1 Katinta doshkina /e isa dhana/ kan mo, ayy Tap̱a?

Katinta bagkina /e is pini ’pena tee jin ṯocu bwa mo?

2 E mo jin dhuna uni kun ta thus ki thus is ki ca mo tani uni ki ur uni kun hatha’ko’d isho’k mo.

Dhalki uni budhu mo e mom buni kun p̱ishinkina uni ki ’pen mo kun kulumkina uni gwo ibwa mo.

3 Haali/ uni kun ta thus ki thus mo tani dhuki ’ba/ ki ca mo gom to kun gop̱ uni bwam buni mo,

dhali wathi/ jin pura bwa ki pur gom nyunykina/ mo tani a’di midi jeeya je mo dhali ruḵ Tap̱a mo.

4 E bwam/em piti jin kara a’di ’ba/ ki ca mo tani a’di jin ta thus ki thus mo tani diki ŋap̱ a’di mo.

Dhali aris gwom piti kun kuluma a’di ibwa mo tani ta ku kun wa cikise/ mo mmo/o ki: Arumgimis p̱iyi’d mo be.

5 Bway piti ruski’d ki rus isa yempa/ mo,

gwon dwall pini a’di c̱a’bki’d e mo jin eḵa/ eḵ mo, jin di’di bwamp̱o/ gi jis/em piti mo:

dhali goma ris ’kup̱ piti mo tani a’di ki ’taḵ uni manya/ i’kup̱ mo.

6 A’di kulumki gwo eya dum piti mo ki: Aha/ mina mol joc̱ mo,

eya risa nyaḵum yil gi ’kwani mo tani aha/ mina diki gam a’di jin ta mo jin ’konu ki ’twa/ jin ’bushura/ ’bushur ’kup̱ mo.

7 ’Twam piti ’tu’dkunu mo ki mo ma jee mo dhali ki mo ma he’k e mo dhali mmoyap̱a yap̱ mo,

dhali ’ko’da le’d piti mo tani a’di taki’da pibi mo dhali miinthus jin shi/ashi/ mo.

8 A’di c̱a’bki’d mo mmobag mo eya ris bampa/ mo,

e mom piti jin bagkina a’di is mo tani a’di jin ta’da man’kosha mee gom uni gun ’kon ka p̱o/ mo.

Em piti mii’d ki jir jir mmotim uni gun hatha’ko’d mo

9 a’di ki wup̱a ’cesh ka ḵwal is me’da dhop̱ e bwaŋ gu’b piti mo,

a’di ki wup̱a ’cesh ki a’di midi bu’th uni gun hatha’ko’d mo,

a’di ki bu’th uni gun hatha’ko’d mo ki a’di di’d mmodir uni ka nyoḵ bway bwaman mo.

10 Uni gun hatha’ko’d mo tani uni nyu/kunu mo, mmocic̱ ka ’cesh mo,

dhali ṯa’k mo e mom’bi’th piti mo.

11 A’di kulumki gwo eya dum piti mo ki: Arumgimis dhalki’da dhal ’pen mo,

a’di bagki jis/em piti mo, a’di midi mol a’di p̱ar e mo.

12 Cuyi mis mo ma ayy Tap̱a, ayy Arumgimis. ’Deki me’d pini mo,

dhalku/ ki dhal uni gun woca is is she/ ’pen mo.

13 Katinta iruḵkina wathi/ jin ta thus ki thus Arumgimis mo,

dhali o gwo eya dum piti mo ki: /E mini diki yuḵ a’di mmoc̱i mondeŋ piti e mo?

14 /E mishkin mo, nye, /e nyiṯẖki mo jin ṯocu bwa mo dhali mo jin jwakaṯkunuwa jwakaṯ mo

ki /e mini ’taki ḵal a’di e me’d pini mo,

a’di jin hatha’ko’d mo tani a’di c̱iki is piti ki /e mo,

haali/ /e jin tana manwoṯẖ gom a’di jin dar gi com mo.

15 ’Ce’dki /e a’di abi mo a’di jin ta thus ki thus mo dhali a’di jin ta’da manmii tonthus mo,

simmi miin tonthus piti e naskin mo ntagi /e mini diki gam toŋ kamu/ mo.

16 Tap̱a a’di ta’da maliḵ gom ki sule/ mo dhali ki sule/ mo.

Kal gi ’kwaniny’ceshi ’baar mo mini ’ce’d sho’k ’peni mony’cesh mo.

17 Ayy Tap̱a /e mini ciḵ to gi a’di jin ’ka’d ma du ki ’ka’d gom to jin o a’di bwa mo,

/e mini ’bi’th uni adum buni is mo dhali /e mini ḵa’d ’cem pini mo,

18 mmodhuwa dhu ka p̱o/ mo gom uni gun dar gi icom mo dhali uni gun yap̱kunu mo be,

wakan ki wathi/ gi mony’cesh midi diki dhu uni ki moŋḵo/ is doḵ/e mo be.