1 Iesu ani Iuda kuru neḡano bare diuḡiro. Evoꞌa beoḡa vazeḡa ꞌahoga zuni eꞌema. 2 Farisea azaḡa zuni eꞌea Iesu murirohaudo. Iesuꞌa Bana Madaḡa madaḡano, vaze eꞌe fainiꞌuma ga mene rae zamare radiro, kotao mae ohonoga veize. 3 Ebu Iesuꞌa evoꞌa beoḡa vazeḡa ninaꞌa, ꞌahige reiro. 'Iḡunadu aroꞌi!' 4 Ebuni Iesuꞌa murireꞌeteꞌe azaḡa ḡadizeꞌenaꞌa, ꞌahige reiro. 'Mose goro ḡoeꞌaꞌe, Bana Madaḡa madaḡano nagini haḡaine idaḡa raꞌohe? Vaze danaziꞌuma ga sausauziꞌuma? Ḡaboziꞌuma ga zimiꞌuma?' Rehano ze mene naenaeniro. 5 Eꞌanoꞌo Iesu ani maḡuneꞌenaꞌa, ehamu ragaviro, zuni zeḡe zama tuhiḡa uꞌano, vetuḡazi ruziro. Ebuni evoꞌa beoḡa vazeḡa niro. 'Evoꞌo einoꞌi!' reiro. Ani einiro, ebu evoꞌa ai manoriro.

6 Eꞌebone, Farisea azaḡa ai Iuda kuru neḡanonoꞌo buau ḡouriro. Ebu Heroda teite rauꞌeteꞌe azaḡa teite nuꞌoranadu, Iesu manoga ibiḡa vaḡido.

7 Iesuꞌe, ane tahiꞌa tahiꞌa teite Galilea duꞌuraḡa boro onamiro. Ebuni Galilea habaꞌanonoꞌo vaze ḡuḡuvaḡa ani teite ḡiriu onamiro. Ebu ḡuḡuva boroꞌa, Iudea habaꞌanonoꞌo, 8 Ierusalema neḡanonoꞌo, Idumea habaꞌanonoꞌo, Ioridana vuḡa mone afaonoꞌo, ebu Turo ebu Sidona habaꞌanonoꞌo onairo, mazaḡa zeꞌe Iesuꞌa nagini haḡairoteꞌe hariḡa niduꞌa igiro ꞌahine. 9 Ebuni ane tahiꞌa ziro. 'Eḡe veize ḡasi ꞌahoga mae toꞌi, vaze ḡuḡuvaḡaniꞌa tuꞌihe ruhiꞌuma bobo.' 10 Mazaḡaniꞌe, ibite aniꞌa ugi azaḡa ḡuḡuva ai faiziroteꞌe uꞌano, ugi azaḡa niduꞌa bibititiro, ꞌevoreze ani mazao ꞌuꞌutoga rae. 11 Ebuni vine sauꞌaniꞌa ragano reiroteꞌe azaḡaꞌa Iesu horonidotene, ane zamao ḡuḡuradu, hounaꞌe ḡoerido. 'Ḡaꞌe Badiꞌa Ubuga!' 12 Rehano aniꞌa ḡoere riḡa hina zinaꞌa, 'Ago rae furenoꞌi!' rae reido.

13 Eꞌe ḡarugano, Iesu ani maḡa ꞌahoga itiro. Aneꞌa uratiroteꞌe azaḡa huziro, ebuni ze ani vaḡe onamiro. 14 Ebuni aniꞌa gaubanana aheu fare (12) zamaziro, zeḡeꞌa ane ḡatinoga, zuni haramo tuḡuzoga veize, 15 zuni Badiꞌa gigiꞌa zenadu, vine sauꞌa hegoze buzoga veize. 16 Simonaꞌe niḡa ꞌahoga Petero rae turahiro. 17 Iakobo ani negoḡeta Ioane, zeꞌe Zebedeo ubuga. Nize ꞌahogaꞌe Boanere. Eꞌe huganiꞌe 'adureꞌa ḡudauꞌeteꞌe, eꞌe ubuga.' 18 ebu Aniderea, Filifo, Batolomeo, Mataio, Tomasi, Iakobo, ani Alefeo ubuga, Tadeo, Simona, ani Zelote vazeḡa,* Zelote vazeḡaꞌe Isaraela neḡa veize Roma gavamani teite utitidoteꞌe vazeḡa 19 ebu Iuda Isakariota, ani vesuꞌu Iesu revoharoteꞌe* vazeḡa.

20 Ebu Iesu ani bazuni neḡa onamiro. Rehano vaze ḡuḡuvaḡa hena bare nuꞌoraroteꞌe uꞌano, ani, tahiꞌaḡa teite oganoga zuni mene idararo. 21 Nabuganiꞌa hariḡa igiro, ebu ani bare tutune onamoga veize onairo. Mazaḡa vaze ai raenaꞌa, 'Ani ai baboraneha.' reiro.

22 Ierusalema neḡanonoꞌo, Mose goro ḡoeꞌa ihozeꞌeteꞌe azaḡa ovairo. Ebu ꞌahige reiro. 'Aniꞌe Satani, niḡa Belezebulo, eꞌeꞌa ragano reiro. Ebu aniꞌe, Belezebulo inaraḡa hina vine sauꞌa sauꞌa hegoze buzeꞌohe.'

23 Ebuni Iesuꞌa huzadu, hari idaidaḡa* ꞌahoga ziro. ꞌAhige reiro. 'Sataniꞌa satani ꞌahoga nouge nouge hegoze buziꞌuma?' 24 '|iGavamani|r neḡa tiba zamaḡano, zeḡeꞌa rovotadu, utitifone, eꞌe |igavamani|r neḡaniꞌe mene edau gigarafo. 25 Ebu iduhu tiba zamaḡano, zeḡeꞌa rovotadu, utitifone, eꞌe iduhuḡaniꞌe mene edau gigarafo. 26 Ebu satani zamaḡano, zeḡeꞌa bare utitadu, rovotifone, ze mene edau gigarafo, rehamo hauḡifo. 27 Vaze ꞌahoganiꞌa ize gezo inara vazeḡa ogoru tadu ane neo diuḡiꞌuma zu ani tohe ḡonotaꞌuma.

28 Hubehune eḡeꞌa ziꞌohe. vaze sauꞌ a niduꞌ a ebu Badiꞌ a rae sausauneꞌ eteꞌ e ḡoeꞌ a zu Badiꞌ aꞌ a rae modiꞌ uma. 29 U Vine Zaḡoḡa rae sausaunine, ani sauꞌaꞌe mene aḡutu modiꞌ uma, rehano iḡaiḡa ane mazao radiu tuḡutuḡu.'

30 Iesuꞌa hari idaidaḡa ꞌouge reirotaꞌaꞌe, ze raenaꞌa, 'Aniꞌe vine sauꞌaḡeita.' reiro ꞌahine.

31 Eꞌe ḡarugano, Iesu viꞌa ebu negoḡaniꞌa Iesu vaḡe onairo. Ne enogano edanadu, ḡoere tuḡuriro, Iesu hunoga veize. 32 Vaze ḡehaḡaniꞌa ḡurune ehoriro, ebu zeḡeꞌa ninaꞌa, 'Ḡianoꞌi! Viꞌu ebu negoḡoꞌe enoneo edauꞌohe. Ḡa vaḡeꞌohe.' 33 Aniꞌa naenaezinaꞌa, ꞌahige reiro. 'Nanuhe ebu negoheꞌe iniu?' 34 Ebuni aniꞌa, ḡurune ehoridoteꞌe azaḡa ehamu ragaveꞌenaꞌa, ziro. ꞌAhige reiro. 'Nanuhe ebu negoheꞌe ꞌadiꞌeꞌe. 35 Badiꞌa ura haḡaeꞌeteꞌe azaḡa, zeꞌe negohe, ezehe ebu nanuhe.'