1 Iesu ani Ieriko habaꞌano feuradu vitau onamiro. 2 Eꞌea vaze ꞌahoga niḡa Zagaioꞌa radiunu. Aniꞌe takesi azaḡa ḡihiꞌaḡa zu maꞌora vazeḡa. 3 Ani Iesu ḡianihi reiro, rehano aniꞌe vaze futuꞌa ꞌahine vaze ḡuḡuvaḡa boꞌaḡanonoꞌo Iesu horonoḡaꞌe mene idararo. 4 Eꞌanoꞌo ani Iesu horonoga radu dure ibitadu ibi genaḡano Nuguri ireḡa ꞌahoga sibiriro, mazaḡa Iesu ani eꞌe ibiḡano vitaꞌuma. 5 Ebu Iesuꞌa eꞌe habaꞌano feurirotene, ani ite ehamanadu Zagaio huniro, raenaꞌa, “Zagaio! Ḡarihe bua ovaoꞌi! E izidi ḡae neo radiꞌuma.” 6 Zagaio ani ḡarihe sibire buanadu matuꞌu boroḡeta ane neo Iesu mae ḡihiniro. 7 Vaze vazeꞌa eꞌe horonadu zeḡe niduꞌa gumude ḡoeriro, raenaꞌa, ''Iesu aniꞌe haḡai sauꞌa vazeḡa neo diuḡe radiuꞌohe!”

8 Ebu ane ne zamaḡano, Zagaioꞌa iḡune edanadu Zuhiꞌa Boro niro, raenaꞌa, “Zuhiꞌa Boro, ḡianoꞌi! E izidi eḡe ḡau ḡahaꞌa zahara azaḡa ziniꞌuma. Zu eḡeꞌa vaze mazao ḡuriradu ḡau ꞌahoga meiniro reine, eḡeꞌa ḡae ḡazaḡa bare barono ziniꞌuma.” 9 ꞌOugadu Iesuꞌa naenaeniro, raenaꞌa, “Izidi ḡae zu ḡae teite ne tibano radiuꞌeteꞌe azaḡaꞌe Badiꞌaꞌa zeḡe sauꞌanonoꞌo ḡabozeha, mazaḡa ḡae zuni ḡae vouḡa Aberahamo teige Badiꞌa mazao fieꞌohe. 10 Eḡe, Vaze Ubugaꞌe, dauḡiroteꞌe azaḡa vaḡoga zu ḡabozoga veize onairo.”

11 Iesuꞌa Ierusalema habaꞌa hanitirotene vazevazeꞌa ꞌahige zamariro, raenaꞌa, 'Iesu ani Ierusalema habaꞌa diuḡine, ani kini reꞌuma ebu Badiꞌaꞌa ibitohauꞌeteꞌe habaꞌaꞌe zogone fureraꞌuma.' Eꞌanoꞌo ze Iesu ḡoere ize abiteꞌeteꞌe zamaḡano, Iesuꞌa hari ꞌahoga idaniro, raenaꞌa,

12 “Vaze ꞌahogaꞌe niḡa boro. Aniꞌa kini rouga radu haba faḡa onamihi ebu bariꞌuma rae reiro. 13 ꞌAhine ani izema onamogano, tuḡureḡa azaḡa 10 huzadu zeḡe niduꞌa moni tiba tiba* Girikio, 'Mina', Mina tibaꞌe mada 100 naeḡa ziniro. Ebu zinaꞌa, 'Moni ꞌahi hina moni borofoꞌi onamo eḡeꞌa bare onaiꞌuma.' 14 U ane haba azaḡaniꞌa ani kini rouga mene uratiro. Ebu ane ḡaruna hari odohe dureꞌeteꞌe azaḡa tuḡuzadu haba zuhiꞌaḡa mazao uminiro, raenaꞌa, 'Ani emeḡe kini rouga mene urateꞌohe!'

15 Rehano haba zuhiꞌaḡaniꞌa ani kinio ohonadu bare onairo. Aneꞌa moni ziniroteꞌe tuḡure azaḡa huzadu zeꞌa nougenouge moni borofiroteꞌe ederihi rae reiro. 16 Ebu tuḡure vazeḡa ibiꞌaniꞌa ane vaḡe onaadu raenaꞌa, 'Zuhiꞌa, ḡaꞌa iniroteꞌe moni tiba hina moni 10 haḡaeha.' 17 Ane zuhiꞌaꞌa ninaꞌa, 'Manoḡa taugi! Ḡaꞌe tuḡure vazeḡa manoḡa! Ḡa gau komeꞌa faine odohe gaueha uꞌano, neḡa neḡa niduꞌa 10 ḡianeꞌeteꞌe vazeḡano ohoꞌiꞌuma.' 18 Tuḡure vazeḡa ꞌaheuḡaniꞌa onaadu zuhiꞌaḡa ninaꞌa, 'Zuhiꞌa, ḡa iniroteꞌe moni tiba hina bare moni fuꞌo haḡaeha.' 19 Ane zuhiꞌaꞌa naenaeniro, raenaꞌa, 'Manoḡa tauḡi! Ḡa zuni neḡaneḡa niduꞌa fuꞌo ḡianeꞌeteꞌe vazeḡano ohoꞌiꞌuma.'

20 Rehano tuḡure vazeḡa ꞌahoganiꞌa onaadu raenaꞌa, 'Zuhiꞌa, ḡa moni ahiꞌeꞌe. Eḡeꞌa mene daunoga veize dabua hina umadu uꞌuru tiro. 21 Ḡaꞌe vaze riḡa. Vazeꞌa tiroteꞌe ḡauḡa ḡaꞌa maꞌohe, zu vazeꞌa ḡoraroteꞌe ḡauḡa ḡaꞌa hiriveꞌohe. Eꞌanoꞌo e ḡa mazao rihanadu ꞌouge haḡairo.' 22 Ane zuhiꞌaꞌa naenaeniro, raenaꞌa, 'Ḡaꞌe tuḡure vazeḡa sauꞌa! Ḡaꞌa raꞌeteꞌe ḡoeꞌa uꞌano, e ḡa aduga ḡaniꞌuma! Eꞌe vaze riḡa radu vazeꞌa tiꞌeteꞌe zu ḡorauꞌeteꞌe ḡauḡa maꞌohe rae ederifone, 23 ḡa nougadu e moni moni neḡano mene tiro? ꞌOugifone e bare aradu moni eꞌe bare ragate meifo. 24 Ebu ani vaetadu uhira edaroteꞌe azaḡa ziro. 'Ani mazao moni tiba eꞌe moꞌi, ebu moni 10 mateꞌe tuḡure vazeḡa hanoꞌi!' 25 Rehano zeꞌa ninaꞌa, 'Zuhiꞌa, ani moni 10 amahi maha.' 26 Ani naenaezinaꞌa, 'Oꞌe, rehano e ꞌahige rae zihi. Iniu vaze nagini hideꞌeteꞌe faine odohe gauine, ani hena borofe hidiꞌuma. Rehano iniu vaze nagini hideꞌeteꞌe mene faine odohe gauine, ani mazao nagini komeꞌa zuni meiniꞌuma. 27 Ebu eḡeꞌa kini rouga mene uratiroteꞌe agire azaḡa tutuze aradu eḡe zamao mau ruzoꞌi!”

28 ꞌOuge radu Iesu ani ane tahiꞌatahiꞌa zamao Ierusalema habaꞌa uꞌa itiro. 29 Olive maḡano Betefage zu Betania neḡano feurirotene, ane tahiꞌa ꞌaheu tuḡuziro. 30 Ebu zinaꞌa, “Zama mone neḡa onamoꞌi. Diuḡine, doniki modohuḡa, vaze ꞌahoganiꞌa mene ehoroga ḡauḡa eꞌea ꞌute touga horoniꞌuma. Ebu fuhiꞌadu ꞌahi mae aroꞌi! 31 Vaze ꞌahoganiꞌa ḡadizenaꞌa, 'Nougadu fuiꞌeꞌohe?' roꞌidene, 'Zuhiꞌa Boroꞌa urateꞌohe,' rae noꞌi!”

32 Iesuꞌa ziroteꞌe idunaḡano ze onamiro ebu doniki modohuḡa horoniro. 33 Ze eꞌe fuhiꞌeꞌenogano, doniki modohuḡa eꞌe azaḡaniꞌa ḡadiziro, raenaꞌa, “Za nogadu eꞌe fuhiꞌeꞌohe?” 34 Zeꞌa naenaeninaꞌa, “Zuhiꞌa Boroꞌa urateꞌohe.” Ze ꞌouge reirotene doniki modohuḡa azaḡaniꞌa ziniro. 35 Ebu ze doniki modohuḡa mae Iesu vaḡe onamadu dabuaze doniki modohuḡa ḡarunio zahariro, ebu Iesu ani rana tiriro.

36 Iesuꞌa onameꞌeteꞌe zamaḡano, vaze ḡuḡuvaḡaniꞌa dabuaze ane ibio hirau onamiro. 37 Ebu ani Olive maḡanonoꞌo ovoeꞌeteꞌe ibiḡa hanitiro. Eꞌea Iesu ḡaruna hegoteꞌeteꞌe vaze ḡuḡuvaḡa niduꞌa onameꞌenogano matuꞌuzeta huauꞌenaꞌa, Badiꞌa niguniro, mazaḡa ze Iesuꞌa haḡainuteꞌe haḡai gigiꞌaḡa niduꞌa horoniro. 38 Zeꞌa raenaꞌa,

39 Rehano vaze ḡuḡuvaḡa boꞌaḡano Farisea azaḡa nuꞌa raenaꞌa, “Ihore vazeḡa, ḡa ḡaruna hegoteꞌeteꞌe azaḡaniꞌa ꞌouge raꞌeteꞌe gararoꞌi!” 40 Iesuꞌa naenaeziro. “E mene ꞌougiꞌuma. E ziꞌohe, ze mene niguhine, hadi zeḡeꞌa huanadu eḡe niguhiꞌuma.”

41 Iesuꞌa Ierusalema habaꞌa hanitadu habaꞌa eꞌe horonirotene niaro. 42 Ebu raenaꞌa, “Ierusalema azaḡa, izidi zaꞌe Badiꞌa teite uniho manoḡa maꞌeteꞌe ibiḡa edeḡa reifone, ḡabone hidifo. Rehano zae fase, izidiꞌe za eꞌe edenoga mene idaḡa. 43 Mada ꞌahoganiꞌa fureraꞌuma. Eꞌe madaḡano zae agire azaḡaniꞌa raha gabiꞌa merau ganaḡeḡeziꞌuma, ebu zamao haoziꞌuma. 44 Zeḡeꞌa zae haba zu haba azaḡa niduꞌa rahao zimi feuziꞌuma. Ebu zae ne ogoraroteꞌe hadiḡaꞌe niduꞌa fahe ḡuzuhiꞌuma, mazaḡa Badiꞌaꞌa zae vaḡe onairoteꞌe madaḡa mene ederiro ꞌahine.”

45 Iesuꞌa Ierusalema habaꞌa diuḡadu kuru neḡa onamiro. Ani deꞌe habaꞌano ḡau nunu seroneꞌeteꞌe azaḡa horozadu hegoze buziro. 46 Ebu zinaꞌa, “Buka Zaḡoḡa zamaḡano ꞌahige mirihiro, raenaꞌa, 'Badiꞌa neꞌe vazeꞌa kurauꞌeteꞌe neḡa reꞌuma.' Rehano zaeꞌa kuru neḡaꞌe ḡonore habaꞌa teige haḡaeꞌohe!”

47 Eꞌe ḡarugano Iesuꞌa mada niduꞌa kuru neḡano vaze ihozinu. Rehano Badiꞌa dibuꞌo hauꞌeteꞌe ḡihiꞌaḡaḡihiꞌaḡa, Mose goro ḡoeꞌa ihozeꞌeteꞌe azaḡa zu vaze boroboroꞌa ani matihi reiro. 48 Rehano ze ani maꞌuma ibiḡa mene hidiro, mazaḡa vaze niduꞌa Iesuꞌa reinuteꞌe ḡoeꞌa faifaine abitinu.