1 Iṯwa/a/ TAP̱A ṯorki’da Musa gwo mo ki: Mompala kamu/ jin wo’c ’kwani is she/ diyi’di ’de/ naskina/ mo a’di jin miga/ ḵala p̱owa P̱irawn mo dhali ap̱o/ ’kwanim piti mo. Yan’ko’d mo tani a’di midi dhal um bway mo mmo/ii mo beseene/ mo. Ki a’di midi dhal um bway mo mmo/ii mo tani, a’di midi ur um ka kuluny mo. 2 Ṯori ’kwaniŋ gwaṯẖ gwo mo ki up̱ ilu/ ki uni mini doṯ tiya kun ’dish uni gu’b is mo gom dhiriny ’dolkon kush dhali ’dolkon gana/ mo be. 3 Dhali TAP̱A c̱iki ’kwani mii ma ’the i jis e gi ’kwani Pam Masir mo. Dhali aMusa ki is piti mo tani a’di karu ki dhan gump̱a/ mo e Pam Masir mo e jis e ma ris ’kwani kun miikina P̱irawn aṯu’c mo dhali e jis e gi ’kwani mo be.

4 Wakan aMusa oki’da P̱irawn gwo mo ki: Yase/ i ta gwo jin ona TAP̱A mo. Ki mo midi ta mombwam/e mo tani aha/ mina yaku/ e bwaman ’Kwani Masir mo. 5 Dhala bwanyara/ uc̱iŋ gwaṯẖi ’baar mo gun ’kon e Pam Masir mo tani mini wu mo ’pena bwanyara/ ma P̱irawn jin c̱a’bka’da ḵurse/ ma maliḵ mo ntaga bwanyara/ gi c̱iŋkinam piti kun miina yo mo dhali i ta ga bwanyaram bip̱ si’da/ mo be. 6 Dhali e mun mo tani adhan cuuwa minu ’ther ki tur mo e Bampa/ Masiri ’baar mo. Mii gi wakan yisa mishkunu me’d ’de/ yisa walla mii yan midi doḵ e di yisa ki sule/ mo. 7 Hili e bwaman ’kwani ma Israyiil mo tani a’kaŋ kamu/ yisa midi buḵ wathiŋ kamu/ wala to e ilu/ yisa. Yan’ko’d um mini mish ki TAP̱A kar ki mo jin ḵwa/uwa ḵwa/ bwa ’peni ’kwanim Pam Masir nyaḵki ’kwani ma Israyiil mo be. 8 Dhali aris ’kwanim pini kun miiki /e to mo tani uni mini dhorothu aha/ mo dhali luŋa luŋ gom aha/ mo dhali o gwo mo ki: Yaku/ /e ka pije/ mo dhali aris ’kwani kun baṯẖki /e nsho’k ’baar mo. Dhali yan’ko’d mo tani aha/ mina ya ka pije/ mo. Dhali a’di yaki’d ka pije/ ’pena P̱irawn ka nyor jin ’batha’ba’th mo.

9 Dhali iṯwa/a/ TAP̱A oki’da Musa gwo mo ki: AP̱irawn midi ciḵ gwo ’peni /e yisa mo. Wakan ki miimer pem miga/ mar is mo e Pam Masir mo be. 10 Musa dhala Haruun miikina ris to mer gwani ’baar mo i ibwambor ma P̱irawn mo. Hili TAP̱A ’bi’thki’da P̱irawn adum piti is mo dhali a’di diki dhal ’kwani ma Israyiil bway mo mmo/ii mo ’peni bampam piti mo be.