1 Dhali yan’ko’d TAP̱A oki’da Musa gwo mo ki: 2 Ṯori ’kwani ma Israyiil gwo mo mmoṯuka bor ka nyaŋ’ko’d mo dhali thum gu’b burrinyem buni mo i bwambor ma P̱ihaahiiruṯẖ mo. A’di di’da nuss bwaman gi i Majduul dhali ḵumma/ yi’de/ mo jin ’dish pa Baalsap̱un is mo. 3 Haala P̱irawn midi ṯosh ki ’kwani ma Israyiil ii ki ii ma wukura/ e mombwaasho mo dhali mombwaasho si’da/ mu’thki uni ki jiṯ mo e bwaman mo. 4 Dhali aha/ mina ’bitha P̱irawn adum piti is me’d wosh mo dhali a’di midi ur um i sho’k mo dhali aha/ mina gam monyca ’pena P̱irawn mo dhali ’pena jesh piti mo. Dhali ’kwani Pam Masir mini mish mo mo ki aha/ tana TAP̱A mo. Dhali ’kwani ma Israyiil miikin wakan si’da/ mo be.

5 Ka maliḵ gi ’kwanim Pam Masir ṯorkunu gwo mo ki ’kwani sokin bway bwaasho mo tani bwa ma P̱irawn aḵ e nyaḵki imanmii tom piti mo ’kup̱ ki uni mo. Dhali uni oki gwo mo ki: Atinta a’dan jin miikina ana mo? Ana ki dhala Israyiil bway mo mmo/ii mo ’peni mo jin miikina uni ana to mo. 6 Wakan a’di thosonki’da arabiyam piti jin dira shumarum ki jahanne/ mo dhali sus ’kwani ma meem piti nyaḵki a’di mo be. 7 Dhali a’di dilki’da arabiya sho’k i’baar mo gun dira shumarum mo e bwaman uni kun tana suthumiyya i ’bora’bor mmobol tiya e mo. I bwaman uni ta gi ’kwaniny can ka ’deṯe/ ’deṯe/ mo. 8 Dhali TAP̱A ’bi’thki’da du ma P̱irawn is mo a’di jin ta’da maliḵ gi ’Kwani Masir mo dhali a’di urki ’kwani ma Israyiil i sho’k mo me’d jin iikina uni mo ki dar gi moŋḵo/ is mo. 9 ’Kwani Pam Masir uni urki uni i sho’k mo, aris shumarum ma P̱irawn mo dhali arisa arabiya kun dira shumarum mo dhali ’kwanim piti kun merki shumarum ap̱o/ mo dhali ’kwanim piti mo dhali ’kwani ma meem piti mo. Dhali uni ’baar mo ur uni sho’k dhali dil uni is mo ki ’kwani ma Israyiil thumki gu’b burrinyem buni i shemen ḵumma/ yi’de/ mo ki bway gi Bampa/ Pan P̱ihahiiruṯẖ mo jin ’dish Bampa/ Baalsip̱uun is mo be.

10 Ka P̱irawn ’dishki mo is mo tani ’kwani ma Israyiil uni ’deki em buni ’kup̱ ki mis mo dhali ’kwani Pam Masir uni yakina ye’c ye’c i’ko’di uni mo. Dhali uni shwakin ma kap̱e/ kagahara mo. Dhali ’kwani ma Israyiil uni gwo ki ’twa/ en TAP̱A mo. 11 Dhali uni okina Musa gwo mo ki: A a’di bese/ i ta mii mo haali/ jis jwa jin minu kan ’kwani e Pam Masir p̱iyina? I suskina /e am mo mmowu mo mombwaasho kana? Atinta miikina /e aman kan mo mmosusu aman ka pije/ ’peni Pam Masir mo? 12 A’di diki ta gwo jin ona aman /e e Pam Masir ki: Dhalki aman mo. Dhalki aman miikina ’kwani Pam Masir to mo. Haali/ a’di midi ’taki ha me’d ki isi haŋ gana/ mo gom aman mo mmomii ki ’kwani Pam Masir to mo mmo’koki wu mo e mombwaasho mo be.

13 Dhala aMusa oki ’kwani gwo mo ki: Dhalku/ is ki ḵo/ mo. Doshi ṯel shoka ’cesh ’te/ mo dhali p̱ar mowoṯẖ gi TAP̱A e mo a’di jin mina a’di i miiya ṯuca p̱o/ shwane/ gom um mo. ’Kwani Pam Masir kun p̱arkina um e mo shwane/ tani mina umi ’koki p̱ar e doḵ e ki sule/ sule/ mo. 14 TAP̱A a’di i midi as gom um mo dhali um a’di ’te/ i mini ṯel jasi shoka ’cesh mo.

15 TAP̱A oki’da Musa gwo mo ki: Atinta i gwokina /e ’twa/ i aha/ mo? Ṯori ’kwani ma Israyiil gwo mo mmo/ii mo ki seṯẖ. 16 ’Deki cwam pini ’kup̱ ki mis mo dhali yethi me’d pini ap̱o/ ḵumma/ yi’de/ mo dhali ḵwa/i a’di bwa mo ki uni mini mish ii ap̱o/a ’cesh jin ḵuthaḵu’th ki tur mo e ḵumma/ yi’de/ mo be. 17 Dhali aha/ mina ’bitha du gi ’kwani Pam Masir is mo wakan ki uni mini i baṯẖ uni i sho’k mo. Dhali aha/ mina gam monyca ’pena P̱irawn mo dhala risa jesh piti mo dhali aris shumarum piti kun dirina arabiya mo dhali aris ’kwani ma meem piti kun mer shumaruma p̱o/ mo be. 18 Dhali ’kwani Pam Masir mini mish mo mo ki aha/ tana TAP̱A mo ki aha/ mina gam monyca mo ap̱owa P̱irawn mo dhali arisa arabiyam piti kun dira shumarum mo dhali aris ’kwani ma meem piti kun merki shumaruma p̱o/ mo be.

19 Dhali yan’ko’d aman’doyu/ gwo ma Arumgimis jin yaki’da jesh gi ’kwani ma Israyiil ibwambor mo tani a’di joc̱ki’d mo dhali ya i’ko’di uni mo. Dhali araḵa ḵa’dum si’da/ joc̱ki’d mo ’peni bwambori uni bway ’ko’d mo be. 20 A’di dwarki’di embul bwaman ma jesh ’Kwani Masir mo dhala jesh ’kwani ma Israyiil mo be. Araḵ ḵali mondhurumi’d gom ’kwani pa Masir mo, hili a’di ki c̱iki moŋkush gom ’kwani ma Israyiil mo. Dhali mon’thiny yaki’di pe mo ki dar gi jin ṯal ’deŋ kamu/ mmoyaku/ mmo’disha kamu/ is ki mon’thiny c̱ani ’baar mo be.

21 Dhali yan’ko’d aMusa ye’thki me’d piti mo ap̱o/ ḵumma/ yi’de/ mo. Dhali TAP̱A halki ḵumma/ yi’de/ ka nyaŋ’ko’d ki ’tham gi mom’pesho’k jin ’bitha’bith mo mon’thinyi ’baar mo dhali a’di ki kar ḵumma/ yi’de/ mo mmota a’cesh jin ḵuthaḵu’th mo dhali aris yi’de/ uni ḵwa/kunu bwa mo be. 22 Dhali ’kwani ma Israyiil uni iikin mo e bwaman ḵumma/ yi’de/ ap̱owa ’cesh jin ḵu’th ma p̱o/ ki ḵu’th mo. Aris yi’de/ ḵarki ’kup̱ ki ta gaŋgara/ gom uni mo ki ’ban sum buni mo be.

23 ’Kwani Pam Masir uni urkina uri sho’k mo dhali iikin mmobaṯẖ uni gi sho’k mo e bwaman ḵumma/ yi’de/ mo, aris shumarum ma P̱irawn mo dhali arisa arabiyam piti mo dhali aris ’kwani ma meem piti kun merki shumaruma p̱o/ mo be. 24 Dhali i ṯwa/a/ gi mon ’twash e TAP̱A hilki mo ka luŋgu’b ’peni bwam ma ḵa’dum o’d dhali araḵ mo ap̱o/ ’kwani ma mee Pam Masir mo dhali duŋgur uni ’kup̱ is mo be. 25 A’di raḵki’da arabiyam buni kun dirkina shumarum mo. Wakan mombor buni uni diṯkin ki diṯ mo. Dhali ’kwani Pam Masir uni oki gwo mo ki: Dhalki ana sona mo ’peni ’kwani ma Israyil mo haali/ TAP̱A a’di i aski’d gom uni mo ap̱o/ ana mo be.

26 Dhali yan’ko’d TAP̱A oki’da Musa gwo mo ki: Yethi /e me’d pini mo ap̱o/ ḵumma/ yi’de/ mo ki yi’de/ midi doḵu/ ka nyaŋ’ko’d ap̱o/ ’kwani Pam Masir mo dhali ap̱owa ris arabiyam buni mo dhali ap̱o/ ’kwani ma meem buni kun merki shumaruma p̱o/ mo. 27 Wakan aMusa a’di i ye’thki me’d piti mo ap̱o/ ḵumma/ yi’de/ mo. Dhali mon’twash e ḵumma/ yi’de/ a’di doḵki’d ka nyaŋ’ko’d bway mo jin gusina a’di mo be. Dhali ’kwani Pam Masir uni sokin ’peni yi’de/ mo hili TAP̱A a’di belki uni mo e bwaman ḵumma/ yi’de/ mo be. 28 Yi’de/ doḵki’d ka nyaŋ’ko’d mo dhali kuma p̱o/ a/arabiya kun dirkina shumarum mo dhali ’kwani ma mee kun merki shumaruma p̱o/ mo dhala risa jesh ma P̱irawn mo uni kun baṯẖki ’kwani ma Israyiil i sho’k mo e ḵumma/ yi’de/ mo. Jan ṯal ’deŋ kamu/ dhalu ki e yisa.

29 Hili ’kwani ma Israyiil uni iin ki tur eya ’cesh jin ḵuthaḵu’th mo e ḵumma/ yi’de/ mo, yi’de/ i warki’d ka gaŋgara/ gom uni ki ’bana bim poros buni mo dhali ki ’bana biny cam buni mo be. 30 Yase/ i ta mii gi TAP̱A mo mmota Israyiil is ki me’d mo ka tee c̱aan mo ’peni me’d gi ’kwani Pam Masir mo. Dhala Israyiil mishki ’kwani Pam Masir wukin mo e yana gap̱ gi ḵumma/ yi’de/ mo be. 31 Dhala Israyiil mishki dhan mom’bi’th jin miikina TAP̱A ap̱o/ ’kwani Pam Masir mo. Dhali ’kwani uni ḵo/ki TAP̱A mo. Dhali uni gamki gwo is e TAP̱A mo dhali e c̱iŋkinam piti ka Musa mo be.