1 Dhali a’di ki o imanciḵ a’di gwo gwo mo ki: Mompalu gom miinthus ka jiŋ gana/ mini p̱u’du/ mo. Hili wayyi e a’di jin mina uni ip̱u’du/ mo be. 2 A’di midi ’bor ki ’bor gana/ mo waḵka yo minu ’taki deḵ a’di m’bam piti mo dhali a’di minu biṯ mo e ḵumma/ yi’de/ mo jin mina a’di ’taki diki raḵ jan ’de/ ’peni uni gwansan is mo kun gwa’dan mo mmomii miinthus mo. 3 Yip̱i ’kup̱ ’kup̱ ki is bum ki ’bore/ mo ma. Waḵka kam pini mii miinthus mo tani ḵucuri a’di ki gwo mo ma, dhali waḵki/ a’di ri’cki’da du is mo tani dhalki a’di miinthus piti ’pen mo. 4 Dhali waḵki/ a’di mii miinthus ap̱o/ /e me’di pesu/ ka tee mo tani dhali a’di ki ṯu’k mo me’di pesu/ dhali o /e gwo mo ki: aha/ ri’ckina adu is mo tani /e mini mii dhal a’di miinthus piti ’pen mo be.

5 Dhali uni gun dhunu ki she/ mo ki o Tap̱a gwo mo ki: Mari aman moŋgam gwo is bam is mo ma. 6 Dhali Tap̱a ki o gwo mo ki: Waḵki/ um ta gi moŋgam gwo is mo me’d emen to jin miinuwa ’tash mo tani um mini mish o cwa yansan jin wana e ka ’kum’dii gwo mo ki: Dhalki a’di yu’du/ mo dhali dhalki a’di c̱udhu/ mo e yi’deŋ ḵumma/ mo dhali a’di midi ha um gwo e mo be.

7 Mina ṯal ’deŋ kamu/ ’peni um, a’di jin ta gi c̱iŋkina/ jin goro’da ’cesh walla jin ur ḵa’bal mo mmo/o a’di gwo mo ki a’di p̱u’dki’d mo ’peni bwam bunto mo ki: Yayu/ ki jahanne/ mo dhali c̱a’ba ’cesha tharabeesa mowa? 8 Walla mina a’di diki dhal gwo e i is mo mmo/o gwo mo ki: Thosonaa/ tonṯe/ mo ma dhali deḵi is pini ki burrinye/ mo dhali mii aha/ to mo ma, ntagi aha/ mina shwa to mo dhali p̱i to mo dhali yan’ko’d /e mini shwa to mo dhali p̱i to mo? 9 A’di ’bori c̱iŋkinam piti bwa i is mo ’taa? haali/ a’di miiki to jin ḵankina a’di a’di gwo mo mmomii mo ’taa? 10 Wakan um si’da/ ki um miiki to gwansani ’baar mo kun ḵankunu um mo tani oyi gwo mo ki: Am tana c̱iŋkina/ kun ’koki ha me’d mo. Aman miikina jasi a’din ’deŋ gana/ mo jin ta’da ṯu’c bam mo be.

11 E bway gi Pa Urushaliim mo tani a’di yaki’d e bway bampa/ gi bwaman gi Pan Saamira mo dhali Pany Jaliil mo be. 12 Dhali ki a’di cic̱ki bampa/ mo tani a’di gamkina ’kwani kun ’kosha monthus ’kup̱ mo uni kun ’koni ’kume’d mo, uni kun doshkin isa dhana/ mo. 13 Dhali uni ki ’de’k ’twam buni ki mis mo dhali o gwo mo ki: Yesus jin ta Tap̱a, miiyi mii ap̱o/ aman mo ma. 14 Dhali ki a’di mishki uni mo tani a’di ki o uni gwo mo ki: Iiku/ mo ma, dhali ṯor is bum eya tente/ e igasiis mo. Dhali ki uni iikin mo tani uni dhelelkina is mo be. 15 Dhali yan’ko’d jan ṯal ’deŋ kamu/ ’peni uni mo tani ki a’di p̱arki is piti e ki a’di wac̱u/ mo tani doḵki’d ka nyaŋ’ko’d mo mmomaŋa Arumgimis mo ki dhan ’twa/ jin caaca mo be. 16 Dhali a’di ki biṯ bwam/em piti a’cesh mo e sho’k ma Yesus mo mmoc̱i a’di mom’bor bwa i is mo be. Hili a’di ta wathi/ gi Pan Saamira mo be. 17 Yan’ko’d Yesus ki o a’di gwo mo ki: ’Kona uni ki ’ko ’kume’d uni kun dhelelkin mo ’taa? Mane uni gun ’koni pedoŋon mane? 18 Jin ṯal ’deŋ kamu/ bunya/? diki gam mo mmodoḵu/ mo mmomaŋa Arumgimis mo hili isi ciki/ a’di jin diki ta Wathi/ Yahuuda/ mo be. 19 Dhali a’di ki o a’di gwo mo ki: Cuyi mis mo ma dhali yayi e bway pini mo. Moŋgam gwo is pini a’di woṯẖki /e mo be.

20 Dhali a’di doṯkunu gwo mo ki ’Kwani P̱arisiyiin mo ki Bampa/ ma Arumgimis midi p̱u’du/ kakasja mo sa/? Dhali a’di ki thoḵ uni gwo mo ki: Bampa/ ma Arumgimis midi diki yayu/ ki jamas mii jin minu tim ki ye’th ye’th mo. 21 Walla uni mini ’koki o gwo mo ki: Hili mo mo ma, A’di a’dan be, walla, Imaṯṯaan mo, haali/ hili mo mo ma, Bampa/ ma Arumgimis a’di di’di bwam um mo be.

22 Dhali a’di ki o imanciḵ a’di gwo gwo mo ki: Atee mini p̱u’du/ mo ki um mina bwa o mo mmop̱ara tenteŋ kamu/ e jin ta ji gi Ya/ gi ’Kwani mo dhali um mini ’koki p̱ar a’di e mo be. 23 Dhali uni mini o um gwo mo ki: Hili mo mo ma, mmaṯṯaan mo, walla, Hili mo mo ma, mmahan mo tani, dhalku/ ki ii mo ma. Dhalku/ ki baṯẖ uni isho’k mo. 24 Haali/ me’da wara sho’k jin dhithi mo ka war mo dhali mmokush mo ’peni momis mo ’peni ’ko’d gwar gi ’bana kamu/ mo tani wakan mina Ya/ gi ’Kwani di eya teem piti mo be. 25 Hili nṯwa/a/ a’di mina isi ’kosh ka nyor mo gom to ka ris mo dhali a’di minu waḵ mo ki ’kwani ma nyaḵum yil gwansan mo be. 26 Me’da tee ma Nuuh mo tani wakan a’di midi ta atee gi Ya/ gi ’Kwani mo be. 27 Uni shwaki to mo dhali uni p̱iki to mo dhali uni mashkin mo dhali uni ’kokin mo mmoc̱iya c̱i mmomash mo ntaga tee jin cic̱kin ma Nuuh mo e bwaa ḵur mo dhali agannu/ yi’de/ p̱u’dki’d mo dhali ’ce’d uni ’baar mo sho’k mo be. 28 Wakan si’da/ a’di mina e waka tee ma Luuth mo – uni shwaki to mo dhali uni p̱iki to mo dhali uni yolki to mo dhali uni yolkin mo dhali uni siki to mo dhali uni nyaŋki to mo 29 hili ka tee jin yakin ma Luuth ka pije/ mo ’peni Pan Saduum mo tani o’d dhali to jin si’du/ mo he’thki’d ka sho’k mo ’peni momis mo dhali ’ce’d uni ’baar mo sho’k mo be. 30 Wakan si’da/ a’di midi ta atee gi Ya/ gi ’Kwani ki a’di minu ṯor eya tente/ mo be. 31 Ka tee c̱aan mo tani dhali a’di jin di’d e ’kuŋgu’b mo nyaḵki tom piti jin tana a’di e gu’b mo tani midi diki thulu/ ka ’cesh mo mmo’do uni mo dhali wakan si’da/ a’di jin di’d e bwam mombunto mo tani midi diki doḵku/ ka nyaŋ’ko’d mo. 32 Kayi gwo gi asha Luuth e mo ma. 33 A’diyin jin midi simm to e jin mina a’di ita e mondiki/em piti mo tani a’di midi this a’di e mo be. Hili a’diyin jin midi this mondiki/em piti e mo tani a’di midi kar a’di mo be. 34 Aha/ ṯora um gwo mo, e mon’thiny c̱aan mo tani ’kwani su/ mini ’kowa cin ṯal ’de/ mo. Dhali jan ṯal ’de/ minu bu’th mo, dhali jaŋ kamu/ minu dhalku/ mo be. 35 Up̱ mini ’ko isu/ mo kun mini yor to mo mmonṯal ’de/ mo. Dhali jan ṯal ’de/ minu bu’th mo, dhali jaŋ kamu/ minu dhalku/ mo be. 36 Dhali ’kwani su/ si’da/ mini ’ko e bwam bunto mo. Dhali jan ’de/ minu bu’th mo, dhali jaŋ kamu/ minu dhalku/ mo be. 37 Dhali uni o a’di gwo mo ki: Mmana, Tap̱a? A’di ki thoḵ uni gwo mo ki: I mo jin dina buŋgwar is nycine/ mo tani e mo yan mo tani korro/ mini tul is mo mmonṯal ’de/ mo be.