1 Isitiḡa Oꞌoꞌa Beredi Muiḡa, niḡa ꞌahogaꞌe Iḡine Modeꞌeteꞌe Muiḡa madaḡa hanitiro. 2 Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡaniꞌa Iesu manoga ibiḡa vaḡiro, mazaḡa vaze ḡuḡuvaḡaniꞌa ederine, utitiꞌuma radu rihoziro.

3 Isakariota vazeḡa niḡa Iudaꞌe Iesu tahiꞌa 12 zamaḡano tahiꞌa ꞌahoga. Sataniꞌa ane zama diuḡiro. 4 Ani Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu kuru neḡa taufeꞌeteꞌe ḡihiꞌaḡaḡihiꞌaḡa vaḡe onamiro. Ebu zeḡe ꞌevoreo Iesu riꞌiniteꞌe ibiḡa vaḡe ḡoeriro. 5 Ze matuꞌe rudanadu Iuda mazao ḡoere tiro, ninaꞌa, “Moni ḡaniꞌuma.” 6 Iuda ani naenaezinaꞌa, “Manoḡa!” Ebu ani vaze ḡuḡuvaḡa oꞌoꞌa zamaḡano Iesu riꞌinoga veize mada manoḡa vaḡiro.

7 Isiti Oꞌoꞌa Berediḡa Muiḡa madaḡa ibiꞌaꞌe Iḡine Modeꞌeteꞌe Muiḡa ebu dibuꞌo mamoeḡa ubuga mauꞌeteꞌe madaḡa, eꞌe reiro. 8 Iesu ani Petero zu Ioane tuḡuzeꞌenaꞌa, ziro. “Onamadu emeḡe oganoga veize Iḡine Modeꞌeteꞌe Muiḡa ruhibe toꞌi!” 9 Ebu zeḡeꞌa ḡadiniro. “Ḡa uraꞌe nouma ruhibe tiꞌuma?” 10 Aneꞌa naenaezinaꞌa, “Egoꞌi! Ierusalema habaꞌano diuḡine, ohoze ꞌahoganiꞌa vu ḡoḡoreḡa odoheꞌeteꞌe horoniꞌuma. Ebu ani ḡaruna hegotadu aneꞌa diuḡiꞌuma neḡa diuḡoꞌi! 11 Diuḡadu eꞌe ne vazeḡa ꞌahige ḡorenoꞌi, 'Ihore vazeḡaniꞌa ane tahiꞌatahiꞌa teite Iḡine Modeꞌeteꞌe Muiḡa* Iḡine Modeꞌeteꞌe Muiḡa mamoeḡa aꞌuma neḡa zamaḡaꞌe nouꞌeꞌe rae ḡadimuꞌohe.' 12 Ebu aniꞌa ne hitagano bazuni neḡa boro ꞌahoga ihoziꞌuma zu ruhibe teateꞌe ḡauḡa horoniꞌuma. Deꞌea ogomufe ruhibe toꞌi!” 13 Ze iḡunadu onamiro, ebu Iesuꞌa ziroteꞌe ḡauḡa niduꞌa horoniro. ꞌOugadu Iḡine Modeꞌeteꞌe Muiḡa ruhibe tiro.

14 Madaḡaniꞌa feurirotene, Iḡine Modeꞌeteꞌe Muiḡa afine, Iesu ani apostolo azaḡa teite eꞌe neḡa zamaḡano ehoriro. 15 Ebu aniꞌa ziro, raenaꞌa, “E izema aduga hidogano, zae teite Iḡine Modeꞌeteꞌe Muiḡa ꞌahi anoga hubehune uratiro. 16 Mazaḡa eḡeꞌa ziꞌohe, eꞌe Muiḡa ꞌahiꞌe mene bare aꞌuma onamo Badiꞌaꞌa ibitohauꞌeteꞌe madaḡano Iḡine Modeꞌeteꞌe Muiḡa huganiꞌa hubehune hudaꞌuma.”

17 Ebu ani vaini vuḡa bioḡa madu Badiꞌa mazao kuranadu ziro, raenaꞌa, “ꞌAhi madu zae zuni tahitahe gagoꞌi! 18 Mazaḡa eḡeꞌa ziꞌohe, eꞌe vaini vuḡa mene bare gagiꞌuma, onamo Badiꞌaꞌa ibitohauꞌeteꞌe habaꞌa madaḡaniꞌa onaiꞌuma.” 19 ꞌOugadu ani beredi meiro, zu Badiꞌa mazao kuranadu vahege tahitahadu ziniro. Ebu zinaꞌa, “Beredi ꞌadiꞌe eḡe ahiri. Zae ziniꞌohe. Eḡe zamaroga radu haḡaiḡa ꞌadi haḡaoꞌi!”

20 Ḡorava ogomuḡa enogano ani vaini vuḡa bioḡa madu ziro, raenaꞌa, “Bioḡa ꞌadi zamaḡanoꞌe eḡe ru. Eḡeꞌa zae uꞌano rudanadu ruheꞌa beꞌutiꞌuma, aꞌe ḡoitore iziga raꞌohe. 21 Rehano ḡianoꞌi! Eḡe revoniꞌuma vazeḡaꞌe emeḡe teite ogau tiburuꞌohe. 22 Eḡe, Vaze Ubugaꞌe Badiꞌa urao rudaꞌuma. Rehano eḡe revoniꞌuma vazeḡaꞌe aduga hune hidiꞌuma.” 23 ꞌOugadu ze bare ḡadimutitiro, raenaꞌa, “Emeḡe boꞌaḡano iniuꞌa ꞌouge haḡaiꞌuma?”

24 Ebu Iesu tahiꞌatahiꞌa boꞌaḡano iniuꞌe niḡa boro raenaꞌa zeḡeꞌa bare taꞌirotitiro. 25 Iesuꞌa zinaꞌa, “Avoꞌa kiniḡakiniḡaniꞌa zeḡe haba azaḡa zuhiꞌaziꞌohe, ebu gigiꞌazeta azaḡaniꞌe haba azaḡaniꞌa 'Duꞌu vazeḡa' rae huzeꞌohe. 26 Rehano zaꞌe ze teige ago ꞌougoꞌi! Zae boꞌaḡano iniuꞌa niḡa boro reihi reine, aniꞌe vaze niḡa komeꞌa heuḡa rae reꞌuma. Ebu iniuꞌe zuhiꞌa reihi reine, tuḡure vazeḡa heuḡa rae reꞌuma. 27 Iniuꞌe niḡa boro? Ehore ogauꞌeteꞌe vazeḡa ga tuḡure vazeḡa? Aꞌe ehore ogauꞌeteꞌe vazeḡa. Rehano eꞌe zae boꞌaḡano tuḡure vazeḡa heuḡa.

28 Eḡeꞌa aduga hide onainuteꞌe zamaḡano zaꞌe eḡe teite radiu onaeha. 29 Eꞌanoꞌo eḡe Mamaꞌa vaze niduꞌa ibitoziniꞌeteꞌe gigiꞌaḡa iniroteꞌe teige, e zae zuni eꞌe gigiꞌaḡa ziniꞌohe. 30 Ebu eḡeꞌa ibitohauꞌeteꞌe habaꞌano zaꞌe eḡe teite ogaꞌuma, zu kiniꞌa ehoreꞌeteꞌe habaꞌano ehoradu Isaraela azaḡa, 12 urabo, ibitoziniꞌuma.”

31 Ebu Iesuꞌa Simona niro, raenaꞌa, “Simona, Simona! ꞌAdi egoꞌi! Sataniꞌa, vuiti zuizuineꞌeteꞌe† Vuiiti hiriveꞌeteꞌe zamaḡano, vuiiti zuizuinine, hugaꞌe zamaḡano radiꞌohe ebu ogaḡaꞌe buau rururuꞌohe teige, zae zama tuhunoga veize Badiꞌa umineha. 32 Rehano Simona, e ḡaeꞌa eḡe mazao fieꞌeteꞌeꞌa mene dauḡifine ḡae rana kuraneha. Eꞌanoꞌo ḡaeꞌa ḡihuradu eḡe vaḡe bariꞌuma madaḡano negoḡo duḡuru inarazonoꞌi!” 33 Peteroꞌa naenaeninaꞌa, “Zuhiꞌa Boro, eꞌe ḡae teite ḡutaꞌuma, ebu ḡae teite rudaꞌuma zuni idaḡa!” 34 Iesuꞌa niro, raenaꞌa, “Petero, eḡeꞌa ḡaꞌohe, ohoḡore uzeuze ḡaeꞌa ḡae uḡidu ꞌoꞌohenaꞌa, e aḡuꞌa rae reꞌuma. Eꞌe ḡaruganobuꞌu kokorokuꞌa ugaꞌuma.”

35 Ebu Iesuꞌa ziro, raenaꞌa, “Eḡe gau haḡaoga veize tuḡuziroteꞌe madaḡano zaꞌe moni, nihara ebu tamaka mene odohe onamiro. Eꞌe zamaḡano za idararo ga mene?” Ze naenaeninaꞌa, “Idararo.” 36 Ebu Iesuꞌa raenaꞌa, “Izidiꞌe vazeꞌa mene danaziꞌuma, eꞌanoꞌo monize zu niharaze odohoꞌi! Iniu iniuꞌe vesinize oꞌoꞌa roꞌidene, dabuaze seronadu venisi hoitoꞌi‡ Eꞌe ḡoere idaidaḡa. Hugaꞌe 'Aduga hidoga uꞌano ruhiboꞌi'! 37 Ibite eḡe moneo peroveta vazeḡa Isaiaꞌa Buka Zaḡoḡano ꞌahige mirihiro, raenaꞌa, 'Vazeꞌa aniꞌe ḡonore azaḡa zamaḡano ꞌahoga rae reiro.' Eḡeꞌa ziꞌohe, eꞌe ḡoeꞌaꞌe hube hune fureraꞌuma. Eḡe hari ibite mirihirotaꞌaꞌe niduꞌa hudau onaeꞌohe.” 38 Zeḡeꞌa naenaeniro, raenaꞌa, “Zuhiꞌa Boro, emeḡe mazaoꞌe venisi ꞌaheu.” Iesuꞌa ziro. “ꞌAi ahiḡa!”

39 Ebu Iesu ani iḡaiḡa haḡainuteꞌe teige Olive maḡa ꞌuꞌa buau onamiro. Zu ane tahiꞌatahiꞌa ane hegotiro. 40 Iesuꞌe eꞌe habaꞌano feurirotene, ani zinaꞌa, “ꞌAha radiuꞌenaꞌa, Sataniꞌa soꞌosoꞌozine eḡe mazao fieꞌeteꞌeꞌa mene dauḡifine, kuranoꞌi!” 41 Ebu Iesu ani mobade onamadu obena hina tuḡadu kuraro, 42 raenaꞌa, “Mama, ḡa uratoꞌidene, eḡe mazaonoꞌo bioḡa aduga ꞌadi mae vaḡinoꞌi! Rehano mene eḡe ura, ḡae ura daꞌo haḡaoꞌi!” 43 Ebu tuḡure vigaꞌa adureonoꞌo ane vaḡe ovadu inaraharo. 44 Ani zamaḡa ufeta aduduꞌenaꞌa, zamaḡa tiba hanadu bare kuraro. Eꞌanoꞌo irairaniro ebu irairaḡaniꞌa ru teige rahao sore buaro.

45 Iesu ani kuru hauḡadu ane tahiꞌatahiꞌa vaḡe bare onamirotene ze bazuna haniziro. Mazaḡa zeꞌe vetuḡa raroteꞌanoꞌo ahirizeꞌa taoraro. 46 Eꞌanoꞌo aniꞌa ziro, raenaꞌa, “Za nougadu baze radiuꞌohe? Iḡunoꞌi! Sataniꞌa soꞌosoꞌozadu eḡe mazao fieꞌeteꞌe mene dauḡifine, kuranoꞌi!”

47 Iesuꞌa ḡoereꞌenogano, vaze ḡuḡuvaḡaniꞌa ani vaḡe onairo. Ebu Iesu tahiꞌa 12 boꞌaḡano Iudaꞌa ibitadu furaꞌinoga veize Iesu uhiḡa onairo. 48 Rehano Iesuꞌa raenaꞌa, “Iuda, ḡaꞌe eḡe Vaze Ubuga revonoga veize furaꞌihiꞌohe?” 49 Iesu tahiꞌatahiꞌaꞌe naginiꞌa fureraꞌuma ederirotene, ze Iesu niro, raenaꞌa, “Zuhiꞌa Boro, eme vesini hina utitozinine idaḡahehe?” 50 Ebu ane tahiꞌa ꞌahoganiꞌa venisi ahase bunadu Badiꞌa dibuꞌo hauꞌeteꞌe ḡihiꞌaḡa tuḡure vazeḡa variꞌiro. ꞌOugadu edaꞌe teḡaḡa buniro. 51 Rehano Iesuꞌa raenaꞌa, “Ago ꞌougoꞌi!” Ebu Iesuꞌa vaze eꞌe teḡa obonadu faine manoniro.

52 Iesu obonetouga veize onairoteꞌe azaḡa, Badiꞌa dibuo hauꞌeteꞌe ḡihiꞌaḡaḡihiꞌaḡa, kuru neḡa ḡianeꞌeteꞌe ḡihiꞌaḡaḡihiꞌaḡa zu vaze boroboroꞌe Iesuꞌa ziro, raenaꞌa, “Zaꞌe ḡonore vazeḡa obone tiꞌeteꞌe teige, vesini ebu somori boro madu eḡe obohe touga veize onaahehe? 53 Mada niduꞌa eꞌe zae teite kuru neḡano radiunu. Eꞌe zamaḡano zaꞌe mene obohe tiro. Rehano izidiꞌe zaꞌa eḡe oboheꞌeteꞌe madaḡa zu uzabo gigiꞌa madaḡa feureha.”

54 Ze Iesu obone teadu Badiꞌa dibuꞌo hauꞌeteꞌe ḡihiꞌaḡa ne tutune onamiro. Petero zu faḡanonoꞌo zeḡe ḡaruna hegotiro. 55 Vaze nu eꞌe ne ḡabiꞌa zamaḡano ire roga hofadu ehore ḡeḡemaḡiro. Petero zuni zeḡe teite ehoriro.

56 Tuḡure roḡaeḡa ꞌahoganiꞌa Peteroꞌe ire roga duhuḡano ehoreꞌenogano horoniro. Ani ḡiane runeꞌenaꞌa, ziro. “Vaze ꞌadi zuni Iesu teite radiudo!” 57 Rehano Petero ani oꞌoniro, raenaꞌa, “Roḡae, e vaze aꞌe aḡua!” 58 Mene faḡa enogano vaze ꞌahoganiꞌa horonadu niro, raenaꞌa, “Ḡa zuni Iesu gatineꞌeteꞌe vazeḡa ꞌahoga!” Rehano Peteroꞌa ninaꞌa, “Ohoze, eꞌe mene!” 59 Mada tahiḡa ḡarugano, vaze ꞌahoganiꞌa teꞌoteꞌau ḡoeriro, raenaꞌa, “Vaze ꞌadi hube hune Iesu teite radiudo, mazaḡa ani zuni Galilea vazeḡa!” 60 Rehano Peteroꞌa naenaeniro. “Ohoze! E ḡaꞌa nagini raꞌetaꞌaꞌe aḡuꞌa!”

Petero ani ize ḡoereꞌeteꞌe zamaḡano, kokorokuꞌa ugaro. 61 Zuhiꞌa Boroꞌa vaetadu Petero ḡianiro. ꞌOugadu Petero ani Zuhiꞌa Boroꞌa ꞌahige niroteꞌe zamariro, 'Ohoḡore uzeuze kokorokuꞌa izema uganogano, ḡaꞌa ḡae uḡidu eḡe oꞌohiꞌuma.' 62 Ebu ani Badiꞌa dibuꞌo hauꞌeteꞌe ḡihiꞌaḡa neonoꞌo buanadu niau rudaro.

63 Iesu ḡianeꞌeteꞌe azaḡaniꞌa ani ḡareḡareniro zu bouniro. 64 Ze ani ubumaḡa ꞌuadu bare ḡadiḡadiniro, raenaꞌa, “Ḡa peroveta vazeḡa ꞌahine, iniuꞌa bouꞌateꞌe vazeḡa ihofoꞌi!” 65 Ebu ḡoere sauꞌa sauꞌa hina ḡareḡareniro.

66 Irarirotene, vaze boroboroꞌa tibano nuꞌoraro. Zeꞌe Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡa. Zeḡe kota zamaḡano Iesu mae ohoniro. 67 Ebu zeḡeꞌa niro, raenaꞌa, “Efoꞌi! Ḡaꞌe Kerisohe?” Iesuꞌa naenaeziro, raenaꞌa, “Eḡeꞌa 'Oꞌe' rae zine, zaꞌe eḡe ḡoere mene mae ḡihiniꞌuma. 68 Ebu eḡeꞌa 'E Keriso ga?' rae ḡadizine, zaꞌe mene naenaehiꞌuma. 69 Rehano izidionoꞌo zama mone eḡe, Vaze Ubuganiꞌa Badiꞌa gigiꞌaḡa edaꞌe naeo ehoriꞌuma.”

70 Zeḡe niduꞌa ḡadiniro, raenaꞌa, “Tena ḡaꞌe Badiꞌa Ubugahehe?” Aneꞌa zinaꞌa, “Oꞌe, zaeꞌa eꞌe iniu rae ihiꞌohe.” 71 Ebu zeḡeꞌa zeḡe bare neneḡaniro, raenaꞌa, “Eme Iesuꞌe veꞌoḡa rae raꞌeteꞌe vazeḡa mene vaḡiꞌuma, mazaḡa emeḡeꞌa ane hebeonoꞌo ḡoere veꞌoḡa rateꞌe hube hune egeha!”