1 Goma Arumgimis ’de/ mo tani a’di ic̱or ma ḵashiram pem ki shwamm mo.

’Peni a’di mo tani mowoṯẖ pem p̱u’dki’d mo.

2 A’din ’deŋ gana/ ita wosh pem mo dhali bway gi mowoṯẖ pem mo

dhali acur pem jin ṯenu gwo mo. Ki aha/ minu ’koki joc̱ mo ki joc̱ jin shiyi’d mo.

3 Um mini daḵ mo kakasja mmo’ko ap̱o/ ’kwani mo mmo’ce’d uni bwa mo, aris umi ’baar mo,

kun wana e ka goŋ kun ishki gal mo, agoŋ jin dar gi mo jin kar shoka ’cesh mo?

4 Uni i’kona gwo ibwa mo mmoyap̱ a’di ki sho’k ’pena ris ’kup̱ piti mo.

Uni ’kunykina bwa ki ’kuny gom gwon thus mo.

Uni ’borki ’twam buni mii mo,

dhali hili e bwaman ma dum buni mo tani uni jeekina jee mo.

5 Goma Arumgimis a’di ’de/ mo tani a’di ic̱or ma ḵashiram pem ki shwamm mo.

Haali/ mo ma ’teŋ kap̱em pem mo tani a’di ’peni a’di mo be.

6 A’din ’deŋ gana/ ita wosh pem mo dhali bway gi mowoṯẖ pem mo

dhali acur pem jin ṯenu gwo mo. Aha/ minu mol yiḵin is mo be.

7 Eya Arumgimis mo tani mom pem jin sika/ is gom mony’cuḵ mo dhali montaḵ mo tani ’kon e a’dim pem

jin ta wosh jin eḵa/ eḵ mo, dhali a’dim pem jin hurga/ jwa mo tani a’di ita’da Arumgimis mo be.

8 Gami gwo is e a’di ka tee i’baar mo, ayy ’kwani.

Woli adum bum ibwambori a’di mo.

Haali/ Arumgimis ta a’di jin mina ana hur jwa icine/ mo.

9 ’Kwani kun hatha moŋ’ko ’ko’d ki ha’th mo tani hili ’kon jasi ari’ceenne/ mo.

’Kwani kun ’kon e mo jin kap̱a ’penkap̱an mo tani suskunu this e mo eya dum buni mo.

Dhali mombar buni ’deke’thki’d isi mis mo.

Uni tawasha tawash mo mmobola wulp̱e/ e mo.

10 Dhalku/ ki dhu mo jin wunu awuny jwa i is e mo jin dilu to mo.

Dhalku/ ki dhu mo ma ’te/ ma kap̱em bum ki p̱e’th e mo jin ḵwalu to mo.

Waḵki/ mo jin tanu pa ki pa mar is mo tani dhalku/ ki dhu adum bum ’ko’di uni mo.

11 Me’d ’de/ Arumgimis oki gwo mo.

Me’di su/ mo tani aha/ ciḵkina gwo yansan mo

ki mom’bi’th ta jima Arumgimis mo

12 dhali e /e mo tani ayy Tap̱a, mo/en jin ṯelu sho’k mo cila /e mo.

Haali/ /e ki raḵ wathi/ to ibway mo isi ki miin to jin miina a’di mo be.