1 Mada ꞌahogano Iesuꞌa ane tahiꞌatahiꞌa ziro, raenaꞌa, “Vaze sauꞌa moneo tutuzeꞌeteꞌeꞌe ḡauḡaꞌe mada niduꞌa fureraꞌuma, rehano vaze haḡai sauꞌano tutuzeꞌeteꞌe vazeḡaꞌe, fase vetuḡaḡa, aduga hidiꞌuma. 2 Aniꞌa komeꞌa komeꞌa boꞌaḡano tibani zu sauꞌano tutune ihonine, eꞌe vazeḡaꞌe hadi horeḡa unuḡano aute varahadu davarao feunineꞌe manoḡa. 3 Eꞌanoꞌo tohutohoꞌi! Ekalesia nabugoꞌa sauꞌa haḡaoꞌidene, riḡa ḡorenoꞌi, raenaꞌa, 'Ḡa veꞌoreha haḡai sauꞌa ago haḡaoꞌi!' Ebu ani haḡai sauꞌanonoꞌo ḡihuroꞌidene, sauꞌaḡa rae modoꞌi! 4 Aniꞌa mada tiba zamaḡano ḡae 7 sauꞌa ḡae mazao haḡaine zu ḡae 7 bare onaadu 'E ḡa mazao haḡai sauꞌa haḡaeha,' rae roꞌidene, ane sauꞌa aḡutu modoꞌi!”

5 Mada ꞌahogano apostolo azaḡaniꞌa Zuhiꞌa Boro niro, raenaꞌa, “Eme ḡa mazao fiieꞌeteꞌe ufeta borofoꞌi!” 6 Zuhiꞌa Boroꞌa naenaezinaꞌa, “Zaꞌa eḡe mazao fieꞌetaꞌaꞌe fufu maḡa komeꞌa tiba heuḡa rehano, zaꞌa Irimo ireḡa ninaꞌa, 'Irimo ire, ḡaeꞌa bare taigota iḡunadu davarao ḡuhuroꞌi,' rae reine, ani za ḡoere egoziniꞌuma.”

7 Iesuꞌa bare zinaꞌa, “Zae boꞌaḡano vaze ꞌahoganiꞌa tuḡure vazeḡa ꞌahogaḡeta reine, tuḡure vazeḡa eꞌeꞌa mebao raha houniꞌuma ga mamoe taufiꞌuma. Ebu gauonoꞌo bare onaine, ane zuhiꞌaꞌa ꞌahige reꞌumahe, 'Aroꞌi, ehoradu oganoꞌi'? Mene! 8 Ani zuhiꞌaꞌa ꞌahige reꞌuma, raenaꞌa, 'Eḡe veize ḡorava ogomuḡa ḡorohoꞌi, dabaranoꞌi, ebu e ibite ogaꞌuma zamaḡano danahoꞌi! Eꞌe ḡaruganobuꞌu ḡaꞌa oganoꞌi!' 9 Ebu tuḡure vazeḡaꞌe gau haḡateꞌe veize ani zuhiꞌaꞌa manoḡa tauḡi rae mene niꞌuma. 10 Eꞌanoꞌo za zuni Badiꞌaꞌa zeateꞌe gauḡa haḡae hauḡoꞌidene, za ꞌahige roꞌi, 'Eme tuḡure azaḡa roḡeḡa. Emeꞌe gauꞌe tauḡeha.'”

11 Iesu ani Ierusalema habaꞌa uꞌa onaminu. Ebu ani Samaria zu Galilea habaꞌa nemaḡano onamiro. 12 Ani deꞌe habaꞌano ne ꞌahoga diuḡirotene, lefera azaḡa 10 faḡano edanadu Iesu horoniro. 13 Ebu ḡihau huaro, raenaꞌa, “Zuhiꞌa Boro Iesu, eme vetuḡafadu dehefe faifoꞌi!” 14 Iesuꞌa horozadu ziro, raenaꞌa, “Badiꞌa dibuꞌo hauꞌeteꞌe azaḡa vaḡe onamoꞌi, ebu ahirize ihozoꞌi! Zeꞌa za manora ga mene rae ḡiaziꞌuma.” Ebu ze ibio onameꞌeteꞌe zamaḡano, leferazeꞌa deheru manoriro.

15 Vaze tibaꞌe leferaḡaniꞌa manoroga horonirotene, Iesu vaḡe bare onadu ḡihau huauꞌenaꞌa, Badiꞌa niḡa niguniro. 16 Vaze ꞌadiꞌe Samaria vazeḡa. Ani Iesu oda babaḡano rahao ovoe ḡuḡuradu niro, raenaꞌa, “Zuhiꞌa Boro, ḡaꞌa deheheha! Manoḡa tauḡi!” 17 Ebu Iesuꞌa ḡadiniro, raenaꞌa, “E vaze 10 dehe faizeha, rehano vaze 9 nouꞌeꞌe? 18 Iuda mene vazeḡa ḡaꞌa daꞌo baradu Badiꞌa nigunahehe?” 19 Ebu Iesuꞌa vaze eꞌe niro, raenaꞌa, “Iḡune edanadu onamoꞌi! Ḡaeꞌa eḡe mazao fieꞌeteꞌeꞌa ḡaboꞌeha.”

20 Mada ꞌahogano Farisea azaḡaniꞌa Iesu ḡadiniro, raenaꞌa, “Badiꞌaꞌa ibitohauꞌeteꞌe habaꞌaꞌe naniꞌa ariꞌuma?” Iesuꞌa naenaeziro. “Badiꞌaꞌa ibitohauꞌeteꞌe habaꞌaꞌe onaeꞌeteꞌe vazeꞌa ubumaze hina ḡianoga mene idaḡa. 21 'Ani ahama raꞌohe,' ga 'Ani omoa raꞌohe,' deꞌuge mene rae reꞌuma, mazaḡa Badiꞌaꞌa ibitohauꞌeteꞌe habaꞌaꞌe zae boꞌaḡano* zae zamaḡano radiuꞌohe.”

22 Ebu Iesuꞌa ane tahiꞌatahiꞌa ziro, raenaꞌa, “Zaꞌa zazore mone mada ꞌahogano, eḡe, Vaze Ubuga ḡiahihi reꞌuma, rehano zaꞌe e mene horohiꞌuma. 23 Vazeꞌa raenaꞌa, 'Ḡianoꞌi, Iesu omoꞌeꞌe' ga 'Iesu ꞌahiꞌeꞌe,' rae zoꞌidene, ago buau onamoꞌi zu ago hegotoꞌi! 24 E, Vaze Ubuganiꞌa bare onaine, vaze niduꞌa huneꞌa horohiꞌuma. Aꞌe, viriꞌa vazahadu adure nae ruganonoꞌo nae ruga aganadu vaze niduꞌa horoneꞌeteꞌe heuḡa. 25 Rehano eꞌe ḡauḡa izema fureranogano, eꞌe aduga ḡehaḡa hidiꞌuma zu izidi azaḡaniꞌa eḡe hezahohiꞌuma.

26 Eḡe, Vaze Ubuganiꞌa bare onaiꞌuma madaḡanoꞌe vazevazeꞌa Noa madaḡano haḡainuteꞌe teigiꞌuma. 27 Eꞌe madaḡano vazevazeꞌa radiunuteꞌe radoneḡano ogaunu, gaginu zu hahurinu onamo Noaꞌa ḡasi boro diuḡiro. ꞌOugadu zoboꞌa onaadu zeḡe niduꞌa ruize hauḡiro. 28 Ebu eḡe, Vaze Ubuganiꞌa bare onaiꞌuma madaḡanoꞌe vazevazeꞌa Lota madaḡano haḡainuteꞌe teigiꞌuma. Zeḡeꞌa radiunuteꞌe radoneḡano ogaunu, gaginu, maketinu, hihinu ebu neze ogoraunu. 29 Rehano Lotaꞌa Sodoma habaꞌa mode iḡunirotene, ire roga zu ire roga hadiḡaniꞌa adureonoꞌo iruḡu teige rururu ovoiro ebu niduꞌa hune ruize hauḡiro. 30 Eḡe, Vaze Ubuganiꞌa adureonoꞌo bare onaine, aꞌe eꞌe madaḡa teigiꞌuma.

31 Eꞌe madaḡano iniuꞌa ne enona radiuꞌeteꞌe vazeḡaꞌe ḡauḡa mouga veize neḡa mene diuḡiꞌuma! Meba zamaḡano hiheꞌeteꞌe vazeḡa zuni neḡa mene bare onamiꞌuma! 32 Nugo zamaroꞌi, Lota inugaꞌe nougadu rudaro! 33 Iniu vaze ane ḡabone obone giganine, ani ḡabone tuḡutuḡu mene hidiꞌuma. Rehano iniu vaze ane ḡabone eḡe ꞌuano ahetine, ḡabone tuḡutuḡu hidiꞌuma. 34 E ziꞌohe, eꞌe bare onaiteꞌe oheꞌano vaze ꞌaheuꞌe evane tibano baziꞌuma. Eꞌe zamaḡano ꞌahogaꞌe zamahaꞌuma, u ꞌahogaꞌe mode iḡuniꞌuma. 35 Roḡae ꞌaheuꞌe uvahu mirune radiꞌuꞌeteꞌe zamaḡano, ꞌahogaꞌe zamahaꞌuma, u ꞌahogaꞌe mode iḡuniꞌuma† Mirihe fariroteꞌe ꞌahogaꞌe v. 36 ꞌahige raꞌohe, 'Ohoze ꞌaheuꞌa mebao gauꞌeteꞌe zamaḡano, ꞌahogaꞌe zamahaꞌuma, u ꞌahogaꞌe mode iḡuiꞌuma.'.” 37 Ebu ane tahiꞌatahiꞌaꞌa ḡadiniro, raenaꞌa, “Zuhiꞌa Boro, ꞌahiꞌe nouma fureraꞌuma?” Iesuꞌa naenaeziro. “Naginiꞌa rudanateꞌe habaꞌano gaozaꞌa nuꞌoraꞌuma.”