1 Momaŋ a’di ’dap̱a’d ki /e mo, ayy Arumgimis, eya Sihyuun mo,

dhali e /e mo tani gwo jin onu is minu mii thim mo,

2 ayy /e jin ciḵki mon’tho mo.

Haali/ e i /e mo tani a’di ipiyina ris buŋgwar is mo

3 haali/ gom gway gi miinthus mo.

Ki gwondhaŋ bana p̱iki ana e mo,

/e gwamki uni mo.

4 Mom’bor mii gom a’di jin kwanykina /e mo dhali guyu/ mmo’dish mo is mo,

dhali mmoc̱a’b e bwaagoŋ pini mo.

Am minu kap̱ mo ki miim ’borgam pini mo e gu’b pini mo

jin ta gu’b pini gi mondheleladhelel mo be.

5 Ki dhan miim pini kun miikina /e kun caaca mmothoḵ am ’twa/ ki mony’cuḵ mo,

ayy Arumgimis bam jin ta bway mowoṯẖ mo,

/e jin ta mo ma ’teŋ kap̱e/ goma ris ’kwani kun ’kokin e ’pemen gi mony’ceshi ’baar mo,

dhali uni kun si’dkin mo e bwamp̱owa ris ḵumma/ yi’de/ mo.

6 /E ki mom’bi’th is pini mo tani /e ṯelki dhan wosh kun turatur sho’k mo,

mmoc̱u’th gi mo ma dem dem mo.

7 /E jin doshki yi’de/ jin mii’da ḵuku/ ḵuku/ mo,

dhala ḵuku/ ḵukum buni jin birkina uni bakal mo,

dhala dulaṯṯ gi ’kwani mo,

8 wakan uni gwansan gun ’kokin e mony’cesh jin si’dasi’d mo tani,

uni ḵo/ki is gom jamas miim pini mo.

/E ki dhal mo jin yana ya gi mon’thamo/ mo dhali mom’pimpili/ mo mmoḵum cuuwa/

gom bwaŋ ’kunyka/ mo.

9 /E buṯkin e mony’cesh mo dhali wol a’di yi’de/ mo,

dhali /e ’kummki a’di ki ’kumm jin caaca kagahara mo.

Yi’de/ ma Arumgimis kun son a’di ’tu’dki mo mo.

/E ki ’twaḵ emen buni mo,

haali/ wakan /e thosonki a’di mo be.

10 /E wolki a’di yi’de/ ka ceŋjal kun ishkin ka enthus mo,

dhali thoson a’di jil piti mo,

mmodhal a’di ki c̱o’do/ mo ’pena p̱iriny ma sho’k mo

dhali /e ki ’bor a’di mii mo gom ca jin cana a’di mo.

11 /E shumki yil gi mo jin isha to ka enthus kun ta kum pini mo.

Jil jin dir ma arabiyyam pini mo tani uni wolki ’twa/ mo ki momoṯ jin momoṯkina uni mo.

12 Mo ma shon dhii/i’d gi mombwaasho mo tani wolki ’twa/ mo,

dhali aris woshi ’baar mo uni ’kamki is buni ki moŋ’kuny bwa mo.

13 Ashom bip̱ uni hi’thki is buni ki mo ma ma’diny mo,

dhali embul wosh uni hi’thki is buni ki pos mo,

uni ḵumki cuuwa/ mo dhali yuḵ gway mmonṯal ’de/ ki moŋ’kuny bwa mo.