1 Dhali a’di ki o uni gwo mo ki: Ka jiŋ gana/ aha/ ṯora um gwo mo ki: Kun tiya ’kokin mo mmodoshi mahan mo kun mini ’koki nyoḵ wu mo nṯwa/a/ ki uni ’koki p̱ar Bampa/ ma Arumgimis e mo mmop̱u’du/ ki mom’bi’th mo be.

2 Dhali ’ko’da cim pe’de/ mo tani Yesus ki susa Buṯerus nyaḵki a’di mo dhala Yakuub mo dhala Yohaan mo, dhali sus uni bway ’kuwosh jin turatur uni ’cena mo. Dhali a’di ki war is piti ibwambori uni mo be. 3 Dhali burrinyem piti c̱a’bki ’be’d ’be’d mo dhali ki bany bany kagahara mo. Toŋ kamu/ yisa di’da e mony’cesh yan jin midi mish dhagam uni ki kush kush kan mo. 4 Dhali e mun mo tani Iliyya piki uni i is mo uni ka Musa mo, dhali uni ṯorkina ṯor ka Yesus mo be. 5 Dhala Buṯerus ki owa Yesus gwo mo ki: Tap̱a, a’di ’boro’d gom am ki aman ’kona imahan mo. Dhalki aman nyaŋa c̱iŋa/ ikwara mo, jan ṯal ’de/ gom /e mo dhali jan ṯal ’de/ goma Musa mo dhali jan ṯal ’deŋ kamu/ gom Iliyya mo be. 6 Haali/ a’di diki mish gwo jin ona a’di mo haali/ uni ḵo/kina ḵo/ is kagahara mo be. 7 Dhali araḵ ’kamki uni is mo dhali ’twa/ p̱u’dki’d ’peni bwam ma raḵ yansan mo mmo/o gwo mo ki: Yansan ta Ya/m pem jin enka/ mo. Ciḵi a’di gwo mo ma. 8 Dhali ki jahanne/ ki uni hilki mo mo mmo’kar mo ki e mo tani uni yisa mishki wathiŋ kamu/ mo jin nyaḵ di ki uni mo, hili jasa Yesus a’di ’de/ mo be.

9 Dhali ki uni ’kokin mo mmothul ka ’cesh mo ’peni ’kuwosh mo tani a’di ki ḵan uni gwo ki ’bi’th mo mmo’koki ṯor wathiŋ kamu/ ṯal ’de/ gwo gom to jin p̱arkina uni e mo ntagi Ya/ gi ’Kwani minu ’de’k mo ’peni mowu mo be. 10 Wakan uni dhuki gwo mo mmokulum gwo ibwa mo uni ’cena mo mmodoṯ eya dum buni gom ’pemen gwo jin okina a’di ki a’di midi cuyu mis mo ’peni mowu mo. 11 Dhali uni ki doṯ a’di gwo mo ki: Katinta sa/ i/ona iman’kwar to gwo mo ki Iliyya midi mii p̱u’du/ iṯwa/a/ mo? 12 Dhali a’di ki thoḵ uni gwo mo ki: Iliyya p̱u’dki’di ṯwa/a/a mo dhali ṯela ris to ’baar mo sho’k ka nyaŋ’ko’d mo. Dhali ba ki gwo ’kwaru kataye ki Ya/ gi ’Kwani mina isi ’taki ’kosh ka nyor ki nyanye/ mo gom miin tiya ka ris mo dhali minu mii ka jin thus mo dhali minu waḵ mo be. 13 Hili aha/ ṯora um gwo mo ki Iliyya p̱u’dki’d mo dhali uni miiki a’diyin jin ’bori uni bwa mo me’d gwo jin ’kwarkunu mo gom a’di mo be.

14 Dhali ki uni p̱u’dkin mo e imanciḵ a’di gwo mo tani uni p̱arkina dhana buhany wathimpa e mo kun ’kamki a’di mo dhali iman’kwar to garki uni gwo ’kusi ’twa/ mo. 15 Dhali ki jahanne/ adhana buhany wathimpa ki uni p̱arki a’di e mo tani uni ’kokini momer kagahara mo dhali uni sokin ’kup̱ ki a’di mo dhali the a’di me’d mo be. 16 Dhali a’di ki doṯ uni gwo mo ki: Gwonta su’kkina um nyaḵki uni mo? 17 Dhali jan ṯal ’de/ ’pena buhany wathimpa thoḵki a’di gwo mo ki: Manṯor Gwo, aha/ suskina ya/m pem i /e mo haali/ a’di bu’thkin ma rum thus jin nyo/o’d jin mol a’di ’twa/ wal mo. 18 Dhali ki a’di bu’thki a’di mo tani a’di torki a’di ’ko’da ’cesh mo, dhali a’di shwaki’da gabusha/ mo dhali rem shem piti ’kup̱ mo dhali a’di p̱eshki’d mo. Dhali aha/ doṯkina imanciḵ /e gwo gwo mo mmo/ur a’di ka pije/ mo tani dhali uni molki a’di mii mo be. 19 Dhali a’di ki thoḵ uni gwo mo ki: Ayy, um ’kwani kun tana nyaḵum yil kun aṯẖa moŋgam gwo is ki aṯẖ mo. Ki aha/ mina di i um ki mo gi wakata mo? Dhali ki mo gi wakata imiga/ i’dim ’kup̱ e um mo sa/? Susi a’di i aha/ mo ma. 20 Dhali uni ki susa ’ci i a’di mo. Dhali ka rum thus jin nyo/o’d p̱arki a’di e mo tani dhali ki jahanne/ a’di ki tora ’ci ’ko’da ’cesh mo dhali a’di ki biṯa ’cesh mo dhali ’daŋkal ka gabusha/ i’twa/ mo be. 21 Dhala Yesus ki doṯ com gwo mo ki: Kakasja sa/ imiikina a’di mii gi wakan mo? Dhali a’di ki thoḵ a’di gwo mo ki: ’Pena cim jin tana a’di a’ci mo be. 22 Dhali me’d ka ris a’di ki biṯ a’di e bwam o’d mo dhali e bwam yi’de/ mo mmo’ce’d a’di sho’k mo tani hili waḵki/ /e mini mish toŋ kamu/ mii mo mmomina /e hila ha’th’ko’d bam mo dhali woṯẖ am mo. 23 Dhala Yesus ki o a’di gwo mo ki: Waḵki/ /e ona bwa mo tani aris to mishu mii mo gom a’di jin gamki gwo is mo be. 24 Dhali ki jahanne/ com ma ’ci gwoki’d ki jabu’th mo dhali o gwo mo ki: Aha/ gamkina gwo is mo. Woṯẖi/ aha/ mo mmodika/ ki dar gi gwo jin gamu is mo. 25 Dhali ka Yesus mishki’da dhana buhany wathimpa p̱u’dkin mo mmosoyu/ mo mmonṯal ’de/ mo tani a’di ḵucurki’da rum thus jin nyo/o’d ki gwo mo mmo/o a’di gwo mo ki: /E jin noni wathi/ ’twa/ wal mo dhali /e jin ta wathi/ ’ceya ’diye/ mo, dhali /e jin tana arum jin nyo/o’d mo tani aha/ ḵankina /e gwo mo ki: Piyi ka pije/ ’peni a’di mo dhali dhalku/ ki se i a’di ki sule/ sule/ mo doḵ/e. 26 Dhali ’ko’di cuuwam piti jin cuukina a’di mo tani a’di ki tor a’di ’ko’da ’cesh ki tor jin shiyi’d mo dhali a’di ki pi ka pije/ mo. Dhala ’ci a’di wakina e gi wathi/ jin wuki’d mo. Wakan aris uni ’baar mo oki gwo mo ki: A’di wuki’d mo be. 27 Hila Yesus bu’th a’di ki me’d mo dhali ’de’k a’di ki mis mo. Dhali a’di cuki mis mo be. 28 Dhali ki a’di cic̱ki bwaŋ gu’b mo tani imanciḵ a’di gwo doṯki a’di gwo mo ka ḵwal is mo mmo/o gwo mo ki: Atinta gara/ i’kona aman ki mish a’di ur ka pije/ mo? 29 Dhali a’di ki thoḵ uni gwo mo ki: Ji gi wakansan minu ’koki mish ur ka pije/ ki miiŋ kamu/ mo ba/, hili ki mon’tho mo be.

30 Dhali uni iikin ’peni mun mo dhali ii ki tur mo e Pany Jaliil mo. Dhali a’di diki dhal wathin ṯal ’deŋ kamu/ bway mo mmomish a’di mo be. 31 Haali/ a’di ṯorki imanciḵ a’di gwo gwo mo mmo/o uni gwo mo ki: Ya/ gi ’Kwani minu c̱i e me’d gi ’kwanin thus mo, dhali uni mini ’kosh a’di jwa mo. Dhali ki a’di minu ’kosh jwa mo tani ’ko’da cim kwara mo tani a’di midi cuyi mis mo be. 32 Hili uni ’koki mish gwo ’ban jin ona a’di mo dhali uni ḵo/ki is mo mmodoṯ a’di mo be.

33 Dhali uni p̱u’dkin mo e Paŋ Kap̱ranahuum mo. Dhali ki a’di diki’d e bwaŋ gu’b mo tani a’di ki doṯ uni gwo mo ki: Gwonta sa/ isu’kkina um mmo/iiyina um ibway mo? 34 Hili uni ’kokin ki shwam mo haali/ e bway jin iiyina uni mo tani uni su’kkin ki gwo ka rem ’kup̱ mo gom gwo gi a’di jin caki’d mo be. 35 Dhali a’di c̱a’bki’da ’cesh mo dhali yuḵ uniŋ ’kume’d i’ce’dka su/ mo, dhali a’di ki o uni gwo mo ki: Waḵki/ wathin ṯal ’de/ jin ona bwa ki ta jin ṯwa/a/ mo tani a’di midi mii ta jiŋ ’ko’d mo dhali ta amanmii to gom tiya ’baar mo be. 36 Dhali a’di ki budha ’ci mo dhali kar a’di ibwaman uni mo. Dhali mmokara a’di a’di ’ko’da bim piti mo tani a’di ki o uni gwo mo ki: 37 A’diyin jin midi budha ’ci gi wakansan ki gway pem mo tani a’di bu’thki aha/ mo, dhali a’diyin jin midi bu’th aha/ mo tani a’di diki bu’th aha/ jasi ’te/ mo, hili a’di bu’thki a’di jin ṯu’cki aha/ ki yayu/ mo be.

38 Yohaan ki o a’di gwo mo ki: Amanṯor Gwo, aman mishkina wathiŋ kamu/ jin urki’da rum thus ka pije/ ki gway pini mo dhali a’di diki baṯẖ ana nsho’k mo, dhali aman nonkina a’di mo haali/ a’di diki ta amanbaṯẖ ana nsho’k mo be. 39 Hila Yesus ki o gwo mo ki: Dhalki a’di ki non mo ma haali/ a’di jin midi miiya ṯu’c jin eḵa/ eḵ ki gway pem mo tani a’di midi diki mish mmo/o gwon thus ap̱o/ aha/ mo ki jahanne/ ŋ’ko’d mo. 40 Haali/ a’di jin diki se ana shoka p̱o/ mo tani a’di ta a’di gom ana mo be. 41 Haali/ ka jiŋ gana/ aha/ ṯora um gwo mo ki: A’diyin jin midi c̱i um yi’de/ ki ’kwa mmop̱i mo haali/ um yuḵu ki gway ma Ḵrisṯẖos mo tani a’di yisa midi this tom piti jin ish ḵumma/ e mo.

42 A’diyin jin midi raḵ jan ṯal ’de/ ’peni uni gwansan kun gwa’dan kun gam gwo is e aha/ mo mmomii miinthus mo tani a’di midi ’taki ’bor ki ’bor gana/ mo waḵka dhana yo minu deḵ a’di i’bam piti mo dhali a’di minu biṯ mo e ḵumma/ yi’de/ mo. 43 Dhali waḵki/ me’d pini raḵ /e mo mmomii miinthus mo mmokol mo tani ’ciṯẖi/ a’di mo ma. A’di ’boro’d ki ’bor gana/ mo gom /e mo mmocic̱ mondiki/e ki ŋul mo ki /e mini ’taki diki ya e mo ma al o’d ki me’d su/ mo be, e mo jin mola o’d us mo. 44 E mun mo tani ayish buni ’koki wu mo dhali o’d si’da/ diki us mo be. 45 Dhali waḵki/ sho’k pini raḵ /e mo mmomii miinthus mo mmokol mo tani ’ciṯẖi/ a’di mo ma. A’di ’boro’d ki ’bor gana/ mo gom /e mo mmocic̱ mondiki/e ki ŋwol mo ki /e minu i’taki ’koki biṯ ki sho’k su/ e mo ma al o’d mo be. 46 E mun mo tani ayish buni ’koki wu mo dhali o’d si’da/ diki us mo be. 47 Dhali waḵki/ em pini raḵ /e mo mmomii miinthus mo mmokol mo tani buḵi a’di ka pije/ mo. A’di ’boro’d ki ’bor gana/ mo gom /e mo mmocic̱ Bampa/ ma Arumgimis ki en ṯal ’de/ mo ki /e minu i’taki ’koki biṯ ki e su/ mo e mo ma al o’d mo. 48 E mun mo tani ayish buni ’koki wu mo dhali o’d si’da/ diki us mo be. 49 Haali/ aris ’kwani ’baar mo ka ’deṯe/ ’deṯe/ mo tani uni minu imii ka ’doŋkoro/ ki mo/o’d mo be. 50 A’doŋkoro/ a’di ’bora’bor mo. Hili waḵka ’doŋkoro/ a’di ki this mom’bala’th piti e mo tani um mini gam mon’daŋkari’th gom a’di mmana? Tayi ka ’doŋkoro/ e is bum mo ma dhali tayi ki moŋḵu’th is ka rem ’kup̱ mo ma.