1 Aha/ c̱ora/ c̱or ki bwa jin ’kuc̱u/ ki ’kari’th gom Tap̱a mo.

A’di ḵa’dki ’cem piti mo dhali ciḵ aha/ kom pem mo.

2 A’di dirki aha/ ka pije/ ’peni jis jin miga/ ’taki tor sho’k ka pupush mo,

’peni boro’th jin c̱a’bki c̱o’do/ c̱o’do/ mo.

A’di ki dhu sho’k pem ap̱o/ wosh mo

dhali dhu ŋaṯgin pem mmo’ko ki ’dantar mo.

3 A’di ki kar gway this e ’twam pem mo,

gway jin maŋka/ Arumgimis bana mo.

’Kwani ka ris mini p̱ar e mo tani dhali ḵoka ḵo/ mo

dhali dhu moŋgam gwo is buni e Tap̱a mo.

4 Mom’bor mii gom wathi/ jin kar Tap̱a ki jim piti jin gama a’di gwo is mo,

a’di jin diki ṯu’k mo e mo jin karu is ki ca mo,

ki uni gwansan kun iikini per mo mmobaṯẖ gwo ma rum p̱inyconi sho’k mo.

5 /E marki momiin tom pini kun ta momer is mo

dhali gwom pini kun kulumkina /e ibwa ’kup̱ki am mo, ayy Tap̱a Arumgimis pem mo.

Jamu/ p̱iyi’d jin minu kar ka p̱ar nyaḵki /e mo.

Waḵki/ aha/ mina ’taki bah gwo mo dhali ṯor uni mo tani

uni mini ’taki bol uni kun minu ’taki deŋ e e ka ris mo.

6 To jin ’ciṯẖu/ ’kus mmomiiya bas mo dhali to jin c̱inu ki me’d mo tani bwam pini diki o mo.

Hili /e ki tup̱ aha/ ’cem pem mmoshuwa shu mo.

To jin c̱ithu/ ki o’d jin c̱inu ki me’d mo dhali jin c̱inu gom miinthus mo tani

/e yisa ’theḵki gwo gom uni yisa.

7 Yan’ko’d aha/ ki o gwo mo ki: Hili mo mo ma, aha/ p̱u’dkina mo.

Eya warka/ jin ’kuc̱u/ is jin ’kwarkunu gwo ap̱o/ gom aha/ mo.

8 Aha/ ’kunya bwa mo mmomii bwam pini mo, ayy Arumgimis pem.

Gwoŋḵan pini jin c̱inu mo a’di di’d eya dum pem mo.

9 Aha/ ṯorkina gwoŋ ’kunyga/ jin c̱inu gom mo jin ’cuḵuwa ’cuḵ mo

eya dhana tul ’kup̱ mo.

Dhali hili mo mo ma, aha/ dinaki mu’th ’twam pem mo,

me’d jin mishkina /e aha/ mo, ayy Tap̱a.

10 Aha/ dinaki bag mom pini jin tana /e aha/ is ki me’d mmowoṯẖ aha/ eya dum pem mo.

Aha/ ṯorkina gwo mo goma isiŋ ganam pini jin tana /e mo dhali gom bway gi mowoṯẖ pini mo.

Aha/ dinaki us mo/en pini jin ṯelu sho’k mo dhali mo ma isiŋ ganam pini jin tana /e mo.

’pena dhana tul ’kup̱ ’kwani mo.

11 Dhalku/ ki bu’th momiimiim pini ’peni aha/ mo, ayy Tap̱a.

Dhalki mo/en pini jin ṯelu sho’k mo dhali mo ma isiŋ ganam pini jin tana /e mo tani ’tash aha/ ’twa/ ki sule/ sule/ mo.

12 Haali/ tonthus uni ’kamki aha/ mo dhali uni molu deŋ e mo.

Miinthus pem uni ḵalki aha/ ka ’cesh mo ntagi aha/ mola mo mo.

Uni tana ris ka ris kun bolina mur ’kup̱ pem e mo.

Adum pem ush aha/ me’di e mo.

13 Ba miiyi ki ’bore/ bala, ayy Tap̱a, mmo’cuḵ aha/ mo.

Ayy Tap̱a, huru/ ki jahanne/ ma mmowoṯẖ aha/ mo.

14 Dhalki uni dhunu mo ma ki mo ma ’the is mo dhali duŋkuru/ ’kup̱ isi monṯal ’de/ mo

uni gwansan kun simmki mii e mo tani mmo/uṯẖ mondiki/em pem mo.

Dhalki uni ṯu’kkunu ka nyaŋ’ko’d mo dhali ’doyu/ e mo jin ushuwa taḵ taḵ mo

uni gun ona bwa ki shi/ aha/ is mo.

15 Dhalki uni meren kagahara gom mon’the is buni mo

uni gun o aha/ gwo mo ki: Soso, soso.

16 Hili dhalki uni gwansani ’baar mo kun simmki /e e mo tani

’kunya bwa mo dhali ’bor bwa mo e /e mo.

Dhalki uni gwansan kun eni bway gi mowoṯẖ pini mo tani

ṯikir gwo o mo ki: Tap̱a a’di i/eḵa/ eḵ mo.

17 Gom aha/ mo tani aha/ hatha’ko’d ki ha’th mo dhali mina mii ta gi to mo,

hili Tap̱a a’di kulumki gwo ibwa gom aha/ mo.

/E ta a’dim pem jin woṯẖki aha/ mo dhali a’dim pem jin ’cuḵki aha/ mo.

Dhalku/ ki ta adiiṯe/, ayy Arumgimis pem!