1 Dhali me’d jin yakina a’di ka pije/ mo ’peni gu’b gi mondheleladhelel mo tani jan ’deŋ kamu/ ’peni imanciḵ a’di gwo mo o a’di gwo mo ki: Hili mo mo ma, Amanṯor Gwo. Wosh gwahan wani jaro/ jarowa dhali monyaŋgi gu’b gwahan wani jaro/ jaro/ mo! 2 Dhala Yesus ki o a’di gwo mo ki: /E mishi dhan mii gi gu’ba caaga/ gwansan kun nyaŋkunu mo? Hili wosha ṯal ’deŋ kamu/ yisa midi di ap̱owa kamuŋ kamu/ mo jin minu ’koki ṯa’k a’cesh mo be.

3 Dhali me’d jin c̱a’bkina a’di e ’kuwosh Seṯuun jin di’d ka p̱ar ’twa/ ki gu’b gi mondheleladhelel mo tani Buṯerus dhala Yakuub dhala Yohaan dhala Andaraawus doṯki a’di gwo ka ḵwal is mo ki: 4 Ṯori aman gwo mo ma, ki mii gwansan mini p̱u’d kakasja mo? Dhali ki jamas mii kun wakatinta imina to gwansani ’baar mo mmothim mo mo? 5 Dhala Yesus ki ṯel mii ’pen mo dhali o uni gwo mo ki: ’Cunycuri mii ki is bum ki ’bore/ mo ma, ki jan ṯal ’deŋ kamu/ midi diki sus um mmodheres mo. 6 ’Kwani tana ris ka ris mini iiyu/ ki gway pem mo mmo/o gwo mo ki: Aha/ tana a’di mo. Dhali uni mini sus tiya ka ris mmodheres mo be. 7 Dhali ki um mini ciḵ gwo gom mo/as mo dhali gom gwo jin ’ce’du ’te/ mo gom mo/as mo tani dhalku/ is ki anan mo. Gom to gwansan mini mii p̱u’du/ mo. Hili ’pemen yisa minu thim naskina/ mo. 8 Haali/ kala kamu/ midi cu mis ap̱o/ kala kamu/ mo dhali ’peŋkuman bampaŋ kamu/ midi cu mis ap̱o/ ’peŋkuman bampaŋ kamu/ mo. Dhali adhan mony’cesh midi yiḵin is ki mo ka ris mo dhali ṯe/ midi di mo si’da/. Hili mii gwansan uni ita jasi monṯel ’pen ki isa nyor mo be.

9 Hili ’cunycuri mii ki is bum ki ’bore/ mo ma. Haali/ uni mini c̱i um mo e montul is mo dhali um minu dor mo e gu’b gi montul is mo dhali um mini doshi bwambor imudhiir mo dhali imaliḵ mo gom gway pem mo mmoc̱i gwo ibwambori uni mo be. 10 Dhali gwom ’borga/ minu mii c̱iki kal gi ’kwaniny’ceshi ’baar mo nṯwa/a/ mo be. 11 Dhali ki uni mini sus um mo e mo jin dwallu gwo mo dhali c̱i um wakan mo tani dhalku/ is ki anan mo nṯwa/a/ mo gom gwo jin mina umi o mo. Hili oyi a’diyin jin minu c̱i um ki mo yansan mo haali/ a’di diki ta um kun mini o gwo mo, hili Shi/in Dheleladhelel mo be. 12 Dhala kama kamu/ midi c̱i akam piti mmo’kosh jwa mo dhali com midi c̱i ya/ ki ’bwa/ ilu/ mo mmo’kosh mo dhali uc̱i mini cu mis ap̱o/ ikum mo dhali uni mini dhu uni mmowu mo be. 13 Dhali um minu shi/i e ki ’kwani ka ris mo gom gway pem mo. Hili a’di jin midi ’dim ’kup̱ mo ntagi ’pemen mo tani a’di iminu iwoṯẖ mo be.

14 Hili ki um mini p̱ar a’di jin ta mii jin bulabul e mo, a’di jin thumu mo e mo jin mina a’di ḵa ’taki diki di mo ba/ tani (dhalka mandeŋ gwo e mishi gwo ’ban mo) dhali yan’ko’d uni gwansan kun ’kon e Pa Yahuudiyya mo tani dhalki uni soni ’kuwosh mo ma. 15 Dhali dhalki a’di jin di’di ’kuŋgu’b midi diki thul ka ’cesh mo walla cic̱ gu’b piti mo mmogu toŋ kamu/ mo. 16 Dhali dhalki a’di jin di’d e bwam bunto midi diki doḵu/ ka nyaŋ’ko’d mo mmogu burrinyem p̱om piti mo be. 17 Dhali ayy/ayy/ayy gom uni gwansan kun bwaa uc̱i mo dhali gom uni gwansan kun c̱i uc̱i ako mmop̱i ka tee gwansan mo. 18 ’Thoyi mo ma ki a’di midi diki p̱u’du/ mondiṯ mo. 19 Haali/ ka cim gwansan mo tani monṯo’c bwa midi di jin diki di wakan mo ’peni ka muŋ’kup̱ mo me’d jin uḵ ma Arumgimis to mo ntagi shwane/ mo ba/, dhali midi diki di ki sule/ sule/ mo be. 20 Dhali waḵki/ Tap̱a midi ’taki diki ’ciṯẖa/ cim gwansan bwa mo tani buye/ wathimpaŋ kamu/ minu ’taki ’koki woṯẖ mo be. Hili gom gway gi uni gun kwanykunu mo, uni gun kwanykina a’di mo tani a’di i’ciṯẖuwa cim bwa mo be. 21 Dhali waḵki/ wathin ’deŋ kamu/ midi o um gwo mo ki: Hili mo mo ma, aḴrisṯẖos a’dan mo, walla, Hili mo mo ma, a’di ac̱iṯṯaan mo tani dhalki gwom piti ki gam is mo. 22 Haali/ iḵrisṯẖos kun ’koki ta kuŋ gana/ mo dhali imanc̱i gwonthus mini cu mis mo dhali ṯor dhan jamas mii mo dhali dhan momer mo mmosusa susi dheres mo, waḵki/ a’di mishu mii si’da/ gom uni gun kwanykunu mo be. 23 Hili ’cunycuri is bum ki ’bore/ mo. Aha/ ṯorkina um aris to gwansani ’baar mo nṯwa/a/ mo be.

24 Hili ka tee gwansan mo ’ko’di monṯo’c bwa mo tani atente/ midi dhurum mo mo dhali appe midi diki c̱i moŋkush piti mo be. 25 Dhali arisa culi ’baar mo mini ṯa’k mo ’peni momis mo dhali mom’bi’th kun ’kon e momis mo tani minu pir is mo be. 26 Dhali yan’ko’d uni mini p̱ar Ya/ gi ’Kwani e mo mmop̱u’du/ mo e bwaaraḵ ka dhan mom’bi’th mo dhali ki monyca mo be. 27 Dhali yan’ko’d a’di midi hash iman’doyu gwom piti mo dhali tul kum piti is kun kwanykunu mo ’peni mony’cesh kun ’kona shem ’pena bi idoŋon mo ’peni mo jin din ma ’cesh ’kup̱ mo ntagi mo jin dina momis ’kup̱ mo be.

28 ’Peni gwo gi cwamp̱u/ da/ari a’di mo dhali mishi miim piti mo. Me’d jin lu/kina a’di abim piti mo mmo’ta’dama’ta’dam mo dhali dhu jip̱in this mo tani um ki mish mo mo ki moyurantee ’dishi’d mo be. 29 Wakan si’da/ waḵki/ um ki p̱ar aris to gwansan e mo mmobu’th mo mo tani um ki mish mo mo ki a’di ’dishki’d mo, e ’twaŋkal hila/ mo be. 30 Ka jiŋ gana/ aha/ ṯora um gwo mo ki ’kwani ma nyaḵum yil gwansan mini ’koki pe mo nṯwa/a/, nṯwa/a/ ka ris to gwansan mini bu’th mo mo be. 31 Momis dhali mony’cesh mini pe mo tani hili gwom pem midi diki pe mo be.

32 Hili ka tente/ c̱aan mo walla ki mo c̱aan mo tani a’di dina wathin ṯal ’deŋ kamu/ ki mish mo walla iman’doyu gwo kun ’kon e momis mo walla Ya/ si’da/ mo, hili jasi Com a’di ’de/ mo be. 33 ’Cunycuri is bum ki ’bore/ mo ma dhali timi mo mo ma dhali ’thoyi mo ma, haali/ um ’koki mish mo mo atente/ jin mina mo p̱u’du/ mo be. 34 A’di mina e waki wathi/ jin ya yilkina/ mo. Me’d jin dhalkina a’di pam piti ’pen mo tani dhali a’di dhu c̱iŋkinam piti mo mmohil mo mo isi ka ṯu’c piti ka ’deṯe/ ’deṯe/ mo. Dhali a’di ki ḵan amantim ’twaŋkal gu’b gwo mo mmotim mo mo be. 35 Timi mo mo ma wakan – haali/ um ’koki mish mo mo jin mina com gu’bi p̱u’du/ mo. A’di wari midi ta mom’pimpili/ mo walla mombwam/e mo walla mo kun gwon ma dhoŋgola ŋwa mo walla mon’thamo/ mo. 36 Hili isi ciki/ a’di midi p̱u’du/ ki jahanne/ mo dhali gam um ki um mala e mo be. 37 Dhali a’di jin ṯorka/ um mo tani miga/ ṯor ki ’kwani ’baar mo ki: Timi mo mo ma.