1 C̱iyi Tap̱a monyca mo, ayy um gun ’koni momis mo,

C̱iyi Tap̱a monyca mo dhali mom’bi’th mo.

2 C̱iyi Tap̱a monyca ki gway piti mo

dhali luŋi Tap̱a e monyjarom piti jin ḵogu mo.

3 ’Twa/ gi Tap̱a a’di diki’da p̱owa ris yi’de/ mo.

Dhali Arumgimis ki monyca a’di ta ’twan tor ma sho’k mo,

Tap̱a jin di’da p̱owa ris yi’de/ ’baar mo.

4 ’Twa/ gi Tap̱a a’di ta gi mom’bi’th caaca mo,

dhali ’twa/ gi Tap̱a a’di ’tu’dkunu mo ki mo/eḵ mo.

5 ’Twa/ gi Tap̱a a’di ’ce’dki cwa kun wana e ka bwanyayiis bwa mo,

Tap̱a a’di ’ce’dki cwa kun wana e ka bwanyayiis bwa mo kun ta cwa gi Pan Lubnaan bwa mo.

6 A’di ki kar cwa yan e Pan Lubnaan mmop̱eya ŋalbothoŋ mo me’d ari bip̱ mo,

dhali ’Kuwosh Siryuun me’d dhuru’c ari morbip̱ mo jin shwa’da nyor ka nyor mo.

7 ’Twa/ gi Tap̱a a’di dhi’thki mo ka le’dan o’d ki ’bala’c ’bala’c mo.

8 ’Twa/ gi Tap̱a a’di yiḵinki mombwaasho is mo,

Tap̱a a’di yiḵinki mombwaasho is ki Paŋ Kaadish mo.

9 ’Twa/ gi Tap̱a a’di ki dhu abuyymo mmodho’th ushan mo

dhali mmo’cwar ’cemen gi bwanycwa mo.

Dhali e gu’b gi mondheleladhelel piti mo tani aris ’kwani ’baar mo cuun ki: Monyca mo.

10 Tap̱a a’di c̱a’bki’da p̱owa ḵursi ap̱owa gannu/ yi’de/ mo,

Tap̱a a’di c̱a’bki’da p̱owa ḵursi ma maliḵ ki sule/ sule/ mo.

11 Dhalki Tap̱a c̱i mom’bi’th piti ki ’kwanim piti mo.

Dhalki Tap̱a ’bor ’kwanim piti mii ki moŋḵu’th is mo.