1 Iesuꞌa eꞌe habaꞌa mode iḡunadu, Iudea habaꞌa onamiro. Ebu Ioridana vuḡano fariro. Ebu vaze ḡuḡuvaḡaniꞌa ane vaḡe bare isau onairo. Iesu ani, aneꞌa iḡaiḡa haḡaidoteꞌe teige, ihoziro. 2 Ebu Farisea azaḡa nuꞌa Iesu tuhune nurifine ani vaḡe aradu ḡadiniro, raenaꞌa, “Vaze ꞌahoganiꞌa inuga hegonogaꞌe idaḡahehe?” 3 Iesuꞌa naenaezinaꞌa, ꞌahige reiro. 'Mose goro ḡoeꞌaꞌe nouge raꞌohe?' 4 Zeḡeꞌa niro. 'Moseꞌa raenaꞌa, ohozeꞌa inuga hegonoga veize, fefa teadu, inuga haꞌuma, ebu hegoniꞌuma.' 5 Rehano Iesuꞌa ziro. 'Zaꞌe teḡaze riḡa ꞌahine, Moseꞌa goro ḡoeꞌa ꞌadi tiro. 6 Rehano ḡadaheḡano, Badiꞌaꞌa haba niduꞌa haḡairoteꞌe zamaḡano, “Badiꞌaꞌa ohoze zu roḡae haḡairo. 7 Eꞌanoꞌo ohozeꞌa viꞌa moga muhiziꞌuma, ebu ani inugeta tiburaꞌuma, 8 ebu ani anine aheu rehano tiba reꞌuma.” Eꞌanoꞌo zeꞌe mene aheu, rehano tiba. 9 Eꞌebanoꞌo Badiꞌaꞌa tibunirotaꞌaꞌe, vazeꞌa mene ꞌaꞌaniꞌuma.'

10 Vesuꞌu zeḡeꞌa neo diuḡiꞌ onamirotene, Iesu, tahiꞌaḡaniꞌa ḡadiniro. Aniꞌa ihoziroteꞌe moneo ḡadimaro. 11 Ebu Iesuꞌa ziro. 'Iniuꞌa inuga hegonadu, roḡae ꞌahoga meine, aꞌe aniꞌa inuga ḡahine aheteꞌeteꞌe haḡaiḡa teite idaḡa. 12 Ebu roḡaeꞌa iꞌa modadu, ohoze ꞌahoga meine, ani zuni iꞌa ḡahine aheteꞌeteꞌe haḡaiḡa haḡaeꞌohe.'

13 Vaze nuꞌa Iesu vaḡe eneze zamaze onairo, Iesuꞌa evoꞌa ranao touga veize. Rehano Iesu tahiꞌa tahiꞌaꞌa roziro. 14 Iesuꞌa eꞌe horonirotene, zamaḡa ḡuginiro. Ebu tahiꞌaḡa ziro. 'Tahiꞌa komeꞌa komeꞌa tuḡuzoꞌi, eḡe vaḡe aroga! Ago gararoꞌi! Mazaḡa Badiꞌaꞌa ibitohauꞌeteꞌe vazeḡaꞌe, tahiꞌa komeꞌa komeꞌa teige Badiꞌa ḡoere igiꞌeteꞌe vazeḡa. 15 E hubehune ziꞌohe. Iniuꞌa tahiꞌa komeꞌa teige, Badiꞌaꞌa ibitohauꞌeteꞌe mene mae ḡihinine, Badiꞌaꞌa mene ibitohaꞌuma.' 16 Ebu Iesuꞌa tahiꞌa komeꞌa tiba tiba ohane ḡihinadu, manina tiro, ebu evoꞌa zeḡe ranao teadu, Badiꞌa uminiro.

17 Iesu aniꞌa iḡunadu, ibio onamirotene, ohoze ꞌahoganiꞌa dure onairo, ebu Iesu babaḡano obena hina tuḡadu, ḡadiniro. 'Ihore vazeḡa manoḡa, e nagini haḡaine, ḡabone tuḡutuḡu hidiꞌuma?' 18 Ebu Iesuꞌa ninaꞌa, ꞌahige reiro. 'Ḡa nougaduni “E manoḡa” raꞌohe? Vaze manoḡaꞌe oꞌoꞌa. Rehano Badiꞌa daꞌoꞌe manoḡa. 19 Ḡaꞌe Mose goro ḡoeꞌa edeḡa. Aꞌe “Vaze ago manoꞌi. Inugo ago ḡahine ahetoꞌi. Ago ḡonotanoꞌi. Ago ḡurire ḡoeroꞌi. Ago ꞌuꞌuru moꞌi. Viꞌu mogo gubazoꞌi.” ' 20 Ebu aniꞌa Iesu niro. 'Ihore vazeḡa, eꞌe kobeḡanonoꞌo onao izidi, Mose goro ḡoeꞌa eꞌe niduꞌa haḡaido.' 21 Iesuꞌa ubuma ꞌue, ane ḡianiro, matuꞌoharo, ebu ꞌahige rae niro. 'Ḡaꞌe gau ꞌahoga ize mene haḡaeha. Onamoꞌi! Ḡae tohe zuni habaḡo niduꞌa hoite modoꞌi, ebu eꞌe |imoni|rḡaꞌe toheze oꞌoꞌa azaḡa zenoꞌi! ꞌOugine, ḡabone manoḡa meꞌuma Badiꞌa mazao. Ebuni eḡe ḡarunio aroꞌi!' 22 Aniꞌa eꞌe ḡoeꞌa igirotene, vetuḡararo. Ebu zamaḡa areꞌenaꞌa, onamiro, mazaḡa aniꞌe maꞌora* vazeḡa ꞌahine.

23 Iesuꞌa tahiꞌaḡa ḡiaze ragavadu, ꞌahige rae ziro. 'Maꞌora vazeḡaꞌe, Badiꞌaꞌa ibitohauꞌeteꞌe vazeḡa rougaꞌe riḡa bagaḡa.' 24 Ebu zeḡeꞌa eꞌe ḡoeꞌa igirotene, zaguzagaro. Rehano Iesuꞌa bare ziro. 'Eḡe tahiꞌa tahiꞌa, Badiꞌaꞌa ibitohauꞌeteꞌe vazeḡa rougaꞌe riḡa bagaḡa. 25 Kameroꞌe niduru hoꞌoga diuḡogaꞌe riḡa. Rehano maꞌora vazeḡaꞌe Badiꞌaꞌa ibitohauꞌeteꞌe vazeḡa rougaꞌe ufeta riḡa.” 26 Ze eꞌe igirotene, zamaze niduꞌa zaguzagaro, ebu Iesu niro. ꞌAhige reiro. 'ꞌOugine, iniuꞌa daꞌo ḡabone hidiꞌuma?' 27 Iesuꞌa ḡiazadu, ziro. 'Vaze aneꞌa bare ḡabone hidogaꞌe mene idaḡa, rehano Badiꞌaꞌa vaze ḡaboziꞌuma. Mazaḡa aniꞌe gau niduꞌa haḡaoga idaḡa.' 28 Peteroꞌa Iesu ḡoreniro. 'Ḡianoꞌi! Eme tohe niduꞌa modadu, ḡae ḡaruna hegoteꞌohe' 29 Iesuꞌa rae ziro. 'E hubehune ziꞌohe. Vaze ꞌahoganiꞌa neḡa, negoḡa, ezeḡa, viꞌa, moga, eneḡa ga habaꞌa, eḡe uꞌano zu Badiꞌa hari manoḡa uꞌano modine, 30 ani izidi madaḡano ḡae sinahu eꞌe bare meꞌuma. Neḡa, negoḡa, ezeḡa, viꞌa, eneḡa ebu habaꞌa bare meꞌuma, rehano aduga zuni hidiꞌuma. Ebu mada ḡonaganiꞌa onaine, ḡabone tuḡutuḡu* meꞌuma. 31 Rehano ibiteꞌeteꞌe azaḡa ḡehaḡaꞌe vesiꞌuma, u veseꞌeteꞌe azaḡa ḡehaḡaꞌe ibitiꞌuma.'

32 Iesu ebu ane tahiꞌa tahiꞌaꞌa, Ierusalema ibiḡano onameꞌegano, Iesuꞌa ibitiro. Eꞌe ḡianirotene, zeꞌe zaguzagaro. Hegotiroteꞌe azaḡa zuni riharo. Ebu Iesuꞌa ane tahiꞌa gaubanana aheu fare (12) bare huze onairo. Ebu naginiꞌa ane mazao fureraꞌuma, eꞌe ihoziro. 33 ꞌAhige reiro. “Ḡianoꞌi, emeꞌe Ierusalema iteꞌohe, ebu eḡe, Vaze Ubuganiꞌe dibuꞌo vazeḡa ḡihiꞌaḡihiꞌa zu Mose goro ḡoeꞌa ihozeꞌeteꞌe azaḡaniꞌa obohe tiꞌuma. Ebu zeḡeꞌa raenaꞌa, 'Ḡaꞌe rudaꞌuma,' reꞌuma. Ebu Baduꞌa aḡuꞌa azaḡa* ꞌevoreo riꞌihiꞌuma. 34 Zeḡeꞌa ḡirihoniꞌuma, soꞌabide vahiꞌuma, masihiꞌuma, ebu uḡuhiꞌuma. Ebuni mada uḡidu zamaḡano, bare ḡabode iḡuniꞌuma.'

35 Zebedeo ubuga, Iakobo zuni Ioaneꞌa Iesu vaḡe onaadu, ꞌahige rae niro. 'Ihore vazeḡa, eme gau ꞌahoga ḡaeꞌa haḡaofoga raꞌohe.' 36 Iesuꞌa ḡadizeꞌenaꞌa, 'Za uraꞌe, eꞌa nagini haḡao zinihi raꞌohe?' 37 Zeꞌa raenaꞌa, 'Ḡaeꞌa zuhiꞌa meꞌuma madaḡa moꞌidene, eme aheu, ꞌahoga edaꞌe moneo, ꞌahoga kauri moneo ohofoꞌi, eme nife boro reifine.' 38 Rehano Iesuꞌa zinaꞌa, 'Zaꞌe aḡuꞌa, nagini umideꞌetaꞌaꞌe. Eḡeꞌa gageꞌeteꞌe bioḡaꞌe aduga hidiꞌeteꞌe bioḡa, zae zuni eꞌe hina gagiꞌumahehe? Zuni eḡe bapatizohiꞌuma bapatizoḡa hina zae zuni bapatizoziꞌumahehe?' 39 Zeḡeꞌa 'Oꞌe' rae niro. Ebu Iesuꞌa zinaꞌa, 'Eḡeꞌa gagiꞌuma bioḡaꞌe, zae zuni eꞌe hina gagiꞌuma, zuni eḡe bapatizohiꞌuma bapatizoḡa hina, zae zuni bapatizoziꞌuma. 40 Rehano edaꞌehe naeo zuni kaurihe naeo ehoriꞌuma azaḡaꞌe, eḡe ꞌane mene reꞌuma. Rehamo eꞌe habaꞌaꞌe, Badiꞌaꞌa ohoziꞌuma reiroteꞌe azaḡaniꞌa daꞌo ehoriꞌuma.' 41 Iesu tahiꞌa gaubanana (10)ꞌa eꞌe igirotene, Iakobo zuni Ioane mazao maḡuniro. 42 Ebu Iesuꞌa huze nuꞌozadu ziro. 'Za edeḡa, avoꞌa habaꞌa zamaḡano, zuhiꞌa rae ziꞌeteꞌe azaḡaniꞌa, eꞌe ne azaḡa ibitoziniꞌohe ebu zeḡe ḡihiꞌa azaḡaniꞌa ze urateꞌeteꞌe idunaḡano ne azaḡa raḡano haḡaeꞌohe. 43 Rehano zaꞌe ago ꞌouge haḡaoꞌi! Zae boꞌaḡano iniuꞌe ḡihiꞌa reihi reine, aniꞌe zae tuḡure vazeḡa heuḡa rae reꞌuma. 44 Ebu iniuꞌa niḡa boro reihi reine, aniꞌe, zae niduꞌa veize tuḡure igiꞌeteꞌe vazeḡa reꞌuma. 45 Mazaḡa eḡe, Vaze Ubuganiꞌa onairotaꞌaꞌe, mene vazeꞌa eḡe tuḡure egoga veize, rehamo eḡeꞌa vaze tuḡure haḡaoga veize, ebuni vaze ḡehaḡa sauꞌa uꞌano, eḡe ḡabone hina Badiꞌa dibuꞌohanoga veize.'

46 Iesu ebu ane tahiꞌa tahiꞌaniꞌa Ieriko neḡano feuriro. Ebuni Iesu ani, ane tahiꞌa tahiꞌa ebu vaze ḡuḡuvaḡa teite Ieriko neḡa mode onameꞌenogano, ubumaḡa kuruḡa zuni umido vazeḡa, niḡa Batimeoꞌa ibi genaḡano ehore radiro. Aniꞌe Timeo ubuga. 47 Aniꞌa Iesu, Nazareta ne vazeḡa hanite onairoteꞌe igirotene, huau iḡuniro. 'Iesu, Davida Ubuga, eḡe vetuḡahoꞌi!' 48 Vaze ḡehaḡaniꞌa roneꞌenaꞌa, 'Hezoa!' rae niro. Rehano ani bare ḡihau bagaḡa huaro. 'Davida Ubuga, eḡe vetuḡahoꞌi!' 49 Ebu Iesuꞌa edanadu, ꞌahige reiro. 'Hune aroꞌi.' Ebu ubumaḡa kuruḡa vazeḡa huniro. ꞌAhige rae niro. 'Zamaḡo tiba hanoꞌi! Iḡunoꞌi! Aniꞌa huḡadeꞌohe.' 50 Aneꞌa ogoteꞌeteꞌe dabuaḡa modadu, ḡarihe iḡuniro, ebu Iesu vaḡe onamiro. 51 Iesuꞌa ḡadiniro. 'Ḡa ura ḡa mazao nagini haḡaihi?' Ubumaḡa kuruḡa vazeḡaniꞌa niro. 'Ihore vazeḡa, e ehamatihi raꞌohe.' 52 Ebu Iesuꞌa niro. 'Onamoꞌi! Ḡaeꞌa Badiꞌa mazao fieꞌeteꞌeꞌa ḡae bare faiꞌeha.' Ebu ḡarihe hune ubumaḡa raꞌarotene, Iesu ḡarunio hegotiro.