1 Dhali yan’ko’d Is/hak yuḵki’da Yakuub mo dhali ’bor a’di mii mo dhali ḵan a’di gwo mo ki: /E mini dhalku/ ki mii masha ’boma kamu/ ’de/ ’peni ’Kwani gi Paŋ Kanaan mo. 2 Cuyi mis mo dhali yayi mo e Pam P̱addaan/araam e gu’b ma Baṯu/iil jin ta’da baba gi kwan mo dhali butha ’bom ’peni mun mo jan ’de/ ’peni i’bwa/ ma Laabaan jin ta’da kam gi kwan mo. 3 Arumgimis jin Eḵa/ Eḵ mo ’borki /e mii mo dhali kar /e mmodho’th mo dhali mar /e amar is mo ki /e mini ta dhana buhany ’kwani mo be. 4 Dhalki a’di c̱i mom’bor mii ma Ibrahiim ki /e mo dhali emen pini si’da/ mo ki /e mini bu’th bampa/ gwan kun takina /e ac̱a/ ap̱o/ mo a’di jin c̱ikin ma Arumgimis a/Ibrahiim mo. 5 Wakan Is/hak hashki’da Yakuub ’peni a’di mo dhali a’di yaki’d mo e Pam P̱addaan/araam mo eya Laabaan jin ta ya/ ma Baṯu/iil mo jin ta Wathi/ Araam a’di jin ta’da kam ma Rip̱ka mo a’di jin ta KoYakuub dhala Iisu mo.

6 Dhala Iisu me’d jin mishkina a’di ka Is/hak ’borki’da Yakuub mii mo dhali karki a’di ’pen mo e Pam P̱addaan/araam mo mmobutha ’bom ’peni mun mo tani dhali ki a’di ’borki a’di mii mo dhali ḵan a’di gwo mo ki: /E mini dhalku/ ki mash jan ’de/ ’peni up̱ ’Kwani Kanaan mo, 7 dhali ka Yakuub haki gwo gi com e mo dhali kum mo dhali ya mo e Pam P̱addaan/araam mo. 8 Wakan Iisu p̱arki mo e mo ki up̱ gi ’Kwani gi Paŋ Kanaan ’koki ’bora Is/hak bwa mo a’di jin ta com mo. 9 Iisu a’di yaki’d mo eya Isma/iil mo dhali butha ’bom mo mmomar up̱a tiya kun takina a’di is mo a’di jin ta’da Mahlah jin ta ’bwa/ ma Isma/iil mo jin ta ya/ ma Ibrahiim mo a’di jin ta ’bwaham ma Nabayuut mo be.

10 Yakuub dhalki Pam Birsaba ’pen mo dhali yaki’d mo ’kup̱ki bway Pan Haraan mo. 11 Dhali a’di p̱u’dki’d mo e moŋkamu/ mo dhali a’di c̱a’bki’d e mun mon’thiny mo haala tente/ yulki’d mo. A’di ki bu’th wosha kamu/ mo e mo yan mo mmokar ’kup̱ piti mo dhali a’di ki ishi mo yan mo be. 12 Dhali a’di shu’bki jan mo ki to di’d jin karkunu mo ’peni mony’cesh mo jin senu sho’k mo dhali ’kup̱an piti jithirki momis mo dhali hili mo mo ma, iman’doyu gwo ma Arumgimis seki momisi a’di mo dhali thulkin ki a’di mo. 13 Dhali hili mo mo ma, Tap̱a doshki’di ’kup̱i a’di mo dhali o gwo mo ki: Aha/ tana Tap̱a Arumgimis ma Ibrahiim jin ta’da babam pini mo dhali Arumgimis ma Is/hak mo. Mony’cesh yan jin isha /e ap̱o/ mo tani aha/ mina c̱i a’di ki /e mo dhali emen pini mo be. 14 Dhali emen pini uni mina e waki bu’da ’cesh mo dhali /e mini hakas mo ka bor mo ntaga bora luŋgu’b mo dhali ’kup̱ki mom’pesho’k mo dhali ’kup̱ka ’bana bim poros mo dhali ’kup̱ka ’bana biny cam mo, dhali ki /e mo dhali emen pini mo tani arisa waḵ gi ’kwaniny’cesh mini ’bor is buni mii mo be. 15 Hili mo mo ma, aha/ mina di nyaḵki /e mo dhali kar /e mo eya ris mo gunn kun mina /e iya mo dhali susi /e ka nyaŋ’ko’d e bampa/ yansan mo. Haali/ aha/ yisa mina dhal /e ’pen yisa ntagi aha/ mina thim gwom pem jin okika/ /e mo be. 16 Yan’ko’d aYakuub merki e mo ’peni mo/ish em piti mo dhali o gwo mo ki: Ka jiŋ gana/ Tap̱a a’di idiki’d e mo yan mo dhali aha/ molkina a’di mo be. 17 Dhali a’di ḵo/ki is mo dhali o gwo mo ki: Mo yan ta mo jin ḵogu mo. Mo yan a’di ita isi gu’b ma Arumgimis gana/ mo ’tese/ be dhali yansan a’di ita ’twaŋkala goŋ gi bway momis mo be.

18 Wakan aYakuub cuki mis mo mon’thamo/ ka ’tum mo dhali bu’th wosh jin isha a’di ’ba/ mo dhali thum a’di ki mis mo mmota tiŋkiliŋ mo dhali wol a’di ayini ’kup̱ mo. 19 A’di yuḵki mo c̱aan gway mo ka Beeṯ/iil mo, hili gway gi ’peŋkuman bampa/ yan mo tani a’di yuḵu iṯwa/a/ ka Luus mo be. 20 Yan’ko’d aYakuub thulki gwo me’da ap̱o/ mo mmo/o ki: Waḵki/ Arumgimis midi di e aha/ mo dhali kar aha/ e bway pem yan jin yaka/ iya mo dhali c̱iyaa/ tonṯe/ mmoshwa mo dhali burrinye/ mmohithi is mo, 21 wakan ki aha/ mina doḵu/ bway pa e gu’b ma babam pem ki moŋḵu’th is mo tani yan’ko’d Tap̱a a’di imidi ta Arumgimis pem mo be. 22 Dhali wosh yan jin thumkika/ ki mis me’da tiŋkiliŋ mo tani a’di imidi ta gu’b ma Arumgimis mo dhali aris to ’baar mo kun mina /e c̱i aha/ mo tani aha/ mina bu’th jan ’de/ mo ’pena ’kume’d mo gom /e mo be.