1 Tap̱a a’di ta a’di jin ca’d mo dhali ta a’di jin ca’d jin minu maŋ mo

e ’peŋkuman bampa/ ma Arumgimis bana mo.

2 Dhali e ’kuwosha turgam piti jin turatur jin ḵogu mo, dhali jarom piti ki tur mo,

a’di ta moŋ’kunyka/ gom ’kwaniny’ceshi ’baar mo.

A’di jin ta Wosh ma Sihyuun mo jin di’d isa dhana/ ki ’ban ma bim poros mo,

a’di jin ta ’peŋkuman bampa/ ma dhana Maliḵ mo.

3 E bwaman gi gu’b mo gom montur piti mo tani

Arumgimis ki ṯor is piti eya tente/ ki a’di ta a’di jin ’ce’de’da ’ce’d she/ mo.

4 Bahili, imaliḵ uni tulki ’kup̱ mo,

uni p̱u’dkini monṯal ’de/ mo be.

5 Isi me’d jin p̱arkina uni a’di e mo tani uni merkin kagahara mo.

Uni ’kokunu mmoduŋgur ’kup̱ is mo dhali uni sokin mo be.

6 Mo jin deenu is ki bir bir mo tani a’di bu’thki uni mo,

dhali uni ’pe’dki she/ me’da ’bom jin shwan ma ’ci mmomuri dho’th mo.

7 Ki ’tham ki mom’pesho’k poshki’d mo tani /e ki p̱or uni bwa mo

uni gun tana ḵur yi’de/ gi Pan Tarshiish mo.

8 Me’d jin ciḵkina ana gwo mo tani wakan si’da/ p̱arkina ana e mo,

e ’peŋkuman bampa/ gi Tap̱a gi momis mo,

dhali e ’peŋkuman bampa/ ma Arumgimis bana mo,

a’di jin ṯel ma Arumgimis sho’k ki sule/ sule/ mo.

9 Aman kulumkina gwo ibwa gom mo/en pini jin ṯelu sho’k mo, ayy Arumgimis,

e bwaman gu’b gi mondheleladhelel pini mo.

10 Me’d gway pini mo tani, ayy Arumgimis mo,

wakan momaŋ pini a’di jidhirki’d e ’pemen gi mony’cesh mo.

Me’da bim poros pini mo tani a’di ’tu’dkunu ki momp̱i mii e mo.

11 Dhalki Wosh ma Sihyuun a’di ’kunya bwa mo.

Dhali dhalki i’bwa/ gi ’Kwani Yahuuda/ uni ’kunya bwa mo gom mondwall gwom pini mo.

12 Iiyi mmo’kara Sihyuun mo, dhali iiyi ka kul is mmo’kama yim is mo,

deŋi aris gu’b ma yim kun turatur e mo,

13 hili isi gwo i e ki ’bore/ goma cur ma yim mo,

iiyi e bwaman mo ma, e mo ma yim kun turatur mo

ki um mini mii ṯora nyaḵum yil ’kwani gwo i’ko’d mo,

14 ki a’di yansan ta’da Arumgimis mo,

a’di jin ta’da Arumgimis bana mo gom ki sule/ dhali ki sule/ mo.

A’di midi ta jim bana jin midi shu ana bway ki sule/ sule/ mo.