani, niḡa ꞌahoga Belezebulo, ane inaraḡa hina vine sauꞌa hegoze buzeꞌohe.” 16 U nuꞌe Iesu obone tihi radu tuhune nuriꞌenaꞌa reiro. 'Badiꞌaꞌonoꞌo haḡai nu badeḡa haḡaoꞌi!'

17 Rehano Iesuꞌa ze nouge rae zamarirotaꞌe ederadu ziro, raenaꞌa, “Haba tiba zamaḡano zeḡeꞌa rovotadu utitifone, eꞌe habaꞌe ane bare ruiniꞌuma. Ebu ne tiba zamaḡano zeḡeꞌa rovotadu utitifone, ne eꞌe ane bare ruiniꞌuma. 18 Zaꞌe eḡeꞌa Belezebulo inaraḡa hina vine sauꞌa hegone buneꞌohe rae raꞌohe. Rehano ꞌougine, Sataniꞌe zeḡe bare rovozadu utitiꞌuma ebu zeḡe habaꞌe mene edau gigaraꞌuma. Eꞌanoꞌo e inaraꞌe mene Belezebuloꞌonoꞌo, rehano Badiꞌaonoꞌo! 19 Eḡeꞌa Belezebulo inaraḡa hina vine sauꞌa hegoze buzifone, zae tahiꞌatahiꞌaꞌe iniu inara hina vine sauꞌa hegoze buzeꞌohe? Zae tahiꞌatahiꞌaꞌe zae mazao veꞌoḡa rae reꞌuma. 20 Rehano eḡeꞌa vine sauꞌaꞌe Badiꞌa inaraḡa hina hegoze buzine, za ederoꞌi, Badiꞌaꞌa zae ibitoziniꞌohe.

21 E hari ꞌahoḡa idaidaniꞌuma. Inara vazeḡaꞌe uti ḡauḡa ḡauḡa hina neḡa taufine, ani ḡauḡa niduꞌa manoḡa radiꞌuma. 22 Rehano inaraḡa ufeta boro vazeḡa ꞌahoganiꞌa aradu vaze ꞌadi utite raharahanine, ane bireꞌeteꞌe uti ḡauḡa niduꞌa meine hauḡiꞌuma. Ebu ane ne ḡauḡa zu niduꞌa meinadu ḡahuge ḡuzuhiꞌuma. Hari ꞌahi teige, eꞌe Satani inaraḡa vitinoga, eꞌanoꞌo hegoze buzeꞌohe. 23 Iniu e mene teite reine, ani eḡe agirehiꞌeteꞌe vazeḡa. Ebu iniu Badiꞌa mazao vaze nuꞌozeꞌohe radu eḡe teite mene gaue tiburuꞌeteꞌe reine, ani Badiꞌa mazaoꞌonoꞌo vaze rovozeꞌeteꞌe vazeḡa.”

24 Ebu Iesuꞌa zinaꞌa, “Vine sauꞌa ani vaze ꞌahoga mazaꞌonoꞌo buauꞌetene, ani haba bohaꞌano ragaveꞌohe ebu ahiꞌa ohonoga radu haba ꞌahoga vaḡeꞌohe. Rehano mene horoneꞌetene, ani ꞌahige raꞌohe, raenaꞌa, 'E eḡeꞌa vaḡinateꞌe vazeḡa vaḡe bare onamihi.' 25 Ani baradu vaze eꞌe horonetene, aniꞌe neḡa deheḡa hune zu idaidane touga heuḡa. 26 Ebu vine sauꞌa eꞌeꞌa onamadu hena vine sauꞌa niduꞌa fuꞌo ꞌaheu fare, aꞌe ufeta hune sauꞌa, zamazeꞌohe, ebu vaze eꞌe mazao diuḡe radiuꞌohe. Ebu vaze eꞌe ani ufeta hune sautuꞌohe, ibite mene heuḡa.”

27 Iesuꞌa goereꞌeteꞌe zamaḡano roḡae ꞌahoḡaniꞌa vaze ḡuḡuvaḡa boꞌaḡanonoꞌo ḡoere iḡuniro, raenaꞌa, “Ḡae fureꞌiroteꞌe zu ḡubue borofiroteꞌe viꞌuḡaꞌe Badiꞌaꞌa manohuga haro!” 28 Rehano Iesuꞌa naenaeninaꞌa, “Badiꞌa ḡoere egadu haḡaiḡa haḡaeꞌeteꞌe azaḡaꞌe Badiꞌa manohuga hideꞌohe.”

29 Iesu vaḡe onairoteꞌe azaḡaꞌe ufeta ḡehararotene, Iesuꞌa ziro, raenaꞌa, “Izidi egaꞌe sauꞌa, 'Haḡai nu badeḡa ihofoꞌi!' rae raꞌohe. Rehano e haḡai nu badeḡaꞌe mene furenoziniꞌuma, u peroveta vazeḡa Iona mazao fureraroteꞌe haḡai nu badeḡa reꞌuma. 30 Iona mazao naginiꞌa fureniroteꞌe haḡaiḡaꞌe Nineva azaḡa mazao haḡai nu badeḡa reiro. Eꞌe teige, eḡe mazao naginiꞌa fureraꞌuma haḡaiḡaꞌe izidi ega mazao haḡai nu badeḡa reꞌuma.

31 Ibite madaḡano Siba habaꞌa kini roḡaeḡaniꞌa haba faḡanonoꞌo kini Solomona ḡoere abitoga veize onamiro. Izidi Solomona vitinoga vazeḡaꞌe eḡe, rehano za eḡe ḡoere abitoga mene urateꞌohe. Eꞌanoꞌo Badiꞌa kota madaḡano Siba kini roḡaeḡaniꞌa izidi ega zamao edanadu ziꞌuma, raenaꞌa, 'Zaꞌe veꞌoga!' 32 Ibite madaḡano Nineva azaḡaꞌe Iona haramo abitadu sauꞌaonoꞌo ḡihure ḡouriro. Izidi Iona vitinoga vazeḡaꞌe eḡe, rehano zaꞌe eḡe ḡoere abitoga mene urateꞌohe ebu mene ḡihureꞌohe. Eꞌanoꞌo Badiꞌa kota madaḡano Nineva azaḡaniꞌa izidi ega zamao edanadu ziꞌuma, raenaꞌa, 'Zaꞌe veꞌoga!'”

33 Ebu Iesuꞌa ziro, raenaꞌa, “Vaze ꞌahoganiꞌa ihure hufine mene ꞌuꞌuru tiꞌuma ga tunahu hina mene ogone modiꞌuma. U vazeꞌa ne diuḡine agaḡa horoniꞌuma radu midau tiꞌeteꞌe habaꞌano midau tiꞌuma.

34 Ḡa ubumaꞌe ahiꞌo ihureḡa heuḡa. Ḡa ubumaḡo manoḡa reine, ḡa ahiriꞌe agaḡaniꞌa irivaꞌiꞌuma. Rehano sautaune, ḡa ahiriꞌe uzaboꞌa irivaꞌiꞌuma. 35 Eꞌanoꞌo ḡae zamao agaḡaꞌe uzabo ga mene ḡianoꞌi! 36 Ḡa ahiriꞌe agaḡaniꞌa irivaꞌadu uzaboḡa ꞌahoga oꞌoꞌa reine, aꞌe agaḡa bagaḡa ihureḡa ḡae rana agaruꞌeteꞌe heuḡa.”

37 Iesuꞌa ḡoere hauḡirotene, Farisea vazeḡa ꞌahoganiꞌa ane teite oganoga veize uminiro. Ebu Iesuꞌa ani ne onamadu ogomu fataḡa zamaine ehoriro. 38 Farisea vazeḡaꞌe Iesuꞌa izema oganogano ꞌevoꞌa mene vuzuꞌiroteꞌe horonirotene ani zaguzagaro, mazaḡa zeḡe vouḡa haḡaio, 'Evoꞌa ibite vuzuꞌadu ogafo,' rae reiro. 39 Ebu Zuhiꞌa Boroꞌa Farisea azaḡa ziro, raenaꞌa, “Farisea azaḡa, zaꞌe bioze zu siuvaze enoga daꞌo vuzuꞌe deheneꞌeteꞌe azaḡa heuḡa, mazaḡa ꞌevoreze vuzuꞌeꞌohe rehano, zamazeꞌe ununu zu sauꞌa toraḡa hina iriꞌaveꞌohe. 40 Zaꞌe mene huhuzaḡa! Badiꞌaꞌa enone daꞌo mene haḡairo, rehano zama zuni haḡairo. Evoreze daꞌo ago vuzuꞌoꞌi, rehano zamaze zuni dehenoꞌi! 41 Eꞌanoꞌo zae mereki zamaḡano ḡauze* Zaeꞌa meiroteꞌe ḡauze zahara azaḡa zenoꞌi! ꞌOugine zaꞌe Badiꞌa ubumaoꞌe deheḡa taugi reꞌuma.

42 Farisea azaḡa, zae fase vetuḡaḡa, aduga boro hidiꞌuma! Mazaḡa zaꞌe tirara nebaḡano eḡa zu murari teige komeꞌa fase gaubanana tiba Badiꞌa hauꞌohe. Rehano vaze mazao haḡai duduḡa haḡaeꞌeteꞌe zu Badiꞌa zamareꞌeteꞌe igi modeꞌohe. Za ḡau boro ꞌadiꞌe haḡaoꞌi, ebu komeꞌa komeꞌa zuni haḡaoꞌi! 43 Farisea azaḡa, zae fase vetuḡaḡa, aduga boro hidiꞌuma! Mazaḡa zaꞌe nuꞌonuꞌo neḡano vaze boroboroꞌa ehoreꞌeteꞌe habaꞌano ehorihi raꞌohe. Ebu vazevazeꞌa nuꞌonuꞌo habaꞌano hidine, 'Zuhiꞌa' rae gubaze ḡorezihi raꞌohe. 44 Zae, fase vetuḡaḡa, aduga boro hidiꞌuma! Mazaḡa zaꞌe rune iduḡa uꞌuruḡa heuḡa. Rune ahiꞌaꞌe idu zamaḡano ruhuḡa rehano, vazeꞌa eꞌe rana oname onaeꞌohe. Eꞌe teige, vazeꞌa horozeꞌetene zamazeꞌe toraḡa rae mene edereꞌohe.”

45 Mose goro ḡoeꞌa ihozeꞌeteꞌe vazeḡa ꞌahoganiꞌa Iesu niro, raenaꞌa, “Ihore vazeḡa! Ḡa ꞌouge ḡoereꞌeteꞌe eme zu rae sausaufeꞌeteꞌe heuḡa.” 46 Iesuꞌa naenaeninaꞌa, “Mose goro ḡoeꞌa ihozeꞌeteꞌe azaḡa, zae zuni fase vetuḡaḡa, aduga boro hidiꞌuma! Mazaḡa za ihoreꞌe riga hune, eꞌanoꞌo vazeꞌa hegotoga reine mene idaḡa. Zaꞌe vaze daꞌo aduga boro ziniꞌohe, rehano zae ꞌevore huduꞌa tiba hina zu mene hune danazeꞌohe. 47 Zae, fase vetuḡaḡa, aduga boro hidiꞌuma! Mazaḡa peroveta azaḡaꞌe vouḡazeꞌa zimiro, ebu zaeꞌa ze rune iduḡa rohorohoneꞌohe. 48 Vouḡazeꞌa peroveta azaḡa zemadu zaeꞌa iduze rohorohoneꞌetaꞌaꞌe, zaꞌe vouḡazeꞌa haḡai duduga haḡairo rae raꞌohe. 49 Eꞌanoꞌo Badiꞌa huhuzaḡa, ani reiro, raenaꞌa, 'Eḡeꞌa peroveta azaḡa zu apostolo azaḡa nu zeḡe mazao tuḡuziꞌuma, ebu nuꞌe zimiꞌuma, u nuꞌe sausauziꞌuma,' reiro. 50 Badiꞌaꞌa raha ꞌadi haḡairoteꞌe madaḡanonoꞌo peroveta azaḡa zimiro. Eꞌanoꞌo eꞌe adugaḡa niduꞌaꞌe, izidi eganiꞌa odohiꞌuma. 51 Aꞌe ibite Abela mau runiroteꞌe eꞌeanoꞌo onao ḡonaḡanobone Sakaria maro. Zakariaꞌe dibuꞌo fataḡa zu Badiꞌa ne zaḡoḡa hune boꞌaḡano mau runiro. E hube hune ziꞌohe, eꞌe aduga niduꞌaꞌe izidi eganiꞌa odohiꞌuma. 52 Za, Mose goro ḡoeꞌa ihozeꞌeteꞌe azaḡa, fase vetuḡaḡa, aduga boro hidiꞌuma! Mazaḡa vazeꞌa Badiꞌa edeḡa meꞌuma neḡa ibihetaḡa vavaꞌeꞌeteꞌe kiḡaꞌe, zaeꞌa uꞌuru ti onaeꞌohe. Eꞌanoꞌo zaꞌe mene diuḡiꞌuma, ebu Badiꞌa ederoga veize diuḡihi raꞌeteꞌe azaḡa zuni zaeꞌa ꞌueꞌohe.”

53 Iesuꞌe ḡoere hauḡadu ne beꞌanoꞌo buarotene, Farisea zu Mose goro ḡoeꞌa ihozeꞌeteꞌe azaḡaniꞌa ane mazao maḡunu monede riḡa ḡadiḡadiniro. 54 Mazaḡa aniꞌe nagini nu rae veꞌonine adugano mae ohonihi rae inariro.